上次咪話我東京個office好似聯合國，有日本人、有台灣人、有香港人、有澳洲人，仲有個摩爾多瓦人嘅，簡單啲講，佢哋都係充分發揮咗佢哋嘅長處同功能，日本人唔使解釋啦，主力對外，如果要接觸本地公司，佢哋同聲同氣傾嘢方便好多。
有個香港人係之前一直幫開手，幫佢申請埋visa過嚟，台灣嗰位同事就好熟一啲申請銀行、年金、稅，仲有各式各樣註冊流程，佢2歲就嚟咗日本，父母開咗間台灣料理，由細到大喺度讀書，最重要係同我可以用國語溝通，文件嘢交晒畀佢。
澳洲同事負責IT嘢，摩爾多瓦同事都係跟父母嚟到日本居住，不過佢今年先至嚟，而家係part time形式，識講英文+ 俄文，但完全唔識日文，即將會報讀書，佢主要係輔助嗰位澳洲同事，另外仲有兩位日本人（有一個未正式返工），幫手做「時給」形式嘅freelance，呢兩個就可以唔返office，出面做嘢或者work from home為主。
平時喺公司大家已經要好似多聲道咁溝通，有時我突然間都轉唔切，例如會同日本同事講咗廣東話，然後同澳洲同事講咗日文……滴汗😅
好喇，最詭異嘅事情出現喇，有晚我8點幾返公司，因為漏咗嘢，喺走廊已經聽到我個office有好多人講嘢，心諗唔係咁猛呀，另外又警告咗唔可以OT，諗住打開門邊個OT炒邊個啦，點知一開……全部人齊晒！
咁佢哋喺度做緊咩呢，班友仔好似小組討論咁，呢邊日本同事A教緊摩爾多瓦同事日文，嗰邊香港同事教緊日本同事B廣東話，再另一邊台灣同事教緊澳洲同事國語，仲有啲語言學習書喺度，一隻二隻嘰哩咕嚕嘰哩咕嚕。
我：「想問下呢度係咪補習社呀？」
香港同事：「我哋喺度language exchange呀！」
我：「你哋返工都返得幾招積喎！我都奇怪㗎喇，上個月張電費單咁貴，原來係夜晚開咗嚟補習，不如佈置到好似課室咁啦好冇呀？唔爭在啦！要唔要埋黑板同粉刷？」
然後有個日本同事就考我啲日文，佢同我Role-play平時去餐廳食嘢落單同侍應之間嘅互動。
其實我喺度去餐廳得幾句走天涯，劈頭就會話：私は香港出身で、日本語があまり上手ではありません。
跟住侍應就會好友善，有英文就畀英文menu我，冇就會由得我慢慢揀，呢個時候我就會打開 google translate然後照住啲餐牌，雖然好多都譯到鳩芝孖碌，不過大致上都睇得明係乜嘢食物。
日本同事又問我會點樣嗌嘢食，我平時睇中就會指住menu講 これをお願いします ，想用信用卡埋單就問句 カードで大丈夫ですか？
日本同事話咁樣未夠㗎，有時仲可以問下侍應有冇咩必食推介，おすすめは何ですか？
咪玩啦！人哋講完我都未必識聽，然後啲同事就叫我坐低一齊language exchange，就係咁，我當晚由返office拎嘢，變咗留喺度OT補習日文，而家晚晚就係同佢哋一齊Role-play，真係who am i，我究竟喺度做緊乜嘢？
不過認真，喺日本生活，唔識日文當然生存到，但係你會少咗好多樂趣，畀心機同時間去學之後，會發覺日常生活多咗好多好風景。
講多個秘密你知，之前因為工作識咗個日本女仔，佢有提議過weekend出嚟食飯，但係佢唔識英文，我日文又唔流利，一諗起出到嚟好似演默劇咁，仲要係咁用google translate溝通，然後……我就話weekend唔得閒喇😢
個個星期都有weekend，但係嗰個weekend特別down，我竟然因為語言不通拒絕咗個日本女仔，唔知以為好型，其實係因為日文太柒，好啦，我要痛定思痛，繼續同班友仔language exchange喇！