只有中三學歷嘅我好細個就入行學廚，當時唔係為興趣，純粹為生活為搵食，日子有功之下叫做煮得唔錯，而且我冇乜嗜好，放假嘅日子都留喺屋企，所以有啲錢剩。
做廚師雖然辛苦，但勝在人工比起寫字樓高（我以自己中三學歷水平去計，當然唔係同高學歷水平人士比較），所以我好早就立志儲嚿錢開茶餐廳，典型日頭賣早餐常餐，夜晚就做小菜嗰種，慶幸當時嘅女朋友，亦即係而家嘅老婆冇嫌我掛住創業，連一般娛樂都好少，我同佢係喺之前間酒樓做嘢認識嘅。
開茶記頭半年都係死捱，好多人以為我升格做老闆就飛黃騰達，其實邊有咁容易吖，朝早六點起身，夜晚做到十一二點收舖，仲要執頭執尾呢啲慘情位又冇人知㗎啫，始終小本經營請唔到咁多人，我負責煮，樓面靠班伙計，收銀同埋數就靠我老婆，勉勉強強搵到食，而且回本真係用咗一段時間。
人人都以為我做老闆做生意就好自由，可以畀氣人受，但我好肯定咁同你講，做生意受嘅氣比以前返工仲多，舉個例，舖頭個業主年年都加租，其實佢擺到明係想迫我走，聽聞有連鎖式集團對個舖位有興趣，仲肯畀多啲租，業主當然想盡快解決我啦，每次傾租約都傾好耐，每次都要低聲下氣，嗰種滋味又有幾多人體諒同埋經歷過吖。
幾乎年中無休，做足365日，我係鐵人啫，冇理由要另一半咁樣捱法㗎嘛，何況老婆有咗BB之後，我希望佢可以休息多啲，始終餐廳人多容易撞親，食肆亦難免會有人倒瀉湯倒瀉水倒瀉汁，佢大住個肚我真係唔放心。
舖頭少咗老婆，叫咗個由開業已經入嚟做嘅伙記睇數，另外請返個樓面補充人手，呢位女侍應叫阿珍，返工頭一個月正常嘅，但之後愈做愈差，鬧客、失蹤唔返工、送去對面街嘅外賣送咗一個半鐘、遲到早退，仲有同其他樓面伙記嘈交乜都齊，真係好難搞。
阿珍落單嘅時候可以完全唔同個客講一句嘢，平時你去茶餐廳叫嘢食，我諗最差最差個樓面都會問一句「食咩」，但係阿珍完全冇，個客叫嘢食亦都唔會覆單，人哋叫完更加唔會講任何嘢，連一個「好」字都唔會講，我本身唔係太執着，始終呢間只係茶餐廳，但最慘係啲單落錯晒，星洲炒米變乾炒牛河，凍奶茶變凍檸茶，個客問佢拎餐具拎紙巾一去冇回頭，明明見到有人舉手想嗌嘢都可以視而不見。
忍無可忍之下我真係冇辦法再留佢，茶餐廳係我嘅心血，唔想畀一粒老鼠屎整臭口碑，必須強調我全程好聲好氣，而且跟足法例賠償，反而係其他伙計覺得我太好脾氣，其實我唔係好脾氣，只係想好嚟好去啫，我都打過工，明白打工仔嘅感受，就算阿珍做得幾差都好，唔啱講句bye bye咪得囉，唔使搞到氣氛咁僵或者令佢難受吖。
不過我太輕視阿珍喇，賠埋錢送佢走嘅時候，阿珍好唔忿氣，仲揚言會唱衰我間茶餐廳，我真係唔明點解有啲人明明自己做錯在先都竟然咁惡，本以為佢發洩執個尾彩，點知第二日已經嚟料，有人喺討論區話我間餐廳唔乾淨，內容包括用垃圾筒裝沙爹牛肉、廚房啲肉過晒期、侍應會吐口水落杯嘢飲裡面……以上根本完全冇發生過。
可能有人會話：「你係老闆，梗係話冇啦！」我想講嘅係，呢啲嘢冇相冇片，真係得一堆文字，咁會唔會太過份呀？之前有傳某果汁品牌採用爛生果榨汁，起碼有員工影晒相去證實吖，當年有人咁樣唱我嗰陣，真係連圖都冇張。
最吹佢唔漲係咩呀？網上嘅世界的確唔需要真相，人云亦云，有人咁講就當係，好記得當時呢個唱衰舖頭嘅post足足有幾版，討論熱度好高。
呢單嘢係其中一個熟客話畀我知，有另一個跟咗我好耐嘅樓面嬲到震，直接打去畀阿珍嘈，結果阿珍同佢講：「咁又點呀？你證實到係我講出去先算啦！」
網上世界唔止唔需要真相，仲唔需要真名。
事件甚至發酵到去Facebook，一個用假名兼冇相嘅Facebook account開一個post，好快就人人走嚟討伐，我忍唔住直接用真實Facebook去回應，轉個頭起埋我底，係咪我中三畢業讀得書少？點解啲人願意相信一個連真人相都唔敢擺嘅account，都唔相信我用真實身份走出嚟澄清？我唔明，到而家都唔明。
茶餐廳人客明顯少咗，而且阿珍仲未收手，幾乎每日都喺討論區同埋Facebook出post，當然唔排除佢叫埋啲朋友幫手，後來愈作愈過分，作到我老婆同個樓面有路，仲話當時我老婆大肚，個仔分分鐘唔係我嘅。
睇完之後個心好痛，其實我知老婆亦因為呢件事而有啲產後抑鬱，根本就係我老婆要生BB先至請多個樓面，阿珍同我老婆基本上冇乜接觸，點解要咁樣做呀？對你有咩好處呀？點解一個癲嘅人講一啲冇根據嘅言論，會有咁多人跟住相信㗎？
我愈係勇於喺網上反駁，辱罵嘅聲音反而愈嚟愈多，鬧我、鬧我老婆、鬧一個啱啱出世冇耐嘅BB、鬧我啲伙計，後來我先知道一個道理：你可以得罪忙人，佢冇時間同你計較，但千祈唔好得罪閒人，因為佢有大把時間同你周旋。
最風高浪急嘅時候，業主又加租喇，今次獅子開大口，帳面加我每月15萬，根本冇辦法再傾落去，最終選擇結業，我真係好唔捨得間餐廳，好唔捨得啲伙記，我以為可以養呢班員工一世，好抱歉，我做唔到。
經歷咗一陣子低潮，因為老婆同個仔嘅緣故，我決定重新振作，去咗間酒店做廚一直做到而家，雖然當年嘅創業夢已經碎晒，但目前人工算好好，至少唔會365日年中無休，亦養得起頭家。
餐廳冇咗，老婆反而開心咗輕鬆咗，早幾日我哋冇煮飯出去食，真係食得好自在，或者我天生就唔適合做生意，請人唔夠眼光，更加唔識管理，暫時冇再諗搞飲食喇，同埋諗返轉頭，嗰陣開茶記的確係有滿足感，但自己好少開懷地笑，太多嘢要煩，幾萬樣嘢要理，而家嘅生活都幾滿足吖，嚟緊做冬仲約咗班舊伙計上我屋企食飯，就算唔再係佢哋老闆，我都keep住同佢哋做朋友。