Work from home，而家喺屋企冇人睇住，可以打下字投稿。上個星期日老細突然send msg畀成班同事，話佢中咗招，叫大家唔好返office，順手要我哋自己驗埋邊個中招，一口咬定係同事傳染畀佢。
點解佢中招要賴同事呢？因為老細強調自己防疫意識好高，而且聽足專家指引，所有防禦措施都做齊，佢應該係第一批走去打第三針嘅人，仲成日問幾時可以打第四針，佢講過一句說話好經典：「如果有第五針第六針我一定打，咪當覆診咁樣之嘛，定期打，自己安心。」
唔講真係唔知呢個世界有人嘅嗜好係打針……
咁佢接受唔到自己中招都可以理解嘅，除咗「熱衷」打針之外，老細的確係一位「防疫大使」（呢個名係同事幫佢改嘅），專家話要戴鴨嘴，佢走去搜購，專家話要戴兩個口罩，佢最癲試過戴三個，後來有一日佢喺Office講咗句：「嘩！唔得！真係好焗！」跟住就戴返兩個。
政府冇搵佢做代言人咋，否則我相信老細唔收錢都肯出鏡幫手宣傳打針嘅益處。
老細仲喺外國訂咗個屏風返嚟，做嘢圍住自己，食飯唔出去食，淨係買飯盒返嚟圍住自己食，其實佢已經自己一間房啦，仲圍屏風把托咩！不如直接入醫院嗰啲高壓真空無菌病房住咪仲好，咁驚死，夠晒安全喇啩！
驚死中招要返公司，嗱！呢樣嘢就要幫佢平反下，其實之前每次第幾波第幾波嘅時候，佢又真係畀同事home office嘅，例如出notice叫人work from home兩星期，不過老細為求安心，佢自己通常會home office 三星期，等同事做多幾次快測，證實真係冇事，老細睇到定就會再返公司。
冇錯呀！我老細就係嗰種要求同事每日返工前做快測嘅人，要我哋分批入會議室做，咁搞笑呀呵，如果有同事真係中招，返到嚟做快測畀你睇先知，咁即係其他人已經中埋啦，你office有幾大呀！佢真係打針打到傻咗！
好記得老細率先去打完第三針之後，返到公司春風得意嗰個樣，懶得戚話自己有晒最強保護，仲猛咁催其他人早啲去打唔好等，有個同事因為打完第二針未夠期打第三針，老細叫人唔好理，walk in去社區會堂搏大霧，總之打咗先講喎，定啲嚟吖老細，打針啫，唔係換印花，唔使仆住去呀？早一晚去排隊霸頭位好唔好？
扯得遠咗，講返老細中招單嘢先，上星期日老細WhatsApp我哋，話自己check咗三次都係顯示中咗，睇得出佢啲字眼係埋怨我哋，仲想賴落班同事度。
老細：「冇理由㗎喎，全office我係第一個打齊三針，係咪你哋有人中咗呀？」
同事A：「我唔覺得我中咗喎，星期五喺公司先至快測完。」
同事B：「Office有人中，我哋都係自己喺屋企驗下啦！」
結果成班同事星期日都要喺屋企自己做快測，但係得出嚟嘅結果係－－－冇人中。
老細：「撩鼻先至準喎，有冇成支棒轉勻㗎？你哋啲快測棒係咩牌子呀？係咪買埋啲cheap嘢呀？」
同事C：「轉勻啦，鼻屎都撩埋出嚟，點樣cheap嘢呀，之前公司訂嗰啲嚟喎！」
老細仲要勒令每個同事影張相，證實自己支快測棒真係冇顯示中招，一時間個WhatsApp group猛咁響，十幾個同事係咁upload啲相send出嚟，煩到呢！不過老細好似仲未接受到呢個事實，一直強調聽足專家指引冇理由得佢自己中招，真係so9sad！
畀老細煩足幾日，佢仲想賴係同事傳染畀佢，好在見到新聞袁國勇中招咋，唔好意思，我唔識用詞，唔係想幸災樂禍，只係想表達連專家都中招，我哋呢啲一介草民中招又有咩咁出奇喎，當其他國家都通晒關嘅時候，係我哋香港仲……咪又係咁多人中招。
有個同事唔知係想寸佢定安慰佢：「老細，袁國勇都中招啦，人哋話冇症狀，在家隔離咪得囉，唔使咁緊張喎！」
老細：「我仲係諗唔明點解我會中，搵咗人上嚟消毒未呀？你哋呢幾日唔使返工都keep住驗下，我懷疑你哋可能未發出嚟。」
咁又係嘅，換轉係我都未必接受到呢個打擊，第三針又最快打，仲想搵第四第五第六支針追住打，好似啲人落bar追酒飲咁樣，鴨嘴佢又戴過，口罩打孖上又試過，連foodpanda都唔敢嗌，係都要自己拎外埋，再圍屏風自成一格，咁都中？老細心情難免會咁複雜。
而家袁國勇又中埋喇，專家都中，咁你叫老細情何以堪吖！人哋啲信仰就係基督教天主教佛教，老細個信仰就係打針防疫，最後全公司冇人中，得佢一個中，咁仲有面嘅？不過點都好啦，希望佢快啲好返，同事冇一個中呀，咪傳染返我哋轉頭。