幾個月前失業，手停口停，即刻嗱嗱聲搵工，我另一個friend失業得仲耐，由2022年3月到而家，咁就一齊send CV啦，有啲工仲要兩個人同時apply，坦白講都係亂石投林，send多幾份搏個interview機會啫！
其實feedback真係唔多，但竟然有份工不約而同打畀我同我個friend，雖然大家約interview嘅時間唔係同一日，不過都會諗係咪兩個人爭一個位，間公司應該仲有叫其他candidate去interview，照道理就唔係二揀一嘅。
次序上係我見先，奇遇就喺呢個時候發生，上到去原來唔係HR見我，而係直接見個manager，對方講嘢好直接：「其實你唔係好fit我哋個要求，雖然個post係請長工，但如果我同你講，淨係想你頂3個月，你會唔會考慮吖？」
佢呢番說話令我有啲迷惘，第一樣諗嘅當然係「唔fit你又約我嚟見？」而第二樣諗嘅嘢就係：「哦，又係呢啲開場白，想踩低我然後壓價係咪？」
我：「頂3個月？即係contract？」
「No No No，唔係contract，嗱，我都唔怕老實同你講，我條team而家呢，就有兩個空缺，咁以前有兩個喺舊公司跟開我嘅下屬都想入嚟做，但係佢兩個都要3個月後先返到工，我等唔到佢哋咁耐，因為再唔請人就cut budget，然後下年都唔會補返呢兩個position畀我㗎喇，我想你幫我霸住個位3個月，你有冇問題吖？」
我：「都……冇問題嘅……」等錢使吖嘛，同埋佢個語氣似乎都係請硬我，只要我答應當呢份工係3個月合約咁做就ok，都好吖，一早講明，清清楚楚有共識，你情我願其實唔錯。
「冇問題就好喇，你識做我識做，你個expected salary填得太低喇，幫你加返$3500得唔得？有冇異議？」
我有冇聽錯？唔係壓我價，仲主動填多$3500？咁條氣都順啲，賺幾個月咪再搵工囉，到時再算啦，如果唔take呢個offer，都唔代表我可以喺3個月內搵到工㗎喎，有糧出咪得囉！
我：「冇問題呀！」
然後個manager自言自語：「都係唔好$3500咁零汀，齊頭$4000啦！費事填少咗之後加唔返，budget少咗好難再加返，總之幫我霸住個位3個月，人工每個月畀多$4000你。」
我真係由個心笑咗出嚟，但又唔敢出聲答佢，唔通興奮大叫咩！答「好」又好似好low咁，咪唔出聲等個manager揸主意囉，雖然本身諗住搵長工，但而家當contract咁做，人工仲比起預期多$4000，3個月即係一共多咗$12000，當儲備之後再慢慢搵過第二份囉！
當時佢已經叫我幾日後返工，我梗係即刻同個friend分享呢單嘢啦，仲提醒佢第二日上去見工醒醒定定，講埋人工可以嗌高啲，兩兄弟齊齊拍住上，我唔知個manager聽日仲會見幾多人，但最好請埋我個friend啦，不過我又唔敢同個manager講仲有個friend想做，順其自然啦！
點知我個friend聽到之後竟然咁講：「吓，3個月？痴線！唔做啦！我想搵長工㗎，返得3個月不如唔好返，你諗下，就快8月（當時係7月底），做3個月即係10月冇得撈，到時都年尾啦，再搵長工就好難㗎喇，我唔做呀！」
我呢個friend雖然由3月開始失業，不過佢搵工真係一啲都唔積極，人哋約咗interview之後no show都試過幾次，我覺得佢係成個人懶咗，習慣唔使做嘢然後全日喺屋企打機嘅生活。
我：「做住先囉，你都幾個月冇嘢做啦，你屋企人唔話你㗎咩？」
Friend：「話我咪話返佢哋囉！呢個時勢知咩事啦，搵唔到工係好正常，最多遲啲搵唔到咪做7仔做馬會做麥記囉，如果我要搵contract工一早搵咗啦！唔係喎，諗諗下聽日如果去interview咪嘥晒啲車錢同時間？去都費事喇！」
我：「做住先吖嘛！去見啦！有個伴一齊返新工都冇咁悶。」
Friend：「你諗清楚啲仲好啦！你accept咗呢個offer，到時日日返工就搵唔到第二份工㗎喇，唔通真係年尾再同人爭咩，到時競爭仲大，你都唔好返啦，因小失大呀！」
我：「咁你打個電話同人講聲唔in啦！」
Friend：「睇心情啦！」
我個friend話3個月後再搵工可能仲難，其實又唔係冇道理嘅，只係我好等錢使，當時仲有兩萬幾蚊卡數要找，又要拍拖出街呢！樣樣都係錢，同埋日日send CV等見工嘅滋味絕對唔好受，最多我咪一路返呢度，一路再留意下個job market有咩工囉！左計右計都冇蝕低㗎喎！
結果我個friend真係冇去in，而返新工嗰日就得我一位新人，又話要搵兩個人霸住啲位嘅？唔通冇人肯長工變短工？
Manager：「本來今日仲有個女仔返工，而家成10點幾都唔見人，打佢手提冇人聽，睇嚟都係甩底，啲人真係好搞笑，應承咗又唔出現，打個電話交代有幾難呀？你有冇friend介紹呀？」
其實想介紹我個friend嚟做，不過諗真啲，佢咪就係manager口中呢啲甩底奇怪人囉，何況仲send過CV嚟有晒底，本來佢嘅輪候位置係排第一㗎……算啦！我都係唔搞咁多嘢喇。
我：「冇喎，幫你留意下身邊有冇人搵工吖！」
Manager：「好，不過頂3個月呢件事你唔好喺公司周圍同人講，我冇乜嘢畀你做，如果其他同事需要幫忙你咪幫下囉，輕鬆啲得㗎喇！」
冇聽錯下話？人工比預期多，仲講到明唔使點做？筍工嚟喎！Manager又真係冇講大話，第一日返工我齋坐咩都唔使做，上網周圍睇其他嘢輕輕鬆鬆咁就一day，爽呀！
跟住返多幾日工都係咁，我直頭得閒到睇多一次《臥底》系列，呢啲嘢自己識做啦，唔通喺office睇戲睇片咁寸咩，睇下啲文字hea時間咪算囉！
我個friend知道原來份工咁輕鬆之後，忽然又有興趣喇喎，佢直頭懇求我：「喂，介紹返我入去吖，橫掂佢問你有冇朋友想做。」
我：「你見工no show，佢仲要收過你份CV……」
「可能佢都唔記得咗呢，學你話齋，我嘅輪候位置應該排第一，仲要你介紹喎，咩3個月霸住個位呢啲我明㗎喇，知道個遊戲規則點玩，佢都慳返唔少口水啦，不如咁，你聽日幫我問多次先，Please Please Please！」
我：「之前你唔係話返得3個月浪費時間咩？」
「點知份工可以攞正牌上網啫？咁我逗住佢份糧再兜口兜面喺office上求職網都得啦，print嘢仲要唔使錢，幫我問下啦，thank you啦！求下你啦！」
我：「唉，聽日同你問下，唔知得唔得㗎！」（未完待續）