去茶記食tea，有個年紀好大嘅侍應姐姐行埋嚟：「唔好意思呀，阻一阻你哋。」
然後佢就伸隻手去拎個擺糖嘅鐵甖，走去入到半滿再放返嚟，佢拎同埋擺低呢兩下，我對面搭枱個女士都好大聲咁「㗩」，而且勁睥住侍應姐姐，態度好唔友善。
隔咗大約20分鐘左右，侍應姐姐又行埋嚟伸手拎鐵甖，但打開望一望原來已經入咗，所以就放返低諗住走，對面位女士突然開口大鬧：「妖，你頭先咪入咗囉！拎嚟拎去拎完未呀！老人痴呆呀？」侍應姐姐即刻耍晒冧講對唔住，不過嗰位女士冇正面望佢，侍應姐姐好尷尬地將眼神移向我繼續講：「年紀大冇記性，人老咗冇用喇，好快唔記得嘢，對唔住呀！」
我話自己都好冇記性，咁小事唔使對唔住：「我有時行到廚房打開雪櫃，都會突然唔記得想攞咩，好正常啫。」
因為「妖」得太大聲，老闆行埋嚟又向嗰位女士講唔好意思，跟手責怪阿姐騷擾到客人，我趁老闆喺度就講咗句：「唔緊要，其實好小事，唔好話阿姐，我哋後生有時都會冇記性啦，冇事冇事，佢盡責啫。」
阿姐再連環道歉就繼續去做嘢，雖然有人畀hard time佢，不過佢心理質素都幾好，可能每日實在遇到太多唔同嘅客，乜都慣晒喇。
其實人人都會變老同埋愈嚟愈冇記性，多一分體諒，我哋將來都會一樣。