認咗衰仔先，半年前我戴咗隻勞力士去見工，唔係想炫耀或者扮嘢，只係當日我有個中學同事結婚，晏晝要去觀禮，咁著得光鮮啲都好合理吖，又冇理由見工嘅時候特登除咗隻錶，畢竟唔係咩金勞鑽勞，普通又低調嘅Datejust款啫。
我之前曾經做過鐘錶公司嘅內部職位，所以呢隻勞力士已經買咗好多年，本身冇乜興趣㗎，就算係今時今日，我都係鍾意戴嗰啲智能電子錶多啲，不過當時啲同事話保值，加上staff始終有啲著數，唔係講緊價格，而係講緊唔使出去畀啲Sales氹你買無人問津又冇升值潛力嘅款，咁我當時用5萬蚊左右就當投資啦，真係重要場合先戴一戴。
講返見工，嗰日我真係咁啱有個interview，著一日西裝就出席晒觀禮同interview，抵呀！點知遇著個傻嘅男HR，一入房坐低佢已經留意到我隻錶。
「喂，呢隻Datejust正喎！我見出面要7萬幾，你買幾錢呀？」
我：「買咗好耐喇，5萬蚊左右。」
「你都對Rolex有興趣？」
我：「麻麻。」
「邊度買㗎？」
我：「之前做過鐘錶公司吖嘛，CV有寫。」你冇睇CV㗎咩廢物？
「咦，係喎！喂，有冇可能買到隻熊貓地通拿？木村拓哉都戴喎！」
我：「下？熊貓地通拿邊會有貨㗎？」
「你可唔可以搵舊同事幫手排呀？」
我：「我冇聯絡嗰班舊同事好耐喇喎，何況唔會排到㗎喇！」
講少少熊貓地通拿嘅典故，呢隻你唔會喺錶行買到，就算VIP都冇可能，自己出去食炒價就得，不過一定係天價。
「我見Rolex官網賣HKD 113,000，我等得喎！」
唔好咁天真啦！炒價講緊三十幾四十萬，收返你嗰十幾萬啦，錶就冇得排㗎喇，去排街症驗下個腦會實際啲。
我：「真係幫唔到你，唔好意思。」
結束話題之後終於講返見工嘅嘢，不過講唔夠幾句佢又講勞力士。
「其實綠水鬼都唔錯，戴出嚟起碼一眼就認到。」
你個柒頭已經一眼就見到啦！總之嗰次interview有7成時間講Rolex，得3成時間講公事，我覺得呢位男HR真係好唔專業。
過咗兩日呢位HR打電話畀我，仲以為份工有下文，點知佢厚面皮到再問一次可唔可以幫手排waiting list，痴孖根！既然你打得嚟，我都問下係咪有second in或者有offer啦，到而家仲記得條垃圾咁答我：「未有呀，仲in緊人，喂，熊貓地通拿冇得排，Rolex Submariner有冇呀？Explorer II都得喎，你嗰款Datejust都可以呀！」
一口氣講幾個勞力士嘅系列出嚟又點啫，就算有都唔會幫佢買，好熟呀？又唔係同你有親，更何況你冇可能以正價喺錶舖買到，如果對勞力士有少少研究都會知道行情，唔好喺度痴心妄想啦，點解唔做返本份，幫個求職者follow up份工呀？唉，真係好後悔當日戴咗隻勞力士去interview，冇諗過會遇到個癲嘅。
其實要買呢啲咁渴市嘅勞力士，你唔食炒價根本係零機會，首先你要同錶舖熟，唔係VIP唔使旨意入waiting list，個list仲會更新，你太耐冇幫襯買其他嘢就唔該重新輪候，等張list排到自己大約好似等公屋咁上下，而且同女人買名牌手袋一樣，有時你係要配貨先有，即係要買一啲你唔想要嘅錶，職員先會畀個機會你買到隻有價有市嘅勞力士，仲未必係你指定要嘅顏色同款式。
其實嗰次都唔係佢最後一次打嚟，相隔兩個星期左右，呢條厚顏無恥又打嚟問：「如果黑色盲Sub會唔會容易排啲？」（即係Rolex Submariner款無日曆版，俗稱為盲Sub）
當時我已經搵到新工：「我返緊工喎，你係講錶定係有其他嘢講？」
「冇呀，想問下黑水鬼會唔會容易過買綠水鬼咋。」
我：「你食屎啦！再打嚟我就直接打你公司直線搵老細投訴。」跟住cut埋佢線，不知所謂，我究竟見咗份咩工呀？