因為女友阿爸之前都係做飲食，所以佢哋個圈子有好多人開食肆，茶記、拉麵、日式串燒、酒樓、雞煲邊爐，真係應有盡有，個別幾個世叔伯仲要唔止得一間餐廳，然後佢哋嘅仔女接手又搞多幾間，簡直係飲食世家大綜合。
咁又唔係間間餐廳都要我去做招財貓嘅，佢哋有啲食肆本身都好旺場，不過唔好睇低人傳人嘅宣傳威力，幫完女友阿哥，再幫嗰個Uncle Timmy嘅雞煲搞旺個場，我呢種「超能力」已經喺佢哋個朋友圈響晒朵，冇諗過去食嘢都可以變成一份freelance！
女友：「Uncle Timmy有個世侄開咗間cafe，想請你去飲杯嘢幫手喎，老規矩$2000蚊，你邊日得閒吖？我同佢講聲。」
我：「冇問題，原來咁樣都幾好賺喎，雖然前一個月得兩單賺$4000，上個月就三單賺$6000，唔係話好多錢，不過汗都唔使出，仲有得任飲任食，好過出去搵兼職。」
女友：「知你巴閉喇，呢期你紅吖嘛，不如你做埋嗰啲foodie啦！撈埋KOL仲賺錢呀！」
我：「咁又唔得，foodie去食嘢點都要見樣啦，而家匿埋賺少少咪仲好，出街又冇人知我係邊個。」
女友：「咁你快啲畀個期人哋啦，我去過喇，佢個卡邦尼意粉好好食，個老闆又靚仔又好人，上次仲坐低同我傾計，送咗啲咖啡豆畀我，超nice呀！唔明點解會冇人幫襯囉！」
我：「靚仔又好人？點解你自己去咗冇同我講㗎？佢無啦啦做咩送咖啡豆畀你呀？溝你呀？」
女友：「咪玩啦！快啲畀個期出嚟呀！」
其實高峰期嗰個月，我都係賺$8000咁大把，睇銀碼係唔多嘅，但真係easy money，我都唔明點解自己去親啲餐廳同舖頭都係咁，本身可以一個客都冇，之後就陸續入滿人，就連我去買衫，嗰啲唔識嘅Sales都有同我反映過：「嘩！突然咁多人，你都幾好腳頭喎，一陣畀個折頭你。」
最有趣嘅係，後來遇到一個同我完全相反嘅人，佢係我公司嘅新同事Tiger，唔知佢點解改個咁MK嘅名，其實Tiger份人係幾戇直同埋易相處，不過佢有一樣嘢又真係好猛。
由於Tiger入嚟嘅時候公司好忙，Welcome lunch都只係喺office對面街茶記食，呢間嘢燒味ok，其他食物就可以用「垃圾」去形容，總之你叫一啲要落鑊炒嘅嘢就肯定出事。
Tiger：「嘩！個乾炒牛河勁難食喎！唔知自己食緊乜，成口油。」
我：「叫咗你嗌燒味啦，係都唔聽。」
佢返工第二日又係好多嘢做，結果我哋無可奈何又去返對面街茶記，今次Tiger醒喇，跟大隊叫燒味，仲講咗句：「好食！估唔到同小菜差咁遠。」
Tiger返工第三日，佢提議去另一度食lunch，仲話以前曾經喺附近返工，知道有間嘢鋸扒好好食，點知去到嘅時候發現執咗，跟住Tiger又話唔緊要，前面街有間上樓茶漬飯好食，結果我哋成班同事行到去……
我：「喂，又話有間茶漬飯嘅？搵到未呀？好肚餓呀！而家lunch hour得返半個鐘咋！」
Tiger：「唔好意思，啱啱上網check返，原來已經執咗，我半年前先至食過，真係好好食㗎！」
