無人完美 梗有人唔buy你

一路做嘢,枱面嘅手提電話一路震,因為WhatsApp group嘅訊息全日未停過,打頭陣嘅係一個叫安仔嘅同事:「Simon真係冇改錯名,呢條西門慶淨係識得排除異己,對女特別好,對仔特別嚴,Adrian死得慘呀,無啦啦畀佢炒咗。」

WhatsApp group裡面你一言我一語,公司同事熱烈討論Adrian被炒嘅事,第二個發言嘅係Edith:「係啦,我都覺得Simon好咸濕,有次開會望咗我個胸幾次,真係唔信佢冇心囉,不過佢對我又唔算惡嘅,可能對女仔soft啲啦!」

由於當時太忙喇,又有客打嚟,我擺低電話繼續做嘢,過咗半個鐘之嘛,個WhatsApp group已經有67個msg未read,咁啱又睇到另一位同事阿Max講出自己感受:「Adrian應該係衰唔聽話,佢不嬲都唔受Simon嗰套,預咗遲早畀人炒㗎喇!」

輪到Arthur:「最作嘔係咩,係Simon之前提議公司行4天工作周,扮咩好人吖,個心肯定唔知盤算緊啲咩,4天工作,但日日OT到12點係咪?捉字蝨就捉字蝨啦!真心想同事好嘅,就叫老細褶埋個office,從今日開始work from home,直到永遠,阿門!」

鬧咗一大輪,終於有人@Adrian要求回應:「@Adrian,做咩唔出聲呀?心情唔好?條西門慶除咗炒你之外有冇為難你先?份糧有冇計足㗎?少一個崩都去勞工處告到佢甩褲呀!有咩事我幫你出頭呀!」

Zuki:「我都會幫你出頭,預埋我 +1」

Luke:「+2」

Ben:「+3」

David:「@Adrian,唔好唔開心啦,出嚟飲嘢囉,我今晚得閒喎,知唔知鵝頸橋仲有冇得打小人呀?我幫你print Simon幅相出嚟打到佢甩皮甩骨。」

群情洶湧係咁@Adrian,似乎冇辦法唔reply大家,我係Adrian,我亦都唔係Adrian,正確啲講,我係Simon,冇錯,Adrian係我炒嘅,因為呢條友走去溝公司個客,重點係經常半夜三更打畀人,最近一次話自己飲醉酒,好愛好愛對方,而呢個客係有老公。

個客唔係搵我投訴,係直接搵我哋老闆,搵咗Adrian問清楚,最初佢唔認,但係個客截埋WhatsApp圖畀我哋睇,其中一個msg係:「我唔介意你有老公,做SP都得,我真係好愛你。」將截圖畀Adrian睇,佢又改口風,我自己可能飲大咗唔記得。

搞個客之餘仲有其他前科,包括一次約咗去科技園簽約甩底,佢話唔記得;成份報價單打少咗個零,令到單生意要蝕住完成;搞錯出貨日期,累到公司差啲畀人告上法庭……以上係比較大單嘅嘢,濕濕碎碎嘅已經費事提。

至於點解Adrian部手提電話會喺我度,而我又可以肆無忌憚咁樣睇到成班同事WhatsApp group嘅msg呢?因為呢部電話同埋呢張卡其實係屬於公司,唔知係Adrian用呢個number開WhatsApp group,定係將佢加入group嘅同事冇睇清楚係公司number,唔係Adrian私人number,所以當我炒咗Adrian之後,佢亦順理成章要還返部電話出嚟。

既然tag「我」,咁我亦都回應下。

「我係Simon,唔係Adrian,呢個係佢嘅公司number,可能Adrian冇通知你哋要踢佢出個group,但我想回應少少嘢……」

本身好熱鬧嘅WhatsApp group突然靜止,明明個頂仲顯示Zuki同安仔來回咁「輸入中」,但都一齊停晒手。

「回應@Edith先,我冇望你個胸,如果令你有呢個誤會而產生唔舒服嘅感覺,我向你道歉。」

Edith:「🙏🏻🙏🏻🙏🏻」

Edith回咗呢3個emoji,我唔知佢想表達啲咩,anyway,冇所謂啦!

「跟住我想同@安仔講,我對男女同事係一視同仁,如果你有留意,近兩年有機會晉升嘅都係男同事,包括Mark、Ivan、Kit,不過我都想澄清,係睇表現啫,女同事繼續努力,我唔會用性別去衡量升職機會。」

安仔回覆:「明白💪🏻」

我唔知安仔明乜撚嘢,亦唔知佢個「💪🏻」係做乜撚嘢。

「@Arthur,四天工作周的確係我提議,不過冇考慮得咁深入,例如係咪捉字蝨要你哋嗰4日開OT,我冇諗得太複雜,呢度不嬲唔會強迫同事OT。」

Arthur:「😨」

真心問,呢個「😨」又係咩事呢?係好驚訝我係Simon唔係Adrian?

「@Zuki,解雇Adrian,我哋有跟足勞工法例出糧,詳情可以搵Account同事問清楚。」

Zuki冇回應。

「@David,打小人可以,亦係你自由,禍不及妻兒,咒我好喇,唔好咒我屋企人,thank you!」

「最後我想講一講,炒Adrian涉及一啲個人操守問題,我唔喺呢度講舊同事閒話喇,你哋有興趣就自己問返Adrian啦!」

Edith:「🙏🏻🙏🏻🙏🏻」

Zuki:「🙏🏻🙏🏻🙏🏻」

David:「🙏🏻🙏🏻 + 1」

「我幫Adrian,亦即係幫呢部公司機quit咗個WhatsApp group先,大家慢慢討論。」等唔切睇佢哋千篇一律嘅「🙏🏻🙏🏻🙏🏻」,我已經退出呢個群組,樂得清靜。

之後連續幾日都有同事路過同我講sorry或者唔好意思,佢哋都冇講到太詳盡,畢竟真係尷尬,要怪就怪Adrian點解走咗都唔提醒大家踢佢個number出群組,不過放心,我亦冇打算追究啲咩。

我有反省自己㗎,成班同事都咁多怨言,我唔係完全冇責任,而其實都有好多下屬係鍾意跟我做嘢,只係嗰一班人又同呢一班人唔friend,佢哋唔喺Adrian呢個放負群組裡面啫。

無人完美,做得唔好,大家會唔鍾意你,但就算做得再好,都唔等於每個人都會buy你,問心無愧就得。

error: