前幾日成班friend出嚟食飯，有個朋友話佢表弟終於有機會踢香港甲組，可以實現做足球員嘅夢想，但由於人工太低，要搵份part time維持生活，所以最近去咗超市做執貨。
我哋幾個都聽到熱血沸騰，唯獨其中一個有錢仔朋友就講極都唔明，佢話：「你表弟點解要走去做執貨？浪費時間同體力，不如畀心機練波，操fit啲體能，咁樣咪仲快可以闖出名堂。」
呢個有錢friend一出世就含住金鎖匙，當年大家畢業出嚟食飯，個個都二十出頭，啲衫戇柒柒唔在講，埋單又要驚唔夠錢畀，不過佢已經係身光頸靚著住套Armani西裝，揸住架寶馬，仲有張印住「Manager」 title嘅卡片周圍派，當然啦！架車係佢老竇送嘅，一畢業就做manager，亦因為家族生意。
雖然佢唔理解民間疾苦，不過份人就冇咩嘅，有friend試過要跑馬拉松所以周圍搵贊助，佢二話不說就包晒，又有人個女要賣童軍獎劵，sell佢買一張，結果佢買咗兩疊，你可以話佢好有義氣，但實情係太有錢喇，以上都係散紙嚟，誇張啲講句，佢跌咗落地都懶得烏低身去執。
我哋窮一生努力，辛辛苦苦跑到去一個終點，原來呢個終點對某啲人嚟講，只係一出世嘅起點。
事實雖然如此，不過咁樣諗就會好灰，所以我成日安慰自己，跑去終點嘅過程會遇到壞天氣，亦會風光明媚，可以認識好多唔同嘅人，亦可以體驗好多唔同嘅事，所有嘅見聞都係獨一無二。
朋友表弟為達成一個理想而去超市執貨，係我哋每一個人嘅縮影，有時要做一件鍾意嘅事，就要先做一啲唔鍾意嘅事，如果唔係有呢個信念，我一早辭咗自己份工啦！