公司出咗張通告，標題寫住「員工福利」，內容大致係話~~~近日有同事反映用唔慣公司電腦，想自己帶Macbook返工，有見及此，如果各位同事覺得部電腦唔適合，公司會全力資助大家買新機。
睇到呢度真係濕晒，再睇埋下一段，原來張通告羅列咗幾項規則：
1）公司贊助買電腦嘅價格上限係$10,000，超過$10,000就由同事自己負責差額。
2）公司會分兩年將啲錢畀返同事，例如部腦$10,000，公司就會分24期，每個月畀返$416.6你。
3）兩年內離職，公司會停止發放嗰筆分期買電腦嘅錢。
其實嚟到呢度都尚算合理，最震撼係 4）兩年後呢部電腦會歸公司……？？？
未完，5）兩年內如果電腦有損壞，同事要自行負責維修費用。
即係我買部電腦返嚟做公司嘢，我出晒錢先，兩年後部電腦歸公司，換言之公司搵我做兩年免息分期，呢兩年我仲要包埋維修保養，有冇理解錯？