我爸爸係2016年頭走，媽媽身體本來就唔好，之後佢太掛住爸爸，健康一落千丈，同年9月都離開咗我。屋企親戚好少，得一個阿叔，不過佢哋上一代關係唔好，所以呢個阿叔作為我唯一嘅親人，其實彼此係非常疏離，我知道有佢存在，但就冇佢嘅電話同聯絡方式，兩老先後離開亦未曾見過呢個阿叔出現。
2016嗰年對我嚟講係一場巨變，突然舉目無親，初時返到屋企真係會匿喺廚房喊，我都唔知點解自己好鍾意坐喺廚房角落頭嘅地下食煙，可能係太懷念爸爸媽媽以前仲喺度，睇住佢兩個日日煮飯畀我食嘅情景啩！
以前有父母煮飯畀自己食覺得好理所當然，由細到大都係咁㗎啦，好多時食到厭仲會作啲藉口出街食，後來冇咗父母之後，我先知道有住家飯食係幾開心，每晚經過大廈嘅走廊返屋企，家家戶戶都傳嚟餸菜嘅味道，真係同你喺餐廳聞到嘅好唔同。
「鹹蛋蒸肉餅！」「梅菜扣肉！」「蒜蓉炒白菜！」「嘩！正！係響螺湯呀！有落猴頭菇！」
我每次路過聞到鄰居傳出嘅食物味道，都會自言自語講出佢哋嘅菜式，呢啲嘢我爸爸媽媽都煮過，真係好掛住兩老嘅湯水，然後行到去自己屋企門口，拎鎖匙出嚟打開門，現實又會提醒我已經得返一個人。
冇咗父母，又冇其他親戚親人，除咗冇住家飯食之外，仲會冇晒嗰啲過時過節嘅意識，例如以前阿媽會喺12月頭提我：「阿仔，你公司做冬有冇得早收呀？記得早啲返嚟食飯呀！嗰日我好早落街市買嘢㗎喇！」
嗰陣覺得阿媽好煩，廿幾號嘅事你月頭走嚟講，到時咩都唔記得啦，做冬之前兩三日先提我吖嘛！
仲有其他大日子嘅時序都會好模糊，例如幾時係年初一，甚至係自己生日，因為過往都係兩老提早講定，叫你留個時間拜年食飯呢樣嗰樣。
2016年我係幾時記得冬至存在呢？應該係冬至前兩日，因為嗰陣公司啲人無啦啦討論：「你估今年有冇得收早呢？上年4點收，3點半先講，好心就一早公佈啦！慌死人會唔做嘢咁，本身冬至都唔會有心機做嘢啦！」
聽到佢哋咁講，我先知道原來兩日後係冬至，一諗起夜晚周街都係舉家出去食飯，又諗起返到屋企自己對住四面牆，嗰種感覺真係好難形容，又掛住父母，又無處可逃，出街又寂寞，返歸又孤獨，無親無故，自己煮好無謂，食飯盒好可憐……
就喺嗰年冬至前一日，同事Eric忽然問我：「你有冇兄弟姊妹㗎？」
我：「冇呀，做咩咁問？」
Eric：「問下之嘛！咁啱喇，我老母痴咗線，買咗勁多餸聽日冬至煮，如果食唔晒就大鑊，因為會連續幾日食佢啲隔夜餸，聽晚有冇約人？」
我：「冇約人，不過……」
Eric：「冇就得啦！幫手清咁啲餸，雖然老細唔興提早講，不過你上年入嚟做都知佢份人啦，肯定係收4點，好老土㗎條友，放工同我一齊返屋企，我真係唔想食老母啲餸食到過年呀！」
其實我係唔好意思，雖然Eric邀請我去食飯嘅時候冇提過「冬至」兩個字，但係呢啲屬於家庭聚會嘅喜慶日子，我作為外人走去參與會唔會有啲尷尬呀？
不過當晚冬至食飯真係好開心，佢屋企人好nice，真係煮咗好多餸，Eric媽媽嘅手勢仲令我諗起自己嘅父母，自從雙親離世後，我已經冇試過咁樣食飯喇，老人家喺廚房拎住熱騰騰嘅餸出嚟，係咁催你趁熱食，佢自己又唔食㗎喎，永遠會話裡面仲有條魚蒸緊，仲有碟菜要炒，我仿佛又記起當日爸爸媽媽喺度成家人食飯嘅情景。
自從嗰晚之後，Eric成日叫我去佢屋企食飯，我同佢家人都愈嚟愈熟，上去食飯嘅頻率平均係兩星期一次，大時大節就一定會上去，佢阿媽仲有我電話，識得自己WhatsApp叫我嚟開餐，有啲傳統節日仲會send啲長輩圖過嚟，原來收到長輩圖係一件幾幸福嘅事。
Eric家姐有對仔女，唔知點解好鍾意同我玩，佢家姐話兩個小朋友成日問我幾時上嚟食飯，因為唔想個身有浸煙味上人屋企，每次去之前我都唔會食煙，慢慢地仲戒埋煙。
後來有一次我問Eric：「點解你嗰陣會叫我冬至嚟食飯嘅，你冇諗過我會同屋企人食咩？」
Eric：「雖然你好低調，不過同你做同事，知道你拎過兩次喪假，我唔肯定拎喪假係因為有親戚過身定係點㗎，咁咪問下你有冇兄弟姊妹囉，你答有就唔阻你㗎喇，答冇咪試下嗌你一齊食冬至飯囉！」
其實我同Eric而家已經先後轉晒工喇，大家唔再係同事，不過就仍然係好朋友，2017、2018、2019、2020，仲有2021，無論冇疫情又好，有疫情又好，每逢冬至同埋大節日我都會上佢屋企食飯，友情並冇因為唔再喺同一間公司共事而改變。
真係想同佢講聲多謝，我喺冬至未被世界遺忘，唔使流離浪蕩捱飯盒，全因為有個Eric，識到佢係我嘅榮幸，當然大家男人老狗，呢啲嘢我從來冇當面講出口。
今年冬至前幾日，Eric循例打畀我：「喂，冬至上嚟食飯喎，我老母話會煲響螺湯。」
我又循例扮客氣：「會唔會唔係幾好呀！成日打搞你哋！」
Eric：「屌！唔通一個人過冬至孤零零呀？上嚟啦！」
天氣雖然轉涼，但聽到佢呢個「屌」字，其實暖在心頭。