嫌求職者樣衰:見到佢,我個頭就赤赤痛

Headhunt路過投隻稿,我做咗獵頭呢行5年,難搞嘅客又遇過,唔係真心請人嘅客又遇過,唔找數嘅客都遇過,但係早排第一次聽到個客走嚟嫌求職者樣衰,而結局又順利請咗㗎喎,仲要出咗個唔使返office,長期work from home嘅offer。

當時我見完個candidate一次,覺得適合咁就介紹咗畀個客,再幫兩邊約埋時間見工,headhunt穿針引線淨係睇工作能力匹唔匹配㗎啫,靚唔靚唔係我嘅判斷範圍,何況各花入各眼,好多嘢都有主觀因素。

Candidate跟住時間去見工,唔夠20分鐘個客就打返畀我。

客:「嘩!見到佢個樣,我個頭唔知點解赤赤痛。」

我畀個客呢句說話嚇親:「咁嚴重?會唔會係你今日唔舒服咋?見咗好短時間咋喎……」

你估我真係關心佢健康咩,講到尾都係驚佢同candidate互相唔滿意對方,咁我咪要重新再搵人囉!

客:「佢填form有畀埋相,走咗之後我再睇返……個頭又赤赤痛,一反轉張相就冇事,我都以為係自己心理作用,再反轉睇多眼,個頭又痛。」

個客問我知唔知龍珠裡面有隻自爆嘅嘢叫培植人,佢話個 candidate好似,雖然我睇過龍珠,但對於培植人完全冇印象,淨係記得啲主角,龜仙人就知,培植人要上網check check……check完,有冇咁誇張呀?

我:「點會呀?邊忽似?其實佢能力唔錯㗎,你想要嘅嘢佢全部都有經驗。」

客:「我知我知,同佢傾咗陣,係make sense嘅,坦白講仲有啲喜出望外,但係呢……個頭真係赤赤痛哩,我諗起周星馳唔知咩戲,劉以達扮女人嗌大夫,周星馳一包藥丟埋去叫劉以達唔好畀佢睇到個樣,我都知自己咁樣好衰,不過一見到佢……個頭真係好痛。」

我:「你咁講真係好衰喎,做嘢係睇能力,呢個candidate唔錯㗎,唔好用外貌去衡量啦!」

客:「唔係侮辱佢,只係講出我真實反應同心聲啫,佢係有料㗎,我決定請佢,你幫我問下佢可唔可以work from home咁返工吖!」

我:「你公司而家仲行緊home office㗎咩?」

客:「唔係,home office就安排唔到佢上嚟見工啦,不過我唔想佢出現喺office,你幫我同佢解釋返,因為公司啲位full晒,暫時安排唔到位,喺屋企做嘢咪仲好,人工福利一樣,唔使返公司,你幫我氹掂佢吖!」

又估個客唔到喎,呢頭嫌人樣衰,講咗好多次「個頭赤赤痛」,而結局就照請,仲用相同待遇叫人唔使返office,咁我對住個candidate都好交代啲。

鏡頭一轉,我打畀candidate照講個客嘅意思,當然冇講個客話佢樣衰呢啲嘢啦,點知candidate竟然唔制。

我:「你有其他offer?」

Candidate:「唔係呀,我想返工呀!」

我:「係咪有咩誤會?而家個客係請你呀,即係有工返喎!唔係part time嚟㗎,份糧同之前傾好嘅一樣,福利齊。」

Candidate:「我意思係想返office,唔想work from home,因為我阿媽好煩㗎,如果喺屋企做嘢佢會以為我扮返工。」

我:「邊有得扮㗎啫,你有冇畀家用吖?如果有就更加簡單,唔通失業會個個月畀到家用咩,係咪先?」

Candidate:「我阿媽就係咁,家家有本難念的經,你唔明㗎喇!」

我:「唔係哩,個客間office真係冇位……」

Candidate:「佢話暫時work from home呀?咁暫時即係到幾時?暫時即係幾耐?佢公司如果一日冇人走,即係一日都冇吉位畀我坐,長期喺屋企做嘢我唔得㗎!」

估唔到呢單生意咁崎嶇,過到個客嗰關,又過唔到candidate呢關,然後我好似傳聲筒咁樣同返個客講。

客:「一係咁啦,你叫佢去嗰啲co-working space,好似係計日數定計小時,claim返公司錢啦,我記得好似有月租㗎,等我叫同事搵搵啲資料。」

既然你覺得佢適合份工,咁我真係好想知你個頭究竟有幾咁赤赤痛,寧願出多筆錢畀個新人租co-working space喺出面做,都唔願意畀佢返office坐?月租平極都要幾千蚊啦下話?

好在最後個問題解決咗,因為candidate思前想後,都係覺得有份工有收入緊要啲,諗諗下唔介意home office做嘢,好喇好喇,我份commission終於有著落喇!

可能我係男仔啦,如果老細嫌我樣衰話見到會頭痛,一定要home office先請,我真係唔介意呀!所以呢單嘢我又唔可以完全話個客以貌取人,畢竟佢真係有請到呢位candidate,但係迫人work from home嘅原因就第一次聽。

error: