即刻請你!自己人!

我係車路士迷,呢個經理應該唔會請我。

=====

搵食係咁㗎啦!去咗interview,一入房就見到經理著恤衫打呔,不過外套係熱刺jacket,柒到……我都睇波,所以忍唔住望咗佢件jacket幾秒。

經理:「熱刺1984年 Cup Final Track Jacket,香港冇得賣,上官網訂,你睇唔睇波?英超鍾意邊隊呀?」

我:「梗係鍾意熱刺啦!加里夫巴利嘅時候已經鍾意,加埋莫迪歷勁到癲!」

經理:「識貨!我年紀大過你,波齡深過你,奇連士文嗰陣已經鍾意熱刺。」

我:「嘩!你仲識貨,我超鍾意孫興民呀!」

跟住我哋用咗足足45分鐘傾熱刺,講講下奇連士文講蘇甘保,講講下蘇甘保講雲達華治,講講下雲達華治又講返哈利卡尼,全程未傾過份工、冇自我介紹、冇考英文,所有關於工作嘅嘅嘢全部冇傾。

最後經理話:「好少人鍾意熱刺,個個唔係曼聯、利物浦就車路士,即刻請你!以後多個熱刺球迷講波,你expected salary填26,000?呢個位可以出到28,000㗎,就28,000啦,自己人!」

佢真係請咗我!

其實……我係阿仙奴球迷,即係熱刺嘅死對頭,早兩晚熱刺主場輸畀阿仙奴,個經理同我爆晒粗,又話輸得唔抵乜乜物物,冇計啦,都要附和下佢,搵食啫,犯法呀?

好人好姐點會鍾意熱刺呀!

為咗份工對唔住阿仙奴都要做一次,我扮熱刺迷唔緊要,最緊要熱刺真實中輸畀阿仙奴啫!

搵食係咁㗎啦!

error: