Staycation冇人陪我去，Flycation我又覺得太鳩，自製Eyecation都得啩！上官網測試過呢間台中溫泉酒店full booking到爆瀉，最快有吉房要去到2021年4月5號，你估到時飛得台灣未呢？陳同佳到時又自首咗未呢？
雖然喺Expedia有入口位，但要book呢間位於台中谷關嘅虹夕諾雅溫泉度假村酒店，始終都係要射返去官網預訂，各大酒店search engine亦冇捷徑，冇得打尖。
之前睇台灣媒體介紹，得悉谷關虹夕諾雅喺疫情下full booking直至2021年2月先有房，不過當我打呢段稿之前再search一search，2、3月只有零零汀汀一兩日有房，正常供房要排到去2021年4月5號先有多啲日子揀，講緊雙人房咋喎，假設係3至4人房就要下年5月底先供應正常，家庭式大房當然仲難book。
雖然我係睇台灣嘅資訊而得知，但聽聞谷關虹夕諾雅幾乎係零宣傳，咁都full到七彩，究竟係點解呢？
某程度上都係名牌效應嘅，酒店係日本星野集團旗下高級品牌，輕井澤、京都、富士、沖繩、東京、峇里島等地方都有，而台中呢間就係2019年6月30號先開業，換言之啱啱先至一周年。
當香港Staycation大行其道嘅同時，台灣人亦一樣要留台消費同埋喺內陸旅行，據悉喺疫情之前，谷關虹夕諾雅嘅入住率已經keep住有9成，疫情後就再推高到滿瀉。
谷關虹夕諾雅總共有49間客房，根據酒店官方資料顯示，房型分為：
「水明」
可容納兩人嘅標準客房，有落地大窗、賞月露台、半露天溫泉區等等「風音」，配套差唔多，係可以容納3人嘅樓中樓客房，呢間房亦設於溫泉專用樓層
「山霞」
配套都係接近，但就適合小家庭，因為有兩間睡房
「月見」
係特別客房，全酒店得5間，房內溫泉專用區係其他房型嘅兩倍，再擺多張大梳化畀你睇山景
「森羅」
可以容納7人嘅客房，3間睡室當中有兩間係雙人床房，另一間就係3人房，每間睡房都係獨立，最大特色係擺設咗餐桌嘅大露台。
雖然每間房都有私人浴池，全日不間斷咁填滿溫泉水，但係去過嘅台灣人都表示，一定一定要去埋大眾浴場！
因為大眾浴場裡面連飲水機都係用富士山空運嘅山泉水，而且谷關本身就係台灣最古老嘅溫泉勝地，泉質屬於弱鹼性碳酸泉，聽講浸完之後皮膚會好柔嫩，所以畀人叫做「美人湯」，佢咁講，我咁聽啦！
講到幾正幾勁，入正題講價錢喇。
谷關虹夕諾雅入面得一間餐廳，由日本調派過嚟嘅主廚去主理，置身竹林深處，基本上你都要喺嗰度搞掂早午晚三餐，其中午間御膳嘅價錢係HK$ 370 ／一位，另外有個一日限量5份嘅冰磚涼麵，盛惠HK$ 270。
咁點解淨係講午餐呢？件事係咁嘅，你去谷關虹夕諾雅book房，佢哋係有住宿連埋早餐晚餐嘅package，一位要HK$ 5064，你冇睇錯，係計一位，講緊港幣，換言之兩個人去包早晚餐連住宿就要港幣一萬。
咁齋住唔食得唔得先？
得，實得㗎！齋住宿就係HK$ 3750／一位。
咁你明我點解一開頭就話Eyecation啦，我返出去努力打稿先，儲得錢嚟應該等到佢下年有房㗎喇！
Photo source: https://hoshinoya.com/guguan/zhtw/