公司遲出糧 老公代墊支:我嬲到想離婚

我老公個老細成日遲出糧,唔係唔出,係次次都拖最少一個星期先出,最過份一次係廿幾號先出糧,仲要欠供強積金,點解我會咁清楚?因為我之前就係同老公同一間公司,我哋係舊同事,喺嗰度相識,後來結咗婚我就冇做。

有同事曾經告發過老細唔供強積金,警告完,老細又交返,然後耐唔耐又遲供,基本上睇唔過眼嘅同事,或者係有份告發嘅同事都走得七七八八,包括我,而頂硬上繼續做嘅人就留低,其中一分子就係我老公,佢話自己年紀大好難轉,邊做邊搵喎,呢句都講咗3年喇。

佢唔走我都冇辦法,但係最近竟然畀我知道佢代老細「埋單」,私底下走去出糧畀幾個下屬,呢單嘢係源於佢有卡數未找,銀行寄咗封追數信過嚟先至發現,我嬲到著晒火,你搞咩呀!公司習慣性拖糧仲繼續做都算,你仲代個仆街老細出糧?

最初我以為佢洗大咗先冇錢交卡數,又或者係個老細拖糧拖得愈嚟愈過份,後來chok多兩chok佢先至和盤托出,原來有個下屬話冇錢交租,然後佢驚人哋冇屋住被迫遷,跟住就私人拎咗筆錢出嚟畀人解燃眉之急,叫個下屬出糧之後還畀佢。

單嘢揚咗之後,佢另一個下屬又有樣學樣,話家人有事等唔到老細出糧,希望我老公可以借埋畀佢,一樣係公司出糧就還,其實我老公有4個下屬,當中3個都係咁樣,得一個話唔使出住先,咁樣會唔會太過份呀?

佢呢3個下屬嘅人工分別係25,000、27,500、31,000,原來我老公呢個行為已經持續咗半年,即係每個月頭自己未有糧出,已經要幫公司墊支83,500畀人。

係!冇錯!佢3個下屬一出糧係有畀返佢,但係你幫公司出住糧先會唔會做多咗呀?

我哋兩公婆因為呢件事鬧到火紅火綠,最把火係佢12月底竟然仲代公司出住雙糧畀3個下屬,即係83,500 x 2,16萬7呀大佬!唔怪得會連萬幾蚊卡數都找唔到,搞到要收銀行追數信啦,再問之下,發現我哋兩公婆住緊嗰度都未交租。

鬧還鬧,我都要拎自己錢出嚟交咗租先,打畀業主傾,先知我老公近半年又係個個月都遲,當時真係隔住個電話同業主講嘢都覺得尷尬,你老細冇聲譽,都唔好影響到自己冇聲譽吖嘛,老細拖你,你拖人,你做嘅嘢咪同個仆街老細一樣囉!

老公成日執住一個point,係嗰3個下屬一收到公司份糧就會自動自覺過返錢畀佢,但係你明唔明有啲數唔係咁計,正如卡數可能你最終都還到,但遲還會計息,條數已經唔同咗,你仲影響埋個人嘅信貸評級,所以唔係有in有out就冇事㗎!

我敬重老公咁有義氣,如果佢唔係我老公,我只係打份工而有個咁嘅上司,一定會覺得好好,但係歸根究底係個老細有問題,係間公司有問題,代出糧畀下屬係治標唔治本,叫佢搵過份工又踢極都唔肯郁,成日話咁老冇人請,你試咗先啦!

一單還一單,唔係唔畀你有義氣,不過一間公司拖糧,真係要個員工代出糧畀其他人咩?我唔知個仆街老細知唔知道,如果知道仲大鑊,嘩,請呢條友返嚟仲可以代出住糧先喎,老虎蟹都拖多陣啦!

幫公司出糧畀下屬真係over咗喇,你話我呢個老婆諗法自私都好,超級英雄呀?每個人都有自己嘅難題同埋包袱㗎啦!你救得幾多個先?你都自身難保喎!

我知道公司咩事,自己都有做part time幫補,已經冇收老公家用,亦唔係計較我要用自己錢交租同幫你找卡數,不過你英雄主義走去墊支畀下屬,我呢個做老婆嘅咪又係牽連落去要一齊「埋單」!

仲有,經驗話畀我知,公司咁樣搞落去始終有爛尾嘅一日,當年我未走都已經話大家總有一次要集體上勞工處,呢個老細一係清盤一係走佬,我老公而家做壞規矩個個月墊支8萬幾蚊畀3個下屬(上個月仲要學人墊支埋雙糧),將來公司搞唔掂,呢筆數你點追?

本身你追自己份糧就夠,到時你追埋墊支畀下屬啲錢呀?你咁做都唔係正常程序,又冇單冇據,勞工處都幫唔到你,新年流流搞啲咁嘅嘢,日日家嘈屋閉,我真係嬲到想離婚!

error: