原來有種人 總眷戀前任

女會員Kimberly同我講:「前男友最近搵返我。」本以為佢打算復合,想問下可唔可以退返錢唔join配對服務,所以我就話:「幫你問下公司啦,睇下按比例扣返得唔得?」

點知Kimberly答:「梗係唔使啦,我哋又冇喺返埋一齊,上次鬧完佢都仲打嚟,頭先我再絕啲,話大家唔係朋友,希望佢唔好再煩住我啦!」

Kimberly一年半前同男朋友分手,當時佢哋同居,有次Kimberly入房同身在外國嘅家姐玩視像,點知講唔夠兩句,家姐個女就唔小心整跌咗碟意粉落地,又要處理玻璃碎,又成地都係啲茄汁,結果佢兩姐妹傾咗幾句就匆匆收線。

要等家姐執手尾,Kimberly見無聊就出廳搵男朋友,但客廳冇人,同時聽到廁所有啲S…S…S嘅聲,即係嗰種離開好遠,你聽到對方細細聲講嘢,又唔知講緊咩嘅聲,Kimberly靜靜行近挨住廁所門,終於聽得清楚少少喇,佢男朋友講:「記唔記得嗰次同你去首爾旅行呀?真係好開心,有冇機會去多次?」另外又聽到:「仲使問,梗係你靚啦,你好好多!其實我同佢唔夾,掛住你呀,之前路過尖沙咀太平館,我記起你鍾意食嘅梳乎厘,不如一齊再去食。」

對話唔止咁少,雖然屋企有其他雜聲唔可以全部聽到晒,但其實匿喺廁所講電話就最蠢,因為好應聲,識玩梗係開埋水喉用水聲隔一隔啦!Kimberly次次同家姐玩視像都玩好耐,可能冇諗到今次有突發事,所以佢男友冇乜警惕,一開廁所門就見到Kimberly企定喺度。

其實Kimberly都估到對方係同前度講電話,因為內容圍繞住以前去邊,佢話當時淨係問咗句:「乜你真係覺得同我唔夾咩?唔夾又同我拍拖三年?又同居?」

男朋友即刻想氹返佢,不過Kimberly話人係有尊嚴,既然講自己唔夠前度靚,話自己唔夠前度好,句句充滿比較同眨意,所以都唔想再留低喇,嗰陣先係夜晚9點幾,佢簡單執咗啲嘢就返屋企住,兩個人嘅關係亦正式畫上句號。

唔夠一年,佢從大家嘅common friend當中得知呢位前男友拍緊拖,不過新女友並唔係嗰位前度,當時Kimberly已經心諗,又話好掛住人,又話好懷念首爾之旅,又話前度點好點靚,最終竟然冇復合,而係同另一個女仔拍拖?唔係好愛前度㗎咩?

愛,都愛,總之你成為前度,佢就愛。近月Kimberly開始斷斷續續收到呢位前男友嘅電話同WhatsApp,新年講Happy New Year,聖誕講Merry Christmas,疫情叫保重身體,天氣凍叫著多件衫,噓寒問暖,唔知仲以為未分開過。

更甚嘅係,呢位前男友早幾日直接打畀Kimberly:「你咪好鍾意有肉鬆嗰隻海邊走走嘅,我頭先見到買咗兩盒,自己一盒你一盒,拎畀你好冇?」

Kimberly:「先生,你有女朋友喇喎。」

「唔好提佢啦,佢好煩㗎!原來呢隻肉鬆蛋捲真係好好食,以前仲笑你買幾條蛋捲咁貴,我而家先知會唔會太遲呀?」

Kimberly唔明白前男友想表達啲乜,唯有叫對方唔好再打嚟,有心事就留返同自己女朋友講。

前男友呢幾日嘅電話同WhatsApp攻勢未停過,話題無限loop,一時又問Kimberly身邊有冇人中招,一時又問有冇得work from home,屋企有冇被圍封,頭先又借啲意問打咗第三針未?Kimberly愈聽愈唔耐煩,直接又粗暴咁話:「你唔好再打嚟!」

「其實我仲好掛住你,可唔可以好似朋友咁出嚟食飯呀?我最近work from home,過嚟搵你食lunch吖!」

Kimberly:「聽住,我哋唔係朋友!」

唔係每對情侶分手都一定反目,分手後應唔應該做朋友亦係見仁見智,但既然已經有新女朋友,仲要不時打畀舊情人想當年,咁就點講都一定唔啱,同前度保持距離,係對現任最基本嘅尊重。

好似Kimberly前男友呢類型,喺日常生活中真係見唔少,佢哋鍾意前度依然對自己有感覺,就算明知返唔到轉頭,都想有種時刻被需要嘅感覺,假設前度仲係單身,甚至會幻想前度等緊自己。

同呢類人一齊要特別小心,因為無論任何人作為佢嘅現任,無論你做得幾好,佢都係會覺得前度好啲,若然有一日你變成前度,咁佢先會後知後覺走嚟懺悔,其實咁樣係冇意思,冇珍惜眼前人嘅心態,兩個人好難行到最後。

舊愛還是最美?唔一定,不過原來有種人,總喜愛眷戀前任,呢種係心理病。

error: