曾欠債百萬 屋企被斷電 「最黑暗日子想自殺」

投稿讀者:Calvin

今日喺屋企大掃除,順手清走好多唔要嘅舊物件同舊信,其中有一袋令我好感觸,入面係財務公司借貸合約、財務公司追數信,仲有啲水電煤最後通知催交信。

大家有冇收過水電煤嘅催交信?啲框同標題都會轉晒紅色,好搶眼,好似你讀書份試卷唔合格咁。

嗰段日子,我真係唔合格,唔止零分,仲係負數。

呢一堆信已經係7至8年前,一直唔敢丟,係因為入面啲合約同埋信件有晒名、身份證、電話、地址,加上水電煤單全部紅色,以上信件撕咗佢都好怕丟出街畀人見到,屋企又冇碎紙機,所以一直pack埋擺一邊,或者潛意識係想提醒自己曾經有過一段咁嘅日子,未來嘅日子唔好再重複犯錯。

7至8年前我以為自己玩股票好叻,日日對住個市,睇好多投資書同埋資料,隻隻股票都如數家珍,雖未致於覺得自己係股神,但深信全職炒股一定搵到食,結果我冇返工,全日喺屋企炒炒炒,諗返都覺得幼稚同可笑。

結局唔使講啦,輸到仆晒街,除咗要借錢,連基本生活都成問題,最窮嘅日子要喺屋企摷啲「神沙」(散銀)出嚟先夠錢買飯同搭車,嗰時仲有個女朋友㗎,兩個人一齊如果長期冇錢,長期為生活煩惱,自然就有好多拗撬,所以後來亦分咗手,我相信佢對我有一種恨鐵不成鋼嘅感覺,要怪只能怪當年嗰個冇上進心嘅自己,以為炒炒賣賣就可以致富。

財不入急門,其實搵工都係一樣,當我好心急想搵一份工重新開始嘅時候,我都數唔清究竟send咗幾多份CV出去冇回音,生活唔等人,帳單都唔等人,我真係試過返到屋企俾人cut晒電,總之你想像到最惡劣嘅情況我都試過晒。

靜雞雞話你聽,最灰最黑暗嗰段日子,我真係諗過自殺……試過喺屋企對住四面牆傻笑大笑,當時自己嘅精神狀態非常差。

後來我搵咗份茶餐廳侍應,好在茶記見工好求其,我直情唔敢填自己大學畢業,驚人哋以為我玩嘢然後唔請。

喺茶餐廳做咗四個幾月,一路做一路搵工,終於搵到份文職,咁就方便用夜晚時間做其他兼職。你問我當時點樣還晒啲債?我唔想諗返嗰段日子喇,只可以講句「不想回憶,未敢忘記。」

嗰份文職係做美容用品,之前完全未做過呢行,但我喺嗰度學咗好多嘢,另外識到一啲好同事同埋供應商,做做下就嘗試自立門戶,我必須強調當時完全冇諗過要發達,純粹想啲錢鬆動啲,純粹想生活得有尊嚴少少,當你窮過,捱過,自然唔敢有咁大想頭。

幸運地,近兩年呢壇生意仔run得唔錯,財政狀況好咗好多,無債一身輕之餘,仲有少少閒錢置業,雖然只係一個細單位,雖然只係一個唔值錢又遠離市區嘅單位,但我已經好滿足。

今次投稿唔係想曬命,只係想叫大家無論遇到任何逆境都唔好放棄,7至8年話短唔短,話長唔長,我當年以為自己一世都唔會逃出生天,差少少就選擇自殺,但吃過無數嘅苦頭之後,今日都可以安安定定。高峰時期財務公司同埋私人債項超過100萬,屋企試過畀人cut電cut煤氣,咁嘅身世都可以走返出嚟,我相信你哋遇到其他問題都一樣可以。

失敗唔係最可怕,放棄先係最可怕,慶幸我冇選擇結束自己嘅生命。

文筆唔好,寫唔出咩大道理同總結,大家加油!

error: