職責所在，我哋Speed Dating公司間唔中會搵返啲舊客傾計，唔一定sell嘢，就算係已經成功配對咗嘅couple，我都會得閒跟進下，售後服務吖嘛，班舊客覺得滿意，實會推介畀身邊single嘅朋友，咁都幾好吖！
最近我call返個舊客Marcus，佢年幾之前同另一位女會員阿Yan成功配對，拍咗半年拖就結婚，好開心聽到佢兩個而家過住開心美滿嘅日子，不過Marcus就分享咗一件搞笑嘢畀我聽，原來阿Yan一直買外賣扮自己煮。
我：「你點知？」
Marcus：「之前已經發覺唔對路㗎喇，結婚之後佢煮過一兩餐畀我食，都幾災難㗎，但係我冇彈呀，咁佢自己都有味蕾嘅，後來忽然有一日，佢嘅廚藝突飛猛進，好食得嚟又有種熟悉感，仲有一次，畀我發現垃圾筒有張單，係嗰啲茶記外賣嘅單。」
咕嚕肉、蒸肉餅、 西蘭花炒鮮魷、沙爹粉絲牛肉煲、豆豉雞煲、粟米石斑、金銀蛋肉鬆浸時菜、西芹腰果炒雞丁……Marcus話呢堆小菜要乜有乜，仲要味道火喉啱啱好，一早已經覺得好奇怪。
我：「咁你有冇問係咪阿Yan自己煮？」
Marcus：「我冇用呢種懷疑態度問佢，淨係讚佢煮餸進步咗好多，佢一路聽我讚，又唔敢認叻，淨係支吾以對，個衰婆都會心虛㗎！」
更加令Marcus肯定阿Yan買外賣扮自己煮，係因為有次佢話想食枝竹豆腐火腩，兜餸裡面竟然有叉燒粒……
Marcus：「枝竹豆腐火腩有叉燒粒，係得我住嗰頭嘅一間茶餐廳小菜會咁做，大佬，唔夾吖嘛，我以前問過個老闆點解枝竹豆腐火腩裡面會有埋叉燒粒，佢話係特登，想口感再好啲喎，都唔知咩理論，不過我食食下都慣，點知而家阿Yan嘅枝竹豆腐火腩竟然又有叉燒粒，加埋曾經發現茶記張單，證據確鑿啦！」
Marcus結婚之後，阿Yan搬埋入去佢屋企住，而嗰間茶餐廳本身就係Marcus一直去開，啲小菜大大話話食咗7至8年，單身寡仔嘅時候差唔多晚晚去開餐，嗰份味道真係合埋眼都食得出，只係同阿Yan結婚後就冇去過，所以阿Yan唔知Marcus係食開，當然啦，破案關鍵始終係枝竹豆腐火腩入面嘅叉燒粒。
我：「咁你打算幾時同阿Yan講呀？由得佢繼續買外賣呀？」
Marcus：「暫時未有打算呀，每次阿Yan晏晝打嚟問我夜晚想食乜，我就會上網睇呢間茶記嘅menu，喺個小菜list裡面揀。」
Marcus曾經同一位朋友講起呢件事，但佢朋友就覺得阿Yan咁樣好唔誠實，唔識煮扮識煮。
Marcus對此並不認同：「其實點解娶個老婆返嚟就一定要對方煮餸做家務，奉旨㗎？阿Yan知我放工想返屋企食，嗌外賣再擺晒碟仲想點呀？我反而幾欣賞佢喎！仲加咗啲家用，我驚佢買外賣買到窮呀，兩個人一齊就係你氹下我，我氹下你㗎啦！」
我：「啱呀！你覺得阿Yan係傻婆，可能阿Yan又覺得你係傻佬，仲要加多咗家用，兩個人傻下傻下幾開心吖！」
聽Marcus講，其實阿Yan有努力學煮嘢食，而家每晚三餸一湯咁計，梗有一道菜係親自下廚，因為……食得出。
Marcus：「我反而會好落力食晒佢親自煮嗰碟，當係畀啲信心同埋鼓勵佢，羅馬非一天建造，要煮得好食，係要不斷嘗試，比多啲時間佢，比少啲壓力佢，否則兩公婆一世人流流長點過呀？」
有時做嘢做到好攰，例如有啲會員一直配對唔到，我都會好灰好冇心機，所以聽下Marcus同阿Yan嘅甜蜜搞笑故事，精神的確會為之一振。