「如果你唔打算令我著上婚紗，咁你而家就唔好除我件衫。」呢兩句說話由Charlotte口中講出嚟只需要兩秒，但我個腦就飄咗去好遙遠嘅未來，結婚喎，即係喺office公開戀情、見家長、屋企多咗一個人……然後我將唔規矩嘅手縮開，成個人喺梳化坐返直。
Charlotte：「你諗清楚先答我，之前個男朋友已經浪費咗我9年，其實我仲好想生BB，我由28歲等到佢37歲，女人最黃金嘅時間都過咗，我今年38歲喇，我玩唔起呀，如果唔係認真，不如唔好開始。」
其實Charlotte所講嘅每一個字我都明，有自己家庭唔止係好多女士嘅夢想，就算係男士都一樣，而且Charlotte仲講到明自己想生小朋友，如果上一個男朋友磋跎咗佢9年都冇修成正果，而家真係再嘥唔起時間。
如果唔計閃婚呢類例子，有時我都會諗，拍一次拖由蘊釀、正式一齊、磨合、談婚論嫁，由於雙方都要時間相處同了解，呢個過程standard 2至3年啦，拍錯兩三次拖咁就冇咗6至9年，所以去到某個年紀之後，以結婚為大前提而決定展開一段感情都好合理。
不過每個人對幸福同婚姻嘅定義都唔一樣，唔知係咪個人諗法又或者年齡問題，我覺得拍拖點會包結婚生仔㗎？唔係應該感覺行先咩？假如佢只係為咗結婚先同我一齊，咁其實同任何人拍拖都冇分別，出發點根本唔係特別鍾意我。
我咁諗係咪錯呢？
自從嗰一晚之後，Charlotte冇再上我屋企煮飯仔，大家偶爾仲會WhatsApp，不過都係講啲無謂嘢為主，期間我有主動請佢去我度食飯，甚至係約出街，但Charlotte一一拒絕。
我哋嘅距離愈拉愈遠，問心我係鍾意佢，只係講到結婚……我又的確未諗過，終於有一次我鼓起勇氣打message問：「不如我哋試下正式拍拖先吖！」
Charlotte回覆得冷靜又理性：「唔啦，我唔想嘥時間呀，我想定落嚟。」
我：「但係你想定落嚟，同我哋正式拍拖係冇抵觸㗎喎，唔真正喺埋一齊，又點知大家適唔適合組織家庭呢？」
Charlotte：「🤔」呢個emoji就係佢當時嘅回覆，然後，就沒有然後了。
如此這般過多三個月，我收到Charlotte嘅喜帖，不過唔係由Charlotte親手畀我……
Morris：「到時早啲到，安排咗我哋department啲人坐埋一枱㗎喇，晏晝都有觀禮儀式，有啲cocktail同小食，如果鍾意可以嚟睇㗎！」
Morris係我部門嘅同事，佢仲大我一歲，不過都細過Charlotte 7年，4個月前先入職，我好肯定佢同Charlotte之前係唔認識，我畀盡你第一日返工就撻著，到而家決定擺酒咪最多4個月！
我上司份人比較口多，佢接過喜帖嘅時候兜口兜面笑住問Morris：「你個衰仔吖！請你返嚟溝女㗎？上個月先過試用期，今個月你娶同事？仲要係我哋office其中一個靚女，快啲講，幾時開始㗎！早知唔畀你過試用期啦，又一個女神封盤。」
Morris：「唔好笑我啦，大佬你唔係結咗婚咩？」我哋會叫上司做大佬。
上司：「我係結咗婚，不過都唔抵得靚女同事有著落，講笑啫！嗱！今晚你請食飯，講晒成個過程出嚟，坦白從寬。」
結果我哋成個部門放工真係去咗食飯，慢慢聽Morris講佢係點樣同Charlotte開始。
Morris：「佢煮餸真係好好食㗎！特別係椒鹽瀨尿蝦。」
聽住Morris講佢同Charlotte嘅愛情故事，其他幾個部門同事聽到依嘩鬼叫，唯獨我好冷靜。
上司：「做咩你成晚唔講嘢又唔食嘢？唔抵得Morris娶到Charlotte呀？努力啲啦！Eunice同Catherine佢哋都未有仔㗎！」
我：「痴線，點會唔抵得呀，我替Morris開心咋！」
Morris：「多謝！」
從Morris講多謝嘅語氣同表情可以睇得出，佢完全係唔知我同Charlotte曾經走得咁近，咁又係嘅，正統嚟講我同Charlotte係從未拍過拖，而且Morris唔知仲好，我同佢係同一個department，知道咪盞大家尷尬。
另外，我成餐飯冇學佢哋不斷依嘩鬼叫，係因為Morris講出嚟嘅故事，根本同我個故事一模一樣，Charlotte知道佢一個人住，就提議教Morris煮返幾味小菜，然後兩個人就漸行漸近，Charlotte話自己想結婚，跟住就……
終於搵到一個point係唔同，Morris覺得自己都處於適婚年紀，又係好鍾意小朋友，所以雙方就一拍即合。
呢樣嘢正正係我最初嘅顧慮，兩情相悅，拍到一個位如果想組織家庭自然就會諗結婚，我唔係想要一段傾好晒一定要結婚先至開始嘅感情，如果係咁，Charlotte根本唔一定要我，佢只要一個適婚又single嘅男人，其實任何人都可以取代我。
而家，Morris就係取代咗我，但你問我覺唔覺得Charlotte真係鍾意Morris，我真心認為唔鍾意，當佢真係鍾意，呢份愛又有幾深呢？Morris先入嚟4個月，頭一個月仲疊住我同Charlotte曖曖昧昧嘅時間，咁樣展開嘅感情同婚姻真係幸福咩？
Anyway，人哋結婚就唔好搞事喇，無謂將啲問題愈搞愈複雜，出席佢哋嘅婚禮，睇住Charlotte披起嫁衣，新郎不是我，感覺係有啲酸，同時又好奇怪，多多少少會諗起幾個月前我仲係屋企張梳化同Charlotte激吻，幾個月後過去，佢做咗我另一位同事個老婆。
又過多大半年，Charlotte同Morris宣布有喜，公司急急忙忙終於請返個Manager，等Charlotte唔使再以Assistant Manager身份做埋「懸空阿姐」嘅職位，同時都要準備畀Charlotte之後放產假。
生完BB之後嘅Charlotte仍然keep得好好，明眼人都睇得出Morris好錫佢，每日喺office撞見Charlotte嘅時候，我同佢都會平常地打招呼，就好似嗰幾個月嘅事冇發生過一樣。
明顯地，我同Charlotte對幸福嘅定義係唔一樣，我需要好愛一個人先考慮結婚，但佢可以結咗婚先慢慢愛呢個人，而Charlotte婚後亦都好一心一意工作同埋照顧家庭，雖然雙方嘅出發點同埋目標都唔同，不過我相信Charlotte已經搵到屬於自己嘅幸福，希望佢同Morris白頭到老，小朋友又快高長大啦！（完）