另一位同事：「你唔好係咁話好食好食，然後去到又執咗得唔得呀？既然咁好食又點會執呀？」
Tiger：「我都唔知點解咁邪，我講親好食嗰啲餐廳呢，過一排就會執㗎喇！」
我：「你黑腳嚟㗎？去親邊度都執，咁你會唔會搞到公司執笠㗎？」
Tiger：「淨係食肆先係咁，但真係好邪㗎，我屋企嗰頭有間酒樓係咁，連鎖式快餐店都係咁。」
我：「吹水咩，連鎖式點會咁易畀你連根拔起呀，人哋大集團嚟㗎！」
Tiger：「大集團嗰啲唔係執，只係我去開嗰間話搬遷，咁就冇咗喇！」
本身都費事睬呢條Tiger仔，但原來佢「掃場」嘅超能力同埋我旺場嘅超能力係不相伯仲，因為一個月之後，office對面街嗰間茶記竟然貼咗張紙出嚟，寫住「光榮結業」！
嗱！首先我覺得好多食店都亂用呢個四字詞，間茶記係冇光榮過，大家只係貪方便而去㗎啫，結業還結業，絕對唔係光榮囉！
我：「咪住先！Tiger你係咪讚過呢間茶記嘅燒味好食？」
Tiger：「係好好食呀！佢啲叉燒堅正，明顯唔係自己燒啦！係喎！我讚過佢好食，嗱，你而家信啦！」
痴線㗎！我幫人旺場係行善，雖然後期有收錢，但你搞到人執笠喎，好唔好意思呀！
講到執笠，Tiger嘅超能力遠遠唔夠疫情同埋政府一連串禁晚市措施咁強，近一年半載有幾多食肆結業，我哋香港人應該心中有數，呢個地方真係乜嘢都變晒……連我同女朋友嘅感情都變埋，佢有一期突然冷冷淡淡，唔聽電話，隔日覆msg，去到最後用「性格不合」呢個理由同我分手，我哋拍咗3年拖，而家先嚟話性格不合？
我唔想分手，但係瑩瑩堅持，雖然身份上已經由男朋友降格成為普通朋友，不過我都一樣咁堅持得閒搵下佢，希望保住大家之間嘅熱度，我真係唔想分手呀！
分手分得太突然，問心嗰句，我絕對唔接受「性格不合」呢個理由，但係瑩瑩嘅脾氣其實都好大，而且受軟唔受硬，如果我想追返佢就一定要保持良好關係，默默付出，得閒對佢噓寒問暖，就算約極都唔肯出嚟見面，我仍然會定期寄啲小禮物畀佢。
同瑩瑩分開之後，我冇再去佢阿哥間餐廳坐喇，不過嗰個Uncle Timmy仲間唔中搵我幫忙，又keep住介紹freelance過嚟，雖然我呢壇「兼職」受疫情影響而一落千丈，跌到平均一個月得一次機會去做招財貓，但係冇所謂啦，反正我連女友都冇埋，時間多的是，有job咪去做，冇job咪on99留喺屋企打機囉！
後來有一次同Uncle Timmy傾開計，佢無啦啦同我講：「唔好怪Uncle多事，聽講你同阿瑩散咗，搵到新女朋友未呀？男兒志在四方，後生最緊要專心搵錢先，想當年我後生不知幾有女人緣，香港九龍新界都有頭住家，搵到錢你驚冇女仔埋身咩！」
我：「我邊有Uncle你咁叻吖，之前聽阿瑩講，你20幾歲已經創業，揸架貨van去啲學校附近賣飯盒。」
Uncle Timmy：「呢樣你都知呀？我咪就係同阿瑩而家個男朋友嘅老豆一齊搞㗎囉！你唔好睇輕呢壇生意呀，搵到兩餐㗎！我仲識到間中學嘅miss添呀！嘩！幾正呀！賣飯盒溝到個miss喎！」
我：「等等先Uncle Timmy，你話阿瑩而家個男朋友……」
