大約兩年前我做咗人生一個好重要嘅決定，就係辭工去創業，當時我覺得自己冇嘢可以輸，因為出嚟社會工作6年，人工依然突破唔到兩萬，間公司冇前景又唔重視員工，點努力都係徒然，所以我就用啲積蓄試下圓創業夢，趁後生蝕咗仲爬得返起身吖嘛。
我開嘅係情趣用品店，原因係……同男朋友試過去買，然後發覺價錢好貴，我哋兩個上網去睇絕對唔難搵到入貨渠道，不過買得情趣用品，某程度上都係一種衝動，用家角度係春宵一刻值千金，更多人係即興添，慢慢等供應商喺外國寄嚟就咩火都熄晒啦，而且有啲貨品都要訂購滿一個數量先會有入貨價，基於以上嘅原因，我同男朋友都認為情趣用品店有得做，結果就一人一半投資開咗間舖。
男朋友本身份工收入好穩定，佢犯不著學我一樣辭職去做，所以我就負責營運同睇舖，當請咗個sales咁樣自己出份糧畀自己，心口掛住個勇字就做咗老闆喇！
做呢壇生意難唔難？當中梗係有好多學問，不過情趣用品呢樣嘢有需要就會買，而且唔同嘅人有唔同要求，所以除咗價錢之外，入貨嘅眼光同埋了解客人心理都好重要，開業後嘅收入係ok嘅，絕對好過我繼續做之前份文職，所以最困擾自己嘅反而係心理關口，我唔敢同屋企人講，肯定阿爸阿媽唔會理解，初時唯有話轉咗份sales工，仲記得阿媽問過：「Sales？咩Sales？賣咩？」
我：「賣衫之嘛！」
其實都唔算講大話吖，我舖頭真係好多衫，水手服又有，護士裝又有，女僕、兔女郎、泳衣、OL衫、和服、旗袍乜都有，黑絲白絲魚網絲亦應有盡有，呢啲唔係衫咩？
講就咁講啫，始終都羞於啟齒，除咗最friend嗰一兩個女性朋友之外，其他friend我都冇透露，唔係個個都明白你㗎嘛，開業大約半年之後，自己嘅心理包袱先至慢慢放低，一來做慣咗，都係搵食啫，二來又真係搵到食，又冇犯法，正當生意怕咩呢，慢慢地就多咗同其他朋友講，佢哋都有幫襯呀，通常話買畀朋友做禮物，其實邊個用都唔緊要，用得開心就得喇。
後來搞埋online store，生意叫愈做愈好，但仍然有好多人會親臨門市購買，正如頭先所講，情趣用品多多少少係買一時衝動同埋「急切」需要，有啲客亦想見到件貨真身先決定畀錢嘅，個個都想試新嘢，個個都知道新嘢點用咩，所以日常都會解答唔少客人嘅問題。
再做多一排，我仲好勇咁同父母坦白，咁真係養得起自己，家用仲比多咗，佢哋都接受嘅。
每日喺舖頭見到唔同嘅客，有後生仔女，有老夫老妻，有宅男，有外表睇落好乖好純嘅女仔，男同男，女同女，見慣亦平常。
噁心嘅客人當然亦遇過，曾經有個男人買完隻飛機杯即刻開嚟用，你冇睇錯呀，真係除咗條褲即刻用，嚇到當時喺舖頭裡面嘅客雞飛狗走，最後要報警先搞得掂；又試過有客人喺inbox同埋WhatsApp查詢貨品時講埋啲變態同埋侮辱性說話，例如同我講賣得性玩具就應該包埋陪客試用……
不過要數開舖之後最難消化嘅一件事，應該係見到之前份工嘅上司拖住條女嚟買嘢，呢位前上司40幾歲，已婚，佢老婆都喺同一間公司做，換言之我都識嘅（同佢老婆零交情，因為唔同team唔熟），當然喺我辭工之後嘅日子有冇變化就唔知喇，起碼我last day嘅時候，佢兩公婆仲係十指緊扣返工放工嗰隻，公司裡面仲有唔少同事話佢哋係模範夫妻。
佢入嚟嘅時候我完全冇為意，始終戴住口罩，加上收銀呢邊係有個層架遮住視線，避免同客人有直接眼神接觸導致尷尬，我只會借助電腦mon個cctv系統留意有冇人偷嘢，後來佢行埋嚟畀錢，大家近距離對望，彼此都呆咗，呢位已婚前上司仲突然縮開本身搭住條女膊頭隻手，係你啦！話就話有口罩啫，不過我有3年半時間係佢下屬，真係得對眼都認到。
已婚前上司拖住嗰個女仔頂盡26至28歲，目測唔超過30歲，因為好嫩口，進退失據之際佢問有冇得用八達通，我答冇，結果都係要拎張信用卡出嚟，我扮冇事接過張卡，瞄下個名.…..仲唔係你Brixx Chxx！唔知點解我自己都好驚好緊張，硬住頭皮嗱嗱聲出單完成繼續扮冇事，尷尬到呢！
已婚前上司咩玩具都有買，震動棒、遙控震蛋、校服、手扣、口塞、皮鞭🙈，算啦唔好理人咁多嘢，呢張單個銀碼好大，強烈建議下次可以online訂購，我可以offer個discount code，另外奉勸一句，其實情趣用品同心愛嘅人玩先係最好，例如老婆，因為可以增進感情，令雙方嘅關係更加穩固吖嘛！
講返創業，我完全冇後悔踏出呢一步，因為收入同個人財政都比起以往打工時好咗，而且timing方面唔遲亦唔早，可能係疫情嘅緣故，太多人需要留喺香港搵節目，酒店搞staycation都賺到笑啦！加上人人戴口罩，買情趣用品嘅時候的確放膽咗，不過已婚前上司就真係冇辦法，共事3年半，應該戴埋面罩都認到。