今年老細唔知痴咗邊條根，無啦啦要全公司同事一齊填問卷，裡面主要係MC選擇題，最後就畀咗一大片空位你自由發揮，有咩感想或者希望改進可以全部寫晒落嚟，仲強調係不記名，填乜都得，叫同事放心畀意見喎！
跟官咁耐點會唔知官姓乜呀！你填得好嘅，咁咪真係匿名囉，如果宣洩不滿或者講公司唔好嘅地方，我就唔信冇手尾跟喇，偏偏有個做咗一年唔夠嘅同事夠膽死講真話，一五一十將啲心聲寫晒落去份問卷裡面，好英勇呀！
不如講下MC題有啲咩問先啦：
是否滿意現時的薪酬？ A.相當滿意 B.滿意 C.正常 D.一般 E.不滿意
是否滿意公司的晉升制度？
A.相當滿意 B.滿意 C.正常 D.一般 E.不滿意
是否滿意員工福利？包括假期及花紅等等。
A.相當滿意 B.滿意 C.正常 D.一般 E.不滿意
仲有另外幾條問題係差唔多嘅嘢，我哋自己內部傾過，盡量揀「滿意」就算，揀「相當滿意」太浮誇，揀「一般」或者「不滿意」就心驚驚，不過有一條就好緊要。
請問你有計劃轉工嗎？
A. 有，3個月內。 B. 有，半年內。 C.有，一年內。 D.有，未決定。 E.沒有轉工的想法。
理論上呢條咁「智將」嘅問題應該係老細諗出嚟，真係想講句：「腦袋是個好東西，希望你也有一個。」公司咁樣問員工，點答你呀？又點解要話你知呀？同埋你知道咗又點呢？
唔洗諗全部人答「 E.沒有轉工的想法。 」咩匿名呀，不記名呀，咪同我嚟呢一套啦！
……點估到又真係有人答「C.有，一年內」，就係嗰位做咗一年嘅同事喇。
佢所有MC題都答「D」同埋「E」，最後一頁紙叫人盡情講意見，佢仲寫：「公司根本冇晉升制度，呢度論資排輩，所以呢條問題係廢嘅，薪酬當然唔滿意，我有朋友喺出面做同樣職位，人工比我多幾千，仲有，呢間公司平時claim錢點解可以搞兩三個月？乜啲數真係咁難計咩？加減乘除咋喎，要計兩三個月？」
個同事先畀我哋睇，再放入去公司預備好嘅箱𥚃面，我哋已經提醒真話唔好拎出嚟講，你寫到咁絕對有機會秋後算帳。
「都唔會知係我啦，用電腦打完print出嚟，擺落箱嗰邊又冇cctv，佢點知係我呀？」
我：「唔好傻啦，佢哋要知總有辦法㗎，你仲要周圍拎畀人睇，講明先呀，我當冇睇過，如果有二五仔爆你出嚟千祈唔好懷疑我，我不問世事嘅。」
結果係點？收集完大家嘅問題之後幾日，HR拎住嗰位同事張問卷逐個逐個部門走去問：「想問下係邊個同事填㗎？」喺每條team公開問，又搵啲department head問下知唔知邊個下屬填。
HR嚟到我哋條team嗰陣係咁講：「老闆想知道係邊個填，呢份係電腦print嘅，內容有講不滿晉升制度同埋投訴公司claim錢好慢，有冇邊個同事認咗佢？唔會鬧呀放心，老闆想同呢位同事好好傾下，想了解多啲公司可以點樣改善，討論下㗎啫！」
我哋當然話唔知啦，然後呢張問卷嘅「真正主人」就犀利喇，佢向住HR講咗句：「原來可以用電腦打再print出嚟交？我仲手寫添，蠢咗！」
我宣布，今屆金像獎最佳男主角一定要頒畀呢位同事，佢嘅懵懂表情加埋頭先句對白，簡直係入木三分，好戲好戲！
後來呢位同事話抹一把汗，估唔到公司會咁樣搵返填問卷嘅人出嚟，完全違背咗當初強調不記名嘅做法。
先唔講你做咗幾耐同埋熟唔熟個老細，畀得份咁樣嘅問卷你，就住答或者大家鬥假係常識嚟啦！唔係仲要教呀？公司有問題老細會唔知？要問你先知？信佢至奇，最後出晒事啦！
由於呢件事唔係發生咗好耐，我硬係覺得未完，硬係覺得要知一定有辦法，話唔定有一日做做下嘢，老細會打內線叫呢位同事入房詳談，不過唔緊要啦，反正佢喺「有計劃過轉工嗎」嗰題填咗「C.有，一年內。」老細隨時成全佢，再畀佢早啲走呢！