公司曾經請過一位超級大話王，成班同事初時好憎佢，不過發展到後來已經當茶餘飯後嘅笑話，因為佢吹水嘅誇張程度已經超乎想像，如果同佢認真，咁你就真係輸了。
當初點解要請個大話精？咁呢樣嘢就要問HR喇，但你又唔怪得佢見工可以過五關斬六將，畢竟interview係一場戲，演技精湛的話，最後受聘又唔出奇嘅。仲記得佢返工第一日已經遲大到，呢位叫阿威嘅同事話自己搭嗰㗎巴士撞車喎，香港地有交通意外好正常，不過做落之後你會發現佢每個月平均撞兩次車，即係一年撞24次，點夠你玩呀！
做嘢甩碌唔緊要，每個人都有做錯嘢嘅時候，不過阿威簡直係侮辱科技嘅進步，漏send email畀同事或者畀客永遠唔會承認，次次都話send咗，頼個電郵有問題，其實email點會冇draft同record吖，email漏咗attachment又係咁，一次半次就話信你啫，鑊鑊都係咁點搞呀？
最正係有一次出去見客傾唔成單deal，因為張單係regular，搵清潔阿姐去都傾得成嗰隻，阿威衰咗竟然話個客性騷擾佢，阿哥呀，個客我哋都見過，靚女嚟㗎，你咩身世呀？點會有咁多不可思疑嘅奇情故事發生喺你身上㗎？後來有同事打探過，原來係阿威遲大到（又係衰遲到），個客等得唔耐煩走咗，之後阿威打去say sorry同埋想喺電話就咁傾，個客發脾氣決定唔簽。
以上都係工作方面嘅大話，其他濕濕碎碎話某明星係佢朋友呀，銀行戶口有一球呀，中過幾次三T嗰啲就廢事提喇，最浮誇係條友仔辭職咁小事都要作個超級大話，阿威話自己有末期肝癌喎！
雖然阿威平時吹水成癮 ，但你講到咁慘始終都令唔少同事震驚同埋傷感，包括我，曾經有一段時間為咗呢件事好唔開心，唯一慶幸阿威冇用肝癌呢樣嘢騙取醫藥費，佢淨係有一個小小嘅請求，就係提早last day，原因係身體愈嚟愈虛弱，已經冇精神返工，咁佢之前都請過兩日病假話去醫院檢查，聽落又好連貫既。
老細本身想炒佢好耐，聽到有肝癌都唔信，但既然阿威要求早走，老細亦成人之美，畀佢即時離職好好「養病」，當時公司有好多講法，有人信阿威，理據係冇理由用絕症呢樣嘢咒詛自己，另一班人就偏向唔相信，因為阿威嘅大話實在太多喇，仲有一班人覺得係唔係都冇所謂，最緊要快啲走唔好阻住個地球轉，請個新人返嚟pick up啲嘢仲快。
其實隔咗幾個月之後，已經有人喺街撞過阿威，但撞見嗰位同事本身同佢唔熟，故此冇上前打招呼，雖然香港地咁細，撞到同事或者熟人唔出奇，不過問題係阿威當日話自己得返幾個月命，佢聲稱醫生講咗頂盡捱到7月，當時係4月啱啱出晒雙糧同花紅，成套《新不了情》嘅橋段咁，冇奶油吖，明明劉青雲買完砵仔糕返去，袁詠儀就香咗㗎啦，因乜解救阿威呢位神父死極都死唔去㗎呢？
數數手指，阿威已經走咗3年，我意思係離開咗公司3年，佢當年個直屬上司早幾日先喺尖沙咀K11撞到阿威，不知幾鬼生猛，仲拖住條女，戴口罩都feel到佢哋好開心，聽返佢直屬上司點講：「咁都畀我撞到，咪行埋去問佢個癌症係咪醫返好囉！」
我：「咁勇嘅你？」
「純粹關心舊同事啫！」
我：「阿威點答呀？」
「佢好錯愕，我估佢有一秒諗過否認自己係阿威，始終而家人人戴口罩，但有條女喺側邊，我又叫得出阿威，冇理由喺條女面前話我認錯人吖，咁我就再問多次個末期肝癌係咪醫好咗？阿威口窒窒話係，佢條女當堂瞳孔放大。」
我：「咁可能佢自己匿埋醫返好呢！」
「一定係咁啦！末期又唔代表醫唔好既，好多人最後都戰勝病魔，我係嬲佢嗰陣明明話得返3個月命，醫返好又唔同我哋講聲啫！」
重組案情再推測，阿威走之前請過兩日假應該係去見工，咁份新工又想佢早啲返，所以當年就用呢個原因提早quit，連人工都唔使賠，其實唔使咁㗎，有咩咪照直講囉，何必作到咁大呢？冇錯，末期唔代表冇得醫，不過加埋平時啲大話累積，誠信破晒產真係好難信佢囉！
最後先諗起一件事，但已經寫完喇，所以我唔插返上去，又係約咗客，又係大遲到，嗰次我同老細同個客喺cafe傾嘢，阿威應該遲咗45分鐘左右先嚟到，佢話途中見到有個阿婆比人搶嘢，所以去咗追賊……
30幾度汗都冇滴，一定信你啦！直情要唱返首～～生命作賭注，留下了「職場」故事～～（記得用成龍腔），老細由嗰次開始已經唔鍾意阿威，因為遲到冇問題，打個電話嚟交代就得，你喺個客面前話幫阿婆捉賊，氣都冇喘，連個客都唔知畀咩反應，呢下先樣衰吖嘛！