等一個唔愛自己嘅人，就好似喺機場等船一樣。
Cherry係2017年8月入嚟公司做，印象咁深刻有兩個原因，第一，我係人事部負責請人嗰個，呢條女我有份in；第二，Cherry係靚女嘅，當年又未使戴口罩呢，face to face做個interview乜都一清二楚啦！
其實Cherry嚟見工當日已經引起話題，有啲平時冇乜兩句嘅男同事都走嚟打探，行開啦！同你好熟咩！仲有啲唔知頭唔知路嘅人叫我：「請佢！請佢！」痴孖根，人哋in咩position都唔知，行埋嚟加意見叫我請佢，有冇病呀？就算請都唔係我做最後決定啦，department head話事㗎嘛，有冇常識㗎？
然後department head見完之後真係同我講：「請佢吖！」我話之後仲有兩個candidate會上嚟interview喎，個department head又再repeat：「請佢吖！」屌，有冇第二句呀？Anyway，Cherry最後都入咗嚟做。
憑住精緻嘅五官同埋標準靚身型，Cherry好快就俘虜咗唔少男同事嘅心，而我呢啲有家室嘅男人就只能遠觀，無謂搞咁多嘢啦！我講唔好搞咁多嘢嘅意思係－－－Cherry填form嘅時候，我已經知道佢已婚，雖然呢位靚女得25歲，咁但係早婚好常見嘅，冇咩咁出奇吖。
確實有幾多條仔對Cherry有意思我就唔清楚，但係當中有個叫阿Rick嘅男同事肯定最積極，佢每一日朝頭早都會買兩份早餐，一份自己食，一份畀Cherry食，十分張揚，因為Cherry係例遲，一般9:30至9:45返到公司，所以人人路過都會見到Cherry枱面有份早餐，有時係7仔三文治，有時係麥記熱香餅或者早晨全餐，有時係粥加油炸鬼，有時就係Pret A Manger牛角包。
我最初覺得阿Rick張揚，但其實觀察耐咗，發現Rick根本係故意畀人知，等其他想埋Cherry身嘅男同事自己識做，有次仲走埋嚟問我買唔買到陳柏宇演唱會啲飛。
「點解你覺得我會買到呢？」
Rick：「Cherry想睇吖嘛！」
「我係問你點解覺得我會買到，唔係問你邊個想睇呀！」
Rick：「周圍問下人咋，好難買飛呀！」
「唔通我識陳柏宇咩，又唔通我識唱片公司啲人咩！」
九唔搭八，其實阿Rick係有啲想其他人知道佢同Cherry關係好好，好到會一齊睇演唱會，做多咗喇，你不如問埋樓下看更有冇方法撲到飛啦！
或者我自己唔後生啦，所以一直好疑惑點解Cherry結咗婚都冇避忌，因為阿Rick真係當佢好似女朋友，除咗買早餐同撲演唱會飛，Cherry生日仲會送花送頸鏈，阿Rick係光明正大咁問Cherry鍾唔鍾意，又問其他人覺得紮花靚唔靚。
咁就半年，直至2018年放完新年假返公司，經典嘅一幕終於出現，事緣Cherry主動派利是，好多男同事都呆一呆，相信係Cherry太後生喇，25歲嘅年紀，外型再細個啲，如果我唔係睇過佢份CV都想像唔到，頂盡係諗Cherry有冇男朋友，唔會諗佢係咪結咗婚，而最震撼就係阿Rick，我當時都繞場一周派緊利是，有幸目擊整個過程。
Rick：「做咩派利是畀我呀？」
Cherry：「結咗婚咪派利是囉，有咩咁出奇？」
Rick：「你結咗婚㗎咩？冇聽你提過嘅。」
Cherry：「下，唔通返工周圍同人講自己結婚啲嘢咩！」
呢次我又撐Cherry喎，帶埋老母返工我就聽過啫，邊有人帶埋老公或者老婆返工㗎！除非有人特別問起，又或者性格好鍾意晒恩愛，否則喺office都唔會同人分享家事啦！
好多同事雖然覺得意外，但係睇到阿Rick錯愕表情都掩住半邊嘴笑，明白嘅，睇人仆街最開心，呢鑊嘢有排講㗎喇。
可能係有冤無路訴，阿Rick隔咗一陣竟然走嚟問我。
Rick：「喂，Cherry結咗婚㗎咩？你唔講？」
「冇嘢呀你？唔通我周圍同人講同事嘅私人資料呀？」
Rick：「咁我上次問陳柏宇飛你唔話我知？」
「咪答咗你囉！我唔可以周圍講同事資料吖嘛，調返轉你係咪想我周圍同人講你住邊、幾錢人工，仲有之前份工嘅離職原因吖！你唔係同Cherry行得好埋㗎咩？人哋有老公都唔知？」
Rick：「佢都冇提過。」
「咁你哋平時出街傾咩？傾公事呀？」
Rick：「我同Cherry冇單獨出過街㗎，最多係平時返工食lunch咋！」
唔係啩！買飛買花買頸鏈，唔好話未拖過手仔，原來連街都未出過？ 呢個世界有冇咁戇鳩嘅人呀？咁當然啦，答案係有，因為活生生係我同事。有
咩理由連Cherry結咗婚都唔知？唔問有冇老公，都可以問人有冇拍拖吖！
「你同Cherry咁熟，add Facebook IG應該知道佢係咪名花有主啦！」
Rick：「有呀，不過佢啲Facebook IG都冇post嘢。」
呀！其實我自己都係，social media啲account用嚟睇嘢多，基本上係一個CD Rom，咁當然啦，都有可能係Cherry特登set咗啲權限，好多相朋友睇到，不過阿Rick睇唔到。點都好啦，一廂情願就梗㗎喇，阿Rick所做嘅一切只係感動到自己。
時至今日，Cherry已經唔再喺我哋公司做，不過一講派利是就會諗起阿Rick當日個表情，希望佢下次溝女會做research，後生就一定未結婚咩，呢啲basic information一定要問㗎嘛！