Uncle Timmy：「頭先咪話我後生喺香港九龍新界都有頭住家嘅，其中一個咪係個miss囉！你唔好以為教書一定好斯文喎，嘩！佢夜晚好似變咗另一個人咁……」
我：「Uncle Timmy，遲啲先聽你講風流史，你話阿瑩而家有男朋友？係咪真㗎！你點知呀？」
Uncle Timmy：「乜嘢呀，頭先咪話阿瑩而家個男朋友個老豆以前同我一齊搞飯盒生意起家囉，之前佢男友開cafe有叫你去炒旺個場㗎！你冇去咩？佢兩個而家情侶檔拍住上，你都學下佢哋咁啦，工字不出頭，有冇聽過呢句說話呀？」
我已經冇心機聽Uncle Timmy鳩up，忽然諗起之前阿瑩叫我去間cafe做招財貓，但係嗰陣夾唔到時間所以不了了之，個老闆又靚仔又好人吖嘛，仲送咖啡豆添，係咪嗰間呀？
我search返WhatsApp舊msg，終於搵到當日阿瑩曾經畀過呢間cafe嘅地址我，再同Uncle Timmy確認下。
Uncle Timmy：「你唔好去搞人呀！要怪就怪我，係我介紹佢哋識，不過最初我係叫阿瑩搵你去炒旺場，我都唔知佢哋幾時開始㗎！」
我答應咗佢：「你放心啦！我淨係想見多佢一眼，之後就會死心。」
第二日放工即刻落去嗰間cafe，好想知道佢而家過成點，好想知道佢新男友係點，結果真係畀我見到阿瑩，佢嚇咗一跳，但都有上前招呼我：「點解你會嚟嘅？你點識嚟㗎？」
我：「冇呀，聽到Uncle Timmy講你喺呢間cafe幫手，我醒起你嗰陣有叫我嚟做招財貓吖嘛，搵返你WhatsApp啲舊msg咪有地址囉，你放心啦，我冇嘢㗎喇，想見多你一眼啫，係呢，呢個鐘數咁靜嘅？」
阿瑩：「哦，係呀，一時時啦，嗰陣叫你嚟又唔嚟，而家無端端出現。」阿瑩明顯敷衍我，仲好似怪我當日冇嚟呢間cafe做招財貓。
因為成間cafe得佢同另外一個男仔，所以我亦順理成章認定咗條友係傳說中嘅新仔：「佢係你新男友呀？真係好高大有型，我輸得心服口服。」
老實講，佢條新仔真係比我優秀好多，目測肯定過6呎，成個韓星咁，仲識沖咖啡添，啲女畀你溝晒啦！
阿瑩對我仍然好大戒心：「不如你走先啦，遲啲再call你。」
我：「真係放心喎，我冇嘢喎！你唔記得我係招財貓咩？撐場係最後禮物，就睇下我呢個超能力仲work唔work，炒旺個場之後我就走㗎喇。」說時遲那時快，間cafe突然標咗班後生仔入嚟，阿瑩招呼完佢哋坐低之後，又有對情侶入嚟，跟住係兩個OL，cafe開始爆場喇！
阿瑩始終冇拎到Menu畀我，應該真係好唔想我留喺度，我都好識做咁離遠同佢打個招呼作勢離開，點知阿瑩又行埋嚟講：「你真係好犀利，咁耐以嚟未試過全場坐滿，睇嚟我要學佢哋咁請你做freelance招財貓，不過我哋之前生意麻麻，收我半價得唔得先？最多請你飲咖啡食意粉啦，我哋個卡邦尼意粉好好食㗎！你坐低吖，呢餐我請你，當試食畀啲意見。」
我：「唔啦，話咗幫你炒旺個場做最後禮物，讓返張枱畀你做生意賺真銀仲好啦！」
