投稿讀者：Lily
「嘩Lily，你今日復古呀？著碎花裙嘅？而家仲興㗎咩？」
以上呢啲說話係出自我公司一個女同事，其實你著咩佢都會有意見，著碎花裙，話你復古；著淺色衫，話你肥；著黑色衫，問你係咪送殯；著間條衫，問你係咪漢堡神偷；化妝，問你係咪相睇；唔化妝，話你好頹；淡妝，問你做咩扮冇化妝；著得斯文啲，問你係咪見工；著波鞋，話你唔似返工；著長裙，話你老土；著短裙，話你發姣……
我唔係作出嚟，呢位百彈齋主女同事的確講過以上說話，亦唔止對住我講，仲試過對住其他同事講，初初做同事就廢事積怨，後來發現你唔出聲佢就會變本加厲，有次佢話我成個星期都係著同一對鞋，問我係咪好窮？我真係忍唔住問返佢：「其實著開一對鞋鍾意日日著有咩出奇呀？你咁留意人衣著嘅？你唔做時裝設計走嚟做會計真係嘥晒。」
自此之後，佢就冇再惹我。咁當然啦，佢本身性格係唔會變，依然不斷對其他女同事評頭品足，又話人唔靚呀、好師奶呀、冇身材呀、肥呀、個鼻好扁呀、對腳好粗呀，佢對男同事都一樣，話呢個唔靚仔，嗰個唔夠高，唔知以為班男同事要畀佢點燈，我亦相信佢有批評我，只係反面後冇直接對住我講啫，你估佢背後冇話我呢樣嗰樣咩！
不過我未講重點，呢個女同事自己本身都係其貌不揚，甚至可稱為樣衰，唔係憎佢先至咁樣講，係公認咗，佢彈人嘅衣著，但自己就著啲心口有堆無厘頭英文字嘅闊身tee，豆皮，煙屎牙，其實佢先係最唔掂嗰個。
有同事分析過呢位女同事，話佢可能係怕畀人批評，所以自己批評人先，係一種自我保護機制。
不妨留意下，身邊或者公司裡面不停彈人哋外表同衣著嘅人，佢哋本身都係好唔掂，你會好自然諗點解呢種人咁嘅尊容仲好意思話其他人，但由於佢哋先下「口」為強，所以就將焦點轉移去其他人身上，通常真係靚仔靚女嗰班好少咁無禮，就算佢哋內心係咁諗，都唔會講出口，反而最樣衰最冇taste嘅人，先至最鍾意肆無忌憚咁批評別人。
雖然我輕描淡寫咁講返件事出嚟，但有時聽到佢啲批評仲係會好火，呢啲人應該點面對好？