最近有個求職者嚟見工，佢已經做咗兩年半freelance，自由人轉返朝九晚六，適應到？
「適應唔到都要適應，因為我啲freelance job成日收唔到錢，無論點做都好，每個月都係得幾千蚊落袋，再係咁生活落去都唔係辦法。」
我：「你唔追？」
「我哋嗰行，拖係行規，又或者咁講，邊一個freelance冇畀人拖？我想追，行家叫我唔好搞大件事，行頭窄，就算追得到，得罪咗老闆好難喺同一行立足，有啲同業仲同我講，畀人拖三個月至半年執到，有人試過畀人拖一至兩年，做呢行就要接受個遊戲規則。」
我最初接辦公室日報廣告，都有人同我講過類似嘅說話，初入行冇辦法唔依從，結果我有廣告係2017年出街，嚟到2019年今日都未收到錢。
後來我轉咗prepay，大家話我好多廣告嘅同時，背後亦推咗好多，或者我賺少咗好多錢，但我keep起嘅都係一班好客，一班好老闆。
搵工還搵工，我都係鼓勵個求職者要追返佢嘅freelance錢，而佢就覺得追唔到，冇support，驚以後想做part time都冇掟企，我忽然諗起出自劉元卿《賢奕編》當中嘅《大脖子病人》。
「南岐在秦蜀山谷中，其水甘而不良，凡飲之者輒病癭，故其地之民無一人無癭者。及見外人至，則群小婦人聚觀而笑之，曰：“異哉人之頸也，焦而不吾類。”外方人曰：“爾之累然凸出於頸者，癭病也，不求善藥去爾病，反以吾頸為焦耶？”笑者曰：“吾鄉人皆然，焉用去乎哉？”終莫知其為醜。」
註解係：
南岐喺陝西一帶嘅山谷當中，嗰度啲水好甜，不過水質差，飲咗嘅人會有大脖子病，所以南岐當地居民人人都有大脖子病。某日有其他地方嘅人嚟到，南岐當地居民就笑佢哋：「你班人條頸同我哋唔一樣，咁柒奇怪嘅！」
一班外來人就回答：「你哋條頸腫到凸起，有大脖子病，竟然唔去醫仲要覺得我哋條頸有問題？」
南岐居民繼續語帶不屑：「我哋成條村嘅人條頸都係咁，點解要醫？」
南岐當地居民始終都唔知道自己嘅醜陋。
其實所有freelance工作或者而家流行嘅Slash，接job時都係孤身作戰，大家都唔會有一個account department去back up，須知道有時唔止一個job，如果個個都無了期咁拖，真係好亂同好難去follow up，每一個付出過努力同汗水嘅人都唔應該得到呢個結果，呢樣嘢同等唔等錢用完全無關。
對於呢位求職者嘅處境，我感受好深，原來有同業被拖糧會視之為應份，原來被拖糧想追討係錯，咁樣同南岐居民有咩分別？同你上街遊行之後，其他香港人話你改變唔到就唔好咁多事有咩分別？難道我哋呢個地方已經人人患咗大脖子病？
想幫自己爭取權益嘅人無立足之地，誰大誰惡誰正確嘅人繼續橫行無忌，原來就係所謂嘅行業風氣。