想分享一單畀獵頭挖角嘅經歷，做咗30幾年人，第一次覺得同人類溝通係咁難，我同自己讀小一個女講嘢都冇咁辛苦。3月24號，有個獵頭透過LinkedIn聯絡我，話有一份「筍工」想介紹，又強調所有requirement同background都好適合，認為呢份工基本上為我而設。
打工仔多啲留意job market並唔係壞事，如果你有份更好嘅工作介紹，人工高福利好又有前途，我當然歡迎啦，咁咪聽下佢講囉！跟住個獵頭問我攞完電話就打嚟，大家傾咗一輪，的確係相關行業嘅，不過人工就……27,000，我同個獵頭講：「我而家份糧係4萬喎！」
獵頭：「4萬？我覺得可以照見咗先，因為呢個客好有potential㗎！嚟緊會喺Bangladesh（孟加拉）搞自己嘅廠房，預計明年年中就可以運作㗎喇！」
我：「但我公司十年前已經喺達卡（孟加拉首都）有自己廠房喇喎！你個客就算喺瓦魯阿圖有廠都唔關我事啦，佢offer得27,000，差咁遠。」
獵頭：「其實唔係差好遠啫，始終都要睇長遠吖嘛，你話係咪先？」
我：「40,000同27,000之間差13,000喎！唔係差好遠？當你呢個客一年加4,000蚊人工畀我，我2029年都未搵得返而家份糧喎！」
獵頭：「唔係，我覺得你見咗先啦，你真係好啱我個客㗎！」
我：「我啱你個客冇用㗎！你個客唔啱我吖嘛，擎天半島都啱我㗎，我買唔起吖嘛！」
獵頭：「哈哈，好難講㗎，話唔定你好快就買到擎天半島呢！」
佢係咪覺得好風趣呢？自減人工13,000，反而會好快買到擎天半島……仲以為佢講個爛gag就自動收皮，點知未完。
獵頭繼續：「或者我幫你約個時間去見咗先囉！」
幫我約個時間？佢確定係「幫我」？
我：「唔使喇，人工差太遠唔想浪費時間，況且我呢度請假都唔係咁易。」
獵頭：「試下啦！可能你見完會改觀呢！其實呢份工真係好啱你㗎！」
佢每一句都話份工好啱我，我已經表達得好清楚，就係人工差好遠呀！究竟佢明唔明㗎！
我：「其實你介紹呢份工除咗27k之外，係咪仲有咩好勁嘅福利？例如15個月糧？有冇話幾多個月bonus？」
獵頭：「Bonus要睇返公司嗰年嘅業績，唔係guarantee，但我覺得你都可以見下先喎，比較下吖嘛！」
見下先再比較？盲咗睇唔到嘢都知唔使比較啦，仲要去見？
我：「即係你份工得double pay呀？有幾多日大假？」
獵頭：冇double pay，大假方面……個客好似冇講，我再幫你問一問佢，不如約個時間安排你去見工先吖！」
我：「Double pay都冇？咁唔止差13,000咁少喎！我唔見喇，喂！唔該晒你先，你搵第二個啦！」
獵頭：「下星期得唔得呀？幫你約朝早見吖，9點半會唔會太早？」
嘩你冇嘢呀？我講得好清楚同明確喇喎！
我：「唔需要喇唔該！」
獵頭：「見咗先啦！了解下吖嘛！嗰間公司就希望你可以5月返工，如果下星期去interview就啱啱好喇，你而家呢度係一個月通知㗎嘛？」
我：「最後再講一次，我～唔～去～見！」
幾經辛苦終於收線，究竟佢係聽唔到定係聽唔明呢？
我嘅表達能力冇問題吖，人工唔啱，唔會轉；福利唔啱，唔會轉；冇興趣，唔會去見；全部講得清清楚楚冇拖泥帶水，佢就好似充耳不聞咁，淨係一味叫我試咗先，仲想直接約時間，諗埋我辭職一個月通知可以5月返工，咩事呀？
佢第二日仲係咁打嚟，我一來冇興趣，二來做緊嘢都唔係時時刻方便聽電話，所以呢個獵頭亦有WhatsApp我，message嘅內容又係一樣，不斷重複份工好啱我、見咗先、下星期見工……我覺得佢已經唔係煩咁簡單，係恐怖呀！
卒之點收科呢？我主動打返畀佢，再出絕招：「其實我講咗好多次唔會去見喇喎，你仲不斷轟炸我，想點呢？」
獵頭：「唔好意思呀，不過你見咗先啦，我同個客提起過你嘅background，佢好有興趣同你做個interview呀！」
我：「你個客知我人工係4萬，都仲想同我做interview？定係你想我去interview充撐場面咋？簡單啲，你講過你個客係邊間公司，其實我有connection，我直接打去同佢講唔適合，咁唔使你難做啦！再唔係就我打去你間recruitment agency，搵你老細傾，大哥我返緊工㗎！傳銷電話都冇你搵得我咁密，一係我直接同你老細投訴，點吖，你想我搵你個客定搵你老細？你揀喇！」
搞掂斷尾，佢終於聽得明人話喇！
我認為呢個獵頭可能唔夠CV，又或者手上嘅CV唔夠好，符合唔到佢個客，所以就想「夾」我去見工，其實你進取冇罪，不過冇理由要人哋大幅度減薪，又或者請假去成全你㗎嘛！唔係咁自私呀？做咗咁多年人，第一次覺得同人類溝通可以咁辛苦。（完）