有冇試過畀老細迫你出街食飯？唔止平時嘅日子喎，大時大節都係喎！中秋佢又迫我哋成班同事去咩隱世山莊賞月喇！
我最初都唔知咩係隱世山莊，你知而家啲樓名好奇怪㗎啦，以為係咩樓盤改啲咁串嘅名，隱世山莊係咪啲高人入去練功㗎？後來我老細話：「隱世山莊係燒烤場嚟㗎！中秋嗰晚一齊睇月光BBQ，你哋唔使出錢㗎，我請！」
有錢大晒咩！點解中秋一定要同你BBQ呀？過節唔使陪屋企人食飯呀？其實已經有人提出咗中秋節正日唔得，但係我個老細大石砸死蟹，最常用嘅手法係咁：「去啦，出嚟做嘢要學識合群呀知唔知呀？又唔使你夾錢。」
呢招對住新人係起到威嚇作用，當年入嚟做就係畀佢呢啲說話拋窒，後來做耐咗就梗係違抗指令啦，我冇錢食飯咩？我屋企冇飯食咩？不過推三四次都會係咁易去返一次嘅，你可能會話：「推咪推囉！鬧返佢轉頭添呀！老細大晒呀！洗驚佢？」唔係因為驚，而係成班同事私底下都覺得老細好可憐，偶爾出席係出於一份同情。
我老細男人嚟嘅，失婚中年漢，個仔仲要跟老婆，之後佢嘅生活同埋返工模式就徹底改變，朝早8點返到公司，夜晚十一二點先放工，好多時第二日返工會見到佢伏喺張枱度瞓，即係全晚冇走過留喺office過夜啦！
可能你會問，公司有冇咁多嘢做呀？其實真係冇㗎！咁老細賴死留喺office搞咩呢？佢就咁坐喺個位睇報紙同上網囉！
如果你都係一個無鳩聊又鍾意黐飲黐食嘅人，呢個老細一定好適合你，你肯陪，佢肯請你食晒三餐，另加飲酒睇戲咩都得，你一蚊都唔使畀，不過正常人邊會想花咁多時間陪老細呀，擦鞋都唔係咁擦啦！
早排佢先叫我哋陪佢睇《尚氣》，係睇都陪自己嘅另一半睇啦！上次仲叫我同佢睇一套《她和他的戀愛花期》，唔好啦，兩個男人去睇愛情片，痴線㗎咩！仲要係老細同員工！
其實老細最想個仔陪佢，但係佢個仔好明顯唔鍾意呢個老豆，因為好幾次聽到佢打畀個仔講唔夠兩句就「被cut線」，連老細自己都講過：「個衰仔淨係問我拎零用錢先會打嚟，平時想講多兩句都發脾氣，應該係佢阿媽猛咁講我壞話。」
之前公司有個intern，老細死都要纏住人哋食飯，個intern話約咗自己friend，老細都要跟埋去，後來見到佢哋post相上facebook，intern啲friend全部都係20出頭，夾住個四十幾五十勾嘅老嘢真係好怪，所以見到相裡面得我老細一個笑，其他人好似被迫影相咁，算啦！肯定呢餐係老細埋單，當係受人錢財替人消災囉！
我入嚟做冇耐佢就失婚，成班同事初時好願意陪佢食飯飲嘢，並非為咗黐飲黐食，係驚佢做傻事呀！後來發現最傻係我哋，老細嘅頹廢人生係冇底線，嗰隻頹廢唔係咩都唔做，相反地，佢好鍾意用公事嚟麻醉自己，但好似頭先所講，邊有咁多公事吖，佢又唔肯返屋企對住四面牆，結果就下下搵我哋陪，甚至一個人瞓公司咁恐怖都唔肯走。
陪多兩陪，我老婆開始有微言，因為好多時會好似今個中秋咁樣……
「老細，我唔去咩隱世山莊喇，中秋正日做節呀！」
老細：「你幾點做節呀？」
「七八點嗰啲啦！」
老細：「咁做完都係九點啫，出嚟賞月啦！」
「唔啦，陪老婆呀。」
老細：「叫埋你哋啲老婆仔女一齊出嚟，我請！」
唔通成班同事啲老婆同另一半好憎你，又會直接同你講咩！
明白嘅，呢個年紀先至失婚係好慘，我代表全公司致以最深切慰問，不過再係咁樣叫我哋陪飲陪食陪過節，成班同事都好快家破人亡，難道老細你就係想搞到大家妻離子散，然後成立一個中年漢失婚大聯盟？終極目標係想個個都家庭破裂，等你唔使咁孤單係咪？
投稿讀者：30624700