Hello聶瞳！最近睇你ig，知道你已經喺日本開咗公司，希望疫情盡快告一段落，等你可以早日同細佬團聚，喺度祝事事順利。查實今次投稿，係想畀個心理準備你，因為去到日本除咗要克服語言同文化差異之外，仲要識得點樣應付一啲老實不客氣，乜都當老奉嘅朋友。
簡單介紹吓自己先，我過咗嚟東京已經5年，當初喺香港因為工作關係認識咗個日本藉男友，仲結埋婚，後來總公司要調佢返日本，於是我就跟埋佢過嚟定居喇。香港本身份工個老細好好，佢叫我幫公司打理social media嘅account，即係做一啲類似網站小編嘅嘢，人工雖然冇之前咁多，但起碼我唔使喺日本另外搵工，所以5年前已經過緊work from home嘅日子。
雖然係wfh，不過每日要打理家頭細務，加埋social media嘅job都有忙嘅地方，始終網上嘢要快要新吖嘛，出post要貼地，抽水都要留意新聞啦，所以好多時都係由朝做到晚，買唔切餸我都擔心家變㗎🤣都係嗰句啦，起碼唔使另外出去搵工，好滿足㗎喇。
可能我份工長期要對住部腦，亦長時間都要開住web版whatsapp同香港同事溝通，有啲朋友見我全天候online就覺得小女子好得閒，其實有苦自己知啦，social media呢啲嘢唔係朝九晚六，周末同老公出街有時都要拎埋部電腦，費事突然要出post或者要edit就心掛掛。
有啲朋友見你喺外地就會引發無限生意諗頭，有個叫我一齊做奶粉生意，有個叫我幫手走水貨去outlet入手袋，有個就係唔係都叫我去藥妝大手買藥，其實有好多喺香港嘅Donki都有啦，唔一定要喺東京嘅藥妝買㗎！
其中有位叫Ada嘅朋友特別有「恆心」，猛咁叫我幫手做代購，話會拆佣畀我，咁真係冇興趣做代購吖嘛，撩咗我合作好多次㗎喇，我次次都好婉轉咁推佢，直至有一次衰心軟就出事。話說Ada嗰次問可唔可以幫手買幾個Kaldi福袋，咁我諗住幾個福袋啫，推十次幫返一次都ok嘅，無謂做到咁不近人情啦，點知就出事喇。
因為要寄返畀佢，所以買完返嚟之後問Ada拎地址，不過佢遲遲都唔肯畀，原來係密謀緊加單，ignore咗我兩日，再一口氣send咗超過20幅相過嚟，全部都係護膚品同mask之類，有一刻我懷疑佢send錯message，乜唔係淨係幫你買幾個福袋咋咩？做乜愈搞愈多嘅？然後Ada再send多條link過嚟，係starbucks嗰啲特別版杯…
Ada：「喂，你買嘅話係咪呢個價？」
「網頁寫幾錢就幾錢，我買點解會特別平？」佢已經唔係問你可唔可以幫手買，而係設定為我要幫佢去買。
Ada：「唔係喎，我見到香港有行家做到7折喎…」
「唔識，不嬲冇研究starbucks啲杯。」
Ada：「你試下落舖頭傾傾吖！」
「點解要去傾？」
Ada：「有得做呀！拆返佣畀你，大家share囉！」
呢吓真係躁咗，係咪要我拎埋個公事包落去同人哋傾discount？做代理呀而家？莫講話我冇興趣做代購生意，就算真係做，都唔會揀一個乜都老奉嘅人做partner啦！
「其實我係有工返，都有自己嘅嘢要忙，冇可能放低晒手上嘅工作去同你做代購生意。」
當時真係好想block咗Ada個WhatsApp，但諗起佢啲福袋都仲未畀錢。
我唔知道移居海外嘅人有冇遇過相似嘅情況，身邊總有啲唔識做又乜都當老奉嘅朋友叫你入貨，老老實實唔係人人都鍾意做代購，同埋外國環境同香港唔一樣，好似我咁，由於唔係住首都圈，去新宿同澀谷等地方唔止需要時間，車費亦都唔平，唔好見人住外地就一路諗點樣利用啦，我哋去第二個地方嘅目的唔係擔當買手㗎！
見你ig已經post咗新office嘅相，如無意外日本一開你就會過嚟，有心理準備梗有幾個唔識做嘅朋友叫你買呢樣買嗰樣，如果真係好friend而對方的確有需要，幫手當然無妨，不過有啲人最叻食住上同埋霸王硬上弓，開咗先例之後會老實不客氣，到時你就要花費大量時間幫佢哋周圍入貨，過唔到自己想要嘅生活，甚至影響工作。
日本最貴係交通費，我幫Ada買嘢要搭40分鐘車，一來一回個幾鐘，仲要搵同埋格價，出一出去就用半日，早排寄咗啲福袋畀佢，錢都未收返，所以有時唔係計較嘅問題，而係唔想做呢啲嘢。如果對方真心當你係friend，絕對唔會迫你做唔想做嘅嘢，亦唔會想麻煩到你，分清楚邊啲係真朋友，邊啲當你係棋子同埋工具好重要。