原來借錢畀朋友或者同事，如果對方賴皮唔還，報警係唔會受理，上到法庭亦未必追得返，其實好冇保障。
幾年前借過錢畀一位舊同事，當時佢講到自己好可憐，話阿媽有病但老人家冇買保險，醫療費用龐大，問我借30000蚊，結果我借咗畀佢。
佢本來話一個月後還，但最後做唔到，我知佢有難處就提議分10期，每月3000蚊，咁應該冇問題啦，點知呢位同事一蚊都未還就辭職，臨走仲話會履行分期嘅承諾，可惜一走冇回頭，訊息唔回，電話唔聽，過多排更加改埋number，喺大家鬧我係白痴之前，我直接鬧咗自己先，我真係抵死！
雖然3萬蚊唔係咩天文數字，不過大家都係成年人，已經主動畀你分期，點解要咁冇責任感呢？冇錯，借出去就預咗收唔返，呢啲我都明，但我係出於好心啫，本質係想幫人，佢搞到我對人性好失望，還唔到可以講吖，你話每期300都得㗎，淨係想有啲交帶啫，我當你兄弟，你當我契弟。
唔知佢住邊，又斷晒聯絡，根本冇晒辦法，我當跌咗㗎喇，點估到兩星期前我約咗個客喺餐廳傾project，竟然畀我撞返條大話精，佢明明見到我，一秒驚恐之後就扮睇唔到，跟手戴返口罩想走，客人見到我神色有異就問咩事，我照直話見到個債仔，已經失聯咗幾年，其他就解釋唔到咁多喇，再講就真係眼白白睇住佢走㗎喇，冇理由兜口兜面見到都唔出聲啫。
我起身行過去，只係向佢講咗句：「改晒電話唔出聲？你係咪有啲嘢要交代清楚呢？」
點知佢一開聲就講粗口：「行撚開啦！」
本身仲可以沉住氣，因為冇諗過會突然撞返個債仔，既然你咁嘅態度，我亦唔使畀面：「行開？你都幾惡喎，還錢呀！」
債仔：「還你老母呀！」
跟住我就拎部電話出嚟，話當年佢問我借錢同埋答應還錢啲msg全部喺晒度，其實當時餐廳已經有好多人望住。
佢完全唔理我，想直接走咗去，我真係估唔到個客會挺身而出幫我攔住佢，仲好正氣咁同我債仔講：「爭人錢就還啦！男人老狗！」
債仔：「關你撚事咩？」
客：「一係還錢，一係搞大佢囉。」
債仔：「你咪叫佢報警囉！」
我插嘴：「我有晒你借錢同答應還錢嘅msg。」
客：「冇用㗎！差佬唔會理，直接啲，你有佢個名㗎嘛，有冇佢張相吖？冇就而家影，上網唱開佢，再唔係就貼街招，香港咁細，要幫一個人出名好容易啫，我就唔信佢啲朋友同屋企人睇唔到。」
債仔：「想點呀你哋？」
客：「你嚟得呢頭，一係就住附近，一係就附近做嘢，我估得啱唔啱呀？定係有條女喺附近返工吖？試下囉，睇下邊個冇面。」
唔知邊一句講中咗，佢頭先嘅氣焰好似突然消失，雖然態度都係唔好，但就主動提出還錢，叫我畀多次account number佢。
我個客咬住佢唔放：「戇居！呢度一行出去已經有部櫃員機啦，滙豐機又有，銀通又有，唔好拖喇！」
我都唔識點形容，當時嘅環境好似我同個客「押」佢出去咁，提款機嗰段路雖然好短，因為餐廳前面就有部ATM，我諗距離30步左右，但都真係有啲擔心，如果佢一嘢跑咗去，大街大巷追定唔追好呢？
債仔：「嗱，真係得18000啫，畀住你先，留個新電話畀你，其他再分期啦！」佢叫我哋一齊睇ATM顯示嘅結餘。
客：「還錢啦講咁多廢話！撳咗呢18000蚊出嚟先講啦！」
收咗18000，試埋佢手上嘅電話號碼打得通，好在有紙有筆，草草寫咗張借據，剩低12000佢要求分3期，每期4000，叫做有啲「揸拿」就畀佢離開，雖然過程尷尬，不過真係好爽。
個客同我講，要有心理準備呢條友唔會還埋剩低嗰12000，但總算收返一半多啲，到時甩數先再算，好過就咁放個債仔走，夜晚返去肯定瞓唔著。
後來個客仲同我解釋，朋友間借錢唔還其實唔屬於刑事，差佬根本唔會理，雖然債主可以循民事途徑追討，但30000蚊只能入稟小額錢債，如果冇正式合約仲麻煩，得啲msg之類好難舉證。
我問個客：「你呢方面嘅知識都幾熟喎。」
客：「熟係因為我都借過錢畀朋友，銀碼多過你，我冇咁好彩，而家1蚊都追唔返，對方真係完全消失。」
我真係好幸運，如果個客唔係work from home，我今次應該要上佢office傾project，而唔係出去搵間餐廳傾，何況得我一個人的話，應該冇能力咁樣押住佢去提款機（個客外形係幾高大，嚇得下），希望佢會還埋嗰12000蚊啦，以後借錢畀朋友或者同事，真係要三思而後行。
投稿讀者：Boris
＝＝＝＝＝
賤精同事問埋茶水姐姐借錢
想知道《對付無賴的方法》，可以直接click呢度👇
https://hkofficedaily.com/對付無賴的方法/