投稿讀者：匿名
有個同事畀經理炒魷，一怒之下越級走去搵大老細，怒插經理公私不分、平時勁廢唔做嘢、得罪客多稱呼客少，仲有好多嘢都要班下屬執手尾，大老細好細心聽呢位同事嘅意見，並且一直安撫佢，揚言會好好觀察同埋處理，同時叫呢位同事將來有需要做reference check的話，可以叫新公司直接打畀佢。
嗰位被炒魷嘅同事總算有啲安慰，返埋位執私人物品準備離開，怒睥個經理之餘，仲向其他同事講大老細好好人、大老細知咩事、大老細答應親自出封reference letter畀自己……不過呢位同事其實唔知道，真正炒佢嘅人唔係經理，而係大老細。
點解我知？因為我係HR department，佢封解僱信都係由我個阿姐負責打。
事情起因係嗰位同事開會時瞓覺，大老細話佢唔係第一次開會時遊魂同埋釣魚，開完個會之後，大老細吩咐經理搵個理由炒呢位員工，話精簡人手又好，捉錯處又好，經理自己諗掂佢，總之就即炒。
雖然冇直接講明，不過經理都清楚個遊戲規則係點，好簡單，大老細角色永遠要做好人，而經理只係傀儡，係扯線公仔，專門負責dirty work。
好多人都覺得中高層好廢好無能，但我出嚟做嘢咁耐，只係想話你知有班中高層嘅作用並唔係做嘢叻，而係佢哋肯做傀儡，肯出嚟做一個畀人鬧，甚至係千夫所指嘅角色，代價當然係高薪厚職啦，只要聽聽話話，大老細叫你行東你唔好行西，大老細叫你坐你就唔好企，公司總有位置留返畀呢班中高層。
好似頭先負責炒人嗰位經理咁樣，佢可唔可以選擇畀個機會同事？可唔可以幫個同事美言幾句？佢得，但唔敢逆大老細意思，更加唔敢講大老細半句壞話，因為經理屋企有大有細，仲有層樓要供。
我最初都有同朋友分享呢件事，有朋友仲話：「嘩，份工啱我，咁廢都得，即係聽老細意思，負責執行，唔好駁嘴就得啦！」其實我想講絕對唔係個個得，而且大部分人都唔得，你可唔可以埋沒良心做扯線公仔？你可唔可以面對不合理要求都笑住Say Yes？你又可唔可以對住好多過份嘅嘢都隻眼開隻眼閉？當你內心仲有稜角係好難做到，或者有一日我成身兒女債，又有層樓要供，到時可能會轉變心態都唔出奇。
純粹突然有感呻一呻，真係要匿名。