近幾日同事談論呢個話題：「究竟日文要讀到咩level先可以同日本人溝通呢？N1係咪已經夠呢？N幾先可以溝到女呢？」佢指嘅「溝通」係話日常對話，唔係得你講，仲要聽得明對方講，可以一來一回，有問有答，閒話家常嗰種。
如果你係嚟搵嘢做，除非走去上野同池袋做中華料理，否則一般office工唔使諗，N2, N1走唔甩，呢個唔係溝唔溝通到嘅問題，係入場劵嘅問題，就算間公司想開拓華人市場，淨係對華人客，但對內點都係要用日文（中國人公司就冇嘢好講啦），如果唔係講搵工，淨係講溝通，讀到N幾其實並唔係重點。
我識得唔止一個人係讀到N1, N2，考晒試有晒證書，不過同日本人溝通嘅時候會窒晒Q或者轉唔切，人哋講得快啲就要load好耐先消化到，最終聽到又未必答到，答得一句亦未必接到第二句，睇書睇劇睇字ok，交流唔ok。
然後我細佬係N3，日語流暢完全冇問題，講公事又得，講私事又得，去餐廳、銀行、區役所樣樣都得，講鹹嘢又得，最大分別係我細佬有個日本老婆，日日都用日文溝通，佢又晚晚畀老婆鬧，所以思維嘅轉換上好純熟。（Btw，佢老婆運用廣東話粗口亦好好，擺位準確無誤。）
所以「日文要讀到咩level先可以同日本人溝通」呢個問題，N幾只係一張入場劵，等同香港好多時搵工要求大學畢業，佢都係要你一張沙紙，但係大學畢業係咪特別叻同特別做到嘢呢？相信呢個答案大家心中有數。
咁係唔係讀完都冇用呀？又唔係，有得讀梗係讀，跟住個教程去讀，你將來嘅日文會更加正宗，運用方面亦會更易了解，特別係你想去日本工作或者發展，最好梗係畀心機讀日文啦，不過日常同人溝通嘅關鍵其實係講多啲，而唔係拘泥於乜嘢level。
同樣嘅道理放喺其他語言都一樣，銀行工政府工，按照標準應該要大學畢業，而我嚟到日本之後發覺銀行同政府部門嘅日本人英文反而最差。
之前都有提過，銀行呢啲嘢喺日本睇地區，聽人講六本木同銀座嗰度嘅銀行職員英文好好，但其實日本開銀行戶口係要睇你本身住邊區，唔係住六本木或者銀座而走去嗰區開戶，對方好大機會叫你過主，麻煩去返自己所屬嗰區，所以英文好嘅職員未必係你嗰區，亦未必輪到你揀。
早排因為要搞公司嘢而去日本嘅法務部，政府部門，法務部，但係職員真係講唔到英文。
近月我遇過兩位英文好好嘅日本人，一個係涉谷大商場嘅Sales， 一個係我屋企附近一間cafe嘅侍應，佢兩個聽同講英文嘅能力絕對喺大部分銀行職員同埋政府部門人員之上（應該唔止「之上」，起碼贏幾條街），當然佢兩個應該下過苦功，但最大分別係應用嘅機會同場合比較多，例如嗰位cafe侍應，因為我嗰區相對上多外國人，相信佢每日都有機會操下啲外語。
至於溝女，我見過N1嗰個人（就係上面講嗰位）用盡佢所有氣力去識日本妹，乜春嘢交友App都裝晒，乜嘢聚會都逢show必到，抵死到喺日本join埋義工去識人，結果住咗東京5年，一個日本妹都溝唔到，最後同咗個泰國女仔一齊。
所以溝女又係另一個層次，N1梗係好啦，大家講到嘢吖嘛，不過都要睇對方係咪接受外國人，如果你金城武咁嘅款頭，唔識五十音都應該不愁寂寞。
所以讀日文嚟講，Level係重要，但唔係最關鍵，想同日本人對答如流，一定要搵機會多聽多講，淨係睇日劇同讀書係唔夠㗎！同樣地，學其他語言都係一樣。
坦白講，我自己讀日文都會遇到辛苦嘅時候，特別係工作已經夠忙，仲要記咁多嘢真係搞唔掂，不過喺東京有好多外國人（鬼佬）嘅日文好堅揪，有次我喺cafe打稿，隔籬有個鬼仔攤晒啲日文作業出嚟做，嗰一刻實在係幾慚愧，因為我哋讀日文已經比起外國人有優勢，起碼有漢字，讀音方面亦都似中文。
後來我撩鬼仔傾計，原來佢唔係來自歐洲，亦唔係來自美洲，佢係來自突尼西亞，即係非洲，真心配服！我即刻熄咗部電腦返屋企溫書🙈再同細佬用日文傾下電話練講嘢。
呢篇其實可以做嗰啲語言互動課程業配文，嘥晒。