有個男同事唔識點形容，佢做嘢係冇問題嘅，仲可以算做快靚正，但係每次同佢一齊行出去食lunch（或者放工一齊走）都覺得好失禮，唔係咩寒酸同樣衰，而係佢好冇禮貌，成日手指指討論人，睇女仔又睇到回晒頭目不轉睛。
食晏係最明顯，我哋行入餐廳嘅時候見到有枱好多女仔，呢位男同事坐低之後係會回頭望，唔緊要，睇靚女好正常，我都係仔，唔係扮清高，而係個男同事回頭望得好揚，而且唔係望一秒兩秒，係望成分鐘，望到人哋成枱都留意。
食一次晏係咁，食兩次晏又係咁，除咗睇女個樣極度猥瑣同咸濕之外，佢講嘢仲會肆無忌憚，有次lunch佢又係見到隔籬枱有女，望咗分幾兩分鐘咁耐，望到人哋好唔舒服，咁都未完，呢位男同事望完仲擰過嚟同我哋講：「嘩你睇下，條女幾正喎，頭先企起身見唔見到呀，對腳幾鬼長！」
我想講呢，隔籬枱同我哋應該得幾cm距離，你都知香港嘅食肆係幾咁迫夾㗎啦，佢仲要唔係細細聲講喎，我好肯定人哋成張枱都聽到囉！
有個senior同事曾經出聲話佢，叫佢唔好咁樣望人，好冇禮貌之餘，我哋成班同事都會好尷尬，呢位男同事仲要聲大大回應：「驚咩啫！望即係畀面佢，唔靚都唔望啦！我而家係欣賞佢喎，又唔見我望佢側邊件豬扒！」
唉，真係好樣衰呀，同呢位男同事出去食飯完全有失身份，既然有人開聲講咗佢都唔聽，改變唔到人就唯有改變自己—–我之後唔再同佢去食lunch！不過有一次避唔到，就係放工嘅時候同呢位男同事同路，佢喺後面叫住我。
沿路行出去巴士站，佢把口依然唔收：「你睇下條女，個波咁撚大嘅，你估佢係咪裝假狗？」
我：「唔好咁樣望人啦，人哋見到㗎！」
「超！怕咩？佢咁大個波都畀男人望慣啦！佢側邊條仔今晚就飽喇，淨係飲奶奶都可以飲成晚。」
怕Q咗佢，去到轉角位我話醒起要買啲嘢，即刻行第二條路走，寧願搭車迂迴啲，點知佢都係要加多句：「唔係偷偷地返轉頭跟住個大波妹呀？小心喎，人哋條仔喺度呀！」頂你個肺，講嘢又大聲，條街有幾個人都望咗我一眼。
卒之有一日，幾個同事食完lunch之後返嚟話我聽：「你頭先冇一齊食飯真係走寶，James畀人摑咗一巴！」
我：「咁大鑊？」
「頭先佢指住隔籬枱條女話人大波，跟住個女人有兩個friend，一男一女，睇落去斯斯文文，點知原來好惡，有個女仔friend問佢講咩，James又真係好意思重複一次話人大波，然後人哋一巴星落去，啪一聲幾應呀！」
我：「咁James點呀？佢平時聲大大，一定嘈㗎喎！」
「嘈乜鬼吖，人哋同枱個男仔成個杜德智咁，好Q大隻㗎！人哋一企起身就見到爆晒肌，James聲都唔敢聲啦！」
Sorry我本身唔識杜德智，上網search一search，明晒！
我：「咁James畀人摑完一巴就算呀？唔似佢喎！」
「笠晒水啦，我估如果人哋得兩個女仔，佢都仲會牙斬斬，James瘦到條藤咁，杜德智如果出手一拳就打到佢趴街啦！」
然後之前叫過佢收斂嗰位senior插嘴：「難為我哋呀！James畀人摑完成碌柒咁坐喺度，我哋仲要幫佢同人講sorry，成間餐廳啲人望住晒，以後唔使去嗰度食，呢排我叫外賣喇，樣衰呀！」
其實都估到James遲早一日畀人打，我覺得今次受一巴掌已經好輕手，就算傳說中嗰位杜德智打佢都仲係太小事，梗有一次係James得罪啲仲惡嘅人，然後轉頭畀啲刀手之類伏擊，真係死咗都唔好問點解，我同時都好奇怪James成30歲人，活咗30年點解嚟到今日先畀人打？
聽返班同事講，James而家出去食晏成個人靜晒，首先我好佩服仲有人肯同佢食晏，其次係畀人喺大庭廣眾摑一巴咁瘀，梗係靜啦！希望佢以後咪再咁口臭，否則肯定又會再出事。