我同事個男朋友好善良，聽我同事描述，佢男友喺公司正正係最抵得諗嗰個，成日執同事手尾，勸極都唔識得硬起心腸，有時真係好忟憎。
早排佢同男友去咗韓國旅行，當時香港啱啱出現口罩荒，男友嘅阿哥同埋家姐就日日幾廿個whatsapp問佢喺首爾搶唔搶到口罩，而其實當地都好多人搶，中國遊客又搶，韓國本地人日常用又搶，中國同韓國人又同時搶嚟炒，加上一般商舖都係一人限買一盒，亦唔係間間有，所以佢哋兩口子去咗首爾頭三日都係買到兩盒口罩咁大把。
交代下佢阿哥家姐係做咩先，阿哥做政府工，有層樓，月入4萬以上，家姐教書，月入兩萬中，佢男友係普通文員仔，人工萬七，屋企兩老係藍絲廢老，叫極都唔戴口罩，係仔女迫先肯戴，而問題係，全家佛系搵口罩，平時淨係指望個細佬去hktvmall online搶，指望個細佬去排隊，指望個細佬旅行時邊度都唔好去，全日捕住啲舖頭幾時返口罩。
我同事話，最後一晚喺首爾，佢兩個手上都係得兩盒口罩，然後男友家姐whatsapp嚟興師問罪同埋埋怨：「點解得兩盒咁少呀？」
然後到佢阿哥又voice message嚟責怪：「點解唔買多幾盒呀？」
佢男友阿哥家姐好似完全唔知有限購，亦都冇體諒佢哋係去旅行而唔係出埠搶口罩。
其實平時阿哥家姐都成日恰佢男友，例如全家出去食飯，佢男友碌完卡，阿哥同家姐都係唔畀錢，就算畀，都要三催四請係咁追先會畀返，家姐仲過份，話自己張信用卡唔夠limit，之前有次去歐洲都要細佬（即係佢男友）碌卡，又係催足大半年先畀返錢。（真心唔明有份工教書，點解張卡會唔夠limit lol，完全講唔通，似乎係賴皮為主，唔夠limit係廢話。）
我同事好記得最後一晚喺首爾酒店同佢男友講咗句：
「其實你阿哥家姐真係不斷要求你呢樣嗰樣，而從來冇為你呢個細佬付出任何嘢，連旅行買唔到口罩都要埋怨你。阿爸阿媽年紀大，你做仔幫佢哋撲口罩係應該嘅，但係好似你阿哥咁，人工高，又日日準時收工，政府部門仲要有口罩派，你叫佢自己食炒價啦！」
佢男友冇出聲，但眼濕濕，我同事話嗰一刻其實好忟憎，不過男友已經好慘，所以都冇再講咩。本來一人一盒口罩，最後佢連自己嗰盒都畀埋男友，雖然呢個男人冇發難有少少令佢沮喪，但係諗深一層，當日鍾意佢，都係因為欣賞對方咁善良，當然啦，負面啲講可以叫懦弱，睇你從咩角度同心態出發。
有冇人屋企都係佛系搵口罩？你一個要孭起全家嘅口罩重任？我喺度向你致以最祟高嘅敬意，呢段時間真係辛苦晒，好人會一生平安，希望大家好快唔使倒數口罩做人，好快唔使為口罩而煩惱點樣生活，雖然我哋都明白，一日林鄭柒蛾唔死，香港一日都冇好日子過。