阿瑩：「Sorry呀，我以為你會嬲我，我哋……仲係朋友呀呵？你得閒落嚟坐吖，真係好需要你幫手做招財貓㗎！總之全單免費！」
我：「好！卡邦尼意粉真係好食吖嘛？我下次叫晒啲同事落嚟，坐爆你個場！」
對住曾經心愛嘅女人，我又點會講大話呢？一行出門口我就打電話畀同事，諗住約佢聽日嚟阿瑩間cafe幫襯。
我接通咗個電話：
「喂！Tiger！喺邊呀？冇呀，想問下你聽晚得唔得閒之嘛，我發現咗有間cafe嘅卡邦尼意粉好好食，你住黃大仙㗎嘛，間cafe喺觀塘，好近㗎咋，聽日我同你嚟食……咩話，聽日星期六？我知，係咪weekend約你就唔出先，而家我請你食飯喎！」
Tiger係一個咩都say yes嘅人，所以佢最終都答應，仲喺星期六當晚準時去到阿瑩間cafe，只不過……我仲喺屋企冇出嚟。
我：「Tiger？唔好意思我臨時有事嚟唔到，你自己食吖，張單同我claim，食幾多都冇問題，盡嗌！」
Tiger：「下！我坐低咗喇喎！」
我：「坐低咗咪食囉！卡邦尼意粉呀！記得叫！」
Tiger：「間cafe冇人嘅，好似伏伏地喎，你真係唔嚟呀？」
我：「嚟唔到呀，你嗌嘢食先啦，蔡瀾都讚呢度好食㗎！」
Tiger：「我有follow蔡瀾，佢有講過咩？唉，是但啦，反正都坐低咗，信你！」
畀我臨時放飛機，聽得出Tiger唔係好開心，但佢最後都有叫嘢食，一場嚟到，唔通行返出cafe咩！
一個鐘都唔夠，我已經即刻打返畀Tiger，劈頭就問佢：「點呀？有冇叫意粉，好唔好食先？」
Tiger：「真係好食喎，冇介紹錯，我好鍾意佢個卡邦尼意粉啲醬汁，勁濃囉，呢間嘢掂呀，連杯啡都好正，係埃塞俄比亞咖啡豆……」
我：「屌，得喇，呢啲莘莘學子世界和平嘅說話我唔想聽，你講多次間cafe好唔好食！」
Tiger：「好食呀！正呀！係咪可以claim返錢㗎？」
我：「多多都claim，最緊要你話好食！重要嘅嘢講三次，你而家講三次好食吖！」
Tiger：「好食！好食！好食！」Good boy！
有陣時我會諗，其實自己根本唔係咩招財貓，呢個唔關超能力嘅事，係關心理學嘅事，有陣時行過一間餐廳冇人，你會驚入到去唔自在，驚有伏，反而見到多人就會有份安全感，所以我未必有炒旺個場嘅能力，或者一切只係假象，人哋見到我坐喺裡面以為係客，咪跟住坐入嚟食囉，一枱又一枱愈嚟愈多客，說穿了純粹羊群效應。
至於Tiger……呢個我解釋唔到，就好似啲人去邊間公司都會執笠裁員，同邊個一齊都會剋住對方，呢啲係邪氣，係黑腳，科學家同顧修全都解釋唔到。
點解當晚我會甩底放Tiger飛機？冇呀，我驚大家嘅磁場干擾，影響Tiger每逢講「好食」都會搞到間餐廳結業嘅天然效應，再過多3個月，我從Uncle Timmy口中得悉，阿瑩男友間cafe做唔住喇，不幸中之大幸係業主肯提早解約……
真係令人傷感嘅結局，聖誕節都捱唔到，呢一水明明好好執㗎嘛，不過唔緊要啦！最緊要係聽到Tiger讚「好食」，仲要足足講咗三次咁多，執咗咪好囉，我份人就最L小器㗎喇，上次撐場係我送畀阿瑩嘅最後禮物！