可能係因為爸爸做生意，所以家人好支持我創業，我基本上每次打工都係為儲錢開公司，前後做過3份工，換言之開過3間公司，慶幸而家總算安定落嚟，叫做搵到餐安樂茶飯食，創業規模由最初得4個員工到而家有廿幾人，賺過，蝕過，咩都試過。
我爸爸搞消防用品，80年代已經開咗公司，喺我眼中佢係成功嘅，雖然有啲嘢好難量化，但至少佢喺90年代嘅時候上到樓，供到我去美國讀書，個人認為算唔簡單，畢竟爸爸小學都未畢業，真係連A至Z都數唔齊，最大關鍵係嗰陣時創業的確比而家容易，當時好多嘢未普及，唔似呢一代咁，上網就可以知天下事，到後來資訊愈嚟愈發達同埋流通，你會見到啲生意三兩下手勢就畀人複製，一大班人分一個餅仔當然難做。
去到千禧世代，叻人多的是，好老土嘅一句說話——周街都係大學生，學歷係入場劵，唔保證你一定搵到錢，有諗頭嘅人好多，競爭好大，有時你諗到一條好橋，大財團揼水倒模複製可以做得比你更大更好，而家要突圍絕對唔容易。
唔容易嘅事由你做老闆第一日已經會感受到，就係幫公司開戶口，基於近年洗黑錢愈嚟愈普遍，銀行為免被罰巨款，批公司戶口謹慎咗好多，如果你係白紙一張創業，好多大銀行係唔會批你，有啲就要求為數不少嘅存款先會考慮，奉勸先開二、三線銀行，最緊要有個account畀客收錢先，當你生意愈做愈大，到時有盤靚仔嘅數先再轉都未遲。
我第一次創業係開Pre-Wedding公司，除咗由細到大都鍾意影相，仲因為一次機緣巧合，當時同兩個大學同學去克羅地亞旅行，佢哋係情侶嚟嘅，喺薩格勒布唔知忽起邊條筋突然話要結婚，癲到即刻喺當地搵婚紗，叫我呢個電燈膽幫手影Pre-Wedding，個女仔話結婚已經要用好多錢，反正克羅地亞個景咁靚，不如即興影啦！因為我哋太friend喇，我二話不說就陪佢哋瘋狂一次，個女仔自己化妝，最後影出嚟估唔到咁靚，佢兩個Big Day亦係用呢輯相，幾多好評㗎，咁就促使我之後開咗Pre-Wedding公司喇。
其實Pre-Wedding呢壇生意係賺嘅，創業之時冇肺炎，世界好正常，後來點解唔做呢？主要原因係太辛苦，冇晒私人時間同生活，須知道香港地大家都要搵食，閒日當然有客人約影相啦，不過星期六日同公眾假期就一定最旺場，做Pre-Wedding嗰幾年賺到錢，但冇咗生活同埋健康，影一次相閒閒地6至8個鐘，後期仲有好多功夫要做，三餐當一餐食、全日食一個麵包、連續幾晚開通宵嘅情況經常發生，其實準新郎準新娘影成日相都攰啦，我仲要搞氣氛同lead住佢哋，器材同道具亦唔嘢少，講攰嘅程度絕對比準新人有過之而無不及，仲要每對客人影一日咋喎，我差唔多日日重複咁做，嗰排真係積勞成疾，廿幾歲仔有勁多白頭髮，我自己都驚。
後來休息咗一段時間出返去打工，我又開咗間Trading，係咪九唔搭八？因為我打嘅第二份工係一間貿易公司，從中學到好多嘢，識到好多業內嘅朋友，貨源都好齊，結果就決定自立門戶，但今次嘅經驗係失敗，初時係OK，後來衰急進過度擴張業務，以為做過老闆就一理通馬國明，其實唔同嘅行業同埋生意都有各自嘅學問，不過都綜合咗一啲心得同大家分享。
1）唔好太心急擴張，要留啲生錢畀自己，賺到錢買樓又好，投資下藍籌都好，凡事留一手有個後著。
2）公司賺錢嘅時候盡量不變應萬變，唔好眼高手低開多幾瓣，搞生意終極目標都係賺錢，賺一個比你出去打工更好嘅回報，某程度上「老闆」都係一份職業。
3）細公司靠嘅係老闆自身能力，唔好寄望員工，員工嘅角度只係打份工，你執咗佢就再搵第二份，所以老闆事事要親力親為。
4）樣樣都要識啲，舉例就算你公司有會計，自己都要知道當中有咩原理同規則。
5）對住客要「捉大放細」，生意呢樣嘢重質唔重量，優質大客先係細公司重要收入來源。
6）絕對唔好借錢去發展公司業務。
以上全部係血的教訓，高峰期我由銀行有70幾萬結餘（大部分係做Pre-Wedding嘅時候賺落），到後來做Trading倒蝕要還20萬貸款。
再出嚟打工還債兼儲咗另一筆新本錢，我又開公司喇，都係做Trading，因為唔想浪費之前嘅經驗、人脈，仲有資源，吸收咗失敗嘅經驗，我謹慎咗好多，加上年紀漸大，思想比以前成熟，識得戒急用忍，唔會心高氣傲或者一時衝動，我個仔都4歲喇，唔顧自己都顧下屋企吖嘛。
唔敢講而家發展得好好，但起碼生意穩定，目前請咗廿幾個員工，其實我唔使發大達，搵到食唔使為三餐頭痕，唔使為錢去求人就夠㗎喇，賺多賺少睇你自己心態㗎啫。
做咗咁多年生意，有成功有失敗，最心酸同埋難忘嘅經歷唔係戶口有70萬變成負20萬，反而係做Pre-Wedding嗰陣發生嘅一件事。
好記得係閒日，當日本來幫一對準新人影相，先影室內，個女仔準時到達，但新郎遲遲未到，我哋幫佢化好晒妝換晒衫都未見男方出現，問多兩問先知佢哋已經分手，但個女仔唔心息，苦苦哀求復合，仲話會如期過嚟我哋度影婚紗相，叫個男仔無論如何都要到，結果當然落空。
準新娘由最初冇表情，到後來喊到歇斯底里，我同同事都唔識得安慰，唔知道佢哋當中仲有啲乜嘢故事，但嗰一刻真係好心酸，上年我突然再收到呢個女仔嘅電話，佢嘲諷自己終於嫁得出，想我幫佢影Pre-Wedding，又問記唔記得佢，點會唔記得吖，聽得出佢開朗咗好多，應該搵到個識得珍惜佢嘅人喇，我當時真係好開心，送上祝福之餘同佢講自己已經轉行，其實邊個影都唔重要，最重要係佢得到幸福。
感情同埋做生意都係一樣，跌親當攞個經驗，最緊要唔好絕望同埋放棄，寶物永遠沉歸底，美好嘅事遲到總好過冇到，有時遲啲到，反而啱啱好，因為你已經有足夠嘅經驗同埋智慧去處理吖嘛！
PS：其實新郎冇出現單嘢我曾經投過稿，應該係幾年前，可惜好似冇登出，定係我忘記咗呢？😂不過而家登仲好，起碼我知道個女仔而家幸福。