公司有個同事日日怨呢樣怨嗰樣，今日就係怨公司冇提供免費私人紙巾，即係一盒盒擺喺自己枱頭用嗰啲，佢話以前間公司有，所以而家個老細好cheap。
真係唔好意思講，我返過咁多份工，好似冇一間係會派私人盒裝紙巾，最好嗰間都係要自己比錢訂，但就有員工超低價優惠，免費未試過，我打工都冇呢種命。
有時又聽到人哋間公司請旅行，如果唔計出差做嘢，純粹係請旅行，我都未遇過，但身邊好多朋友公司有呢個福利，又係嗰句，我打工冇呢種命。
不過冇免費私人盒裝紙巾只係我同事長嗟短嘆嘅其中一樣嘢，佢平時怨嘅唔止咁少，總之就日日將而家公司同以前公司比較。
因為佢做得耐過我，初初入嚟我都比佢嚇親，成日諗呢間公司真係咁衰？係咪我揀錯？後來先發現佢性格係咁，但真係有其他新人會畀佢影響，齊齊發放負能量。
有次我忍唔住問：「你講到以前公司咁好，點解又要走嚟呢間公司做？」佢帶我遊咗個花園就冇正面回答，後來我聽行家講，好似係呃個求職者去見工，明明係hotline cs，昆人話係clerk，結果個求職者去到大吵大鬧，個客都覺得要有碗話碗，唔應該呃人上嚟見，兩邊一齊投訴，結果佢就比公司炒咗。
不過呢啲都係江湖傳聞，唔一定係真，我只係想講成日同舊公司比較係冇意思，我而家份headhunt對比以前做記者都有好有壞，喺報館工作開心好多，自由好多，發揮創意嘅機會多好多，不過代價就係福利近乎零，加完人工同冇加完全冇分別，8號風球一樣要返工，所以我接受而家headhunt份工嘅優點，亦要克服而家份工嘅缺點，人同埋工作都一樣，根本冇百份百完美。
對現況唔滿意，一直想當年，有冇試過諗真啲，其實所謂嘅過去都唔係好好，佢最大嘅好只係已經過去，唔會變得更差，僅此而已。
向前看，努力做好，咁先會搵到人生，事業，仲有情緒嘅出路，只係掛住回望，好容易會畀負能量淹沒你。