《診所低能奇觀》問問屎片

有日一位媽媽嚟到診所。

佢行埋嚟登記處問我:「你可唔可以同我睇啲嘢呀?」

我:「有唔舒服嘅話俾醫生睇會好啲喎,我同你登記呀」

佢低頭邊摷手袋邊講:「唔係我呀,我唔係要睇醫生呀」

我好無奈。點解嚟到診所嘅你哋成日都話唔係嚟睇醫生?

佢拎起一條尿片,再打開佢…

我頂你個肺,有料喎?

佢問我:「你睇唔睇到我個bb食過啲咩呀?」

面對住眼前一pat嘢,我真心想問…我個樣似係屎界傳心師嗎?

我:「唔好意思太太,我真係睇唔出,不過bb有唔舒服嘅話都可以嚟睇醫生嘅」

佢:「佢冇唔舒服呀,我係見佢啲臭臭同平時唔係好同咋」

嗯,閉氣中,唔該唔好再隊埋嚟…

佢:「你真係睇唔到我個bb食過啲咩呀?」

我:「都變到咁嘅樣,你睇唔到我都一樣睇唔到嘅」

佢:「你睇唔睇到係咪我奶奶餵過啲咩俾佢呀?」

我:「睇唔到」

佢:「咁你睇到啲咩呀?」

一篤屎。

我:「太太呀,不如你包返好條片先…」

佢冇理我,繼續望住篤屎問:「明明係奶奶餵過啲咩俾佢食先會咁,係咪呀?」

我冇俾任何反應。

佢再問:「你點解會睇唔到佢食過啲咩呀?」

唔好講咁多,我即刻屙一篤俾你,你即刻答我噚晚食過啲咩!

我:「我…冇研究開呀太太」

佢放低咗條片喺枱面:「一係我放低俾你慢慢睇吓?」

咪玩啦…

我:「唔好意思呀太太,我哋診所真係唔係睇呢啲,如果bb真係有咩唔舒服嘅就直接嚟睇醫生啦,俾條片我哋睇真係冇用」

佢:「我咪話咗佢冇唔舒服,我淨係想知奶奶趁我唔喺度嘅時候餵過咩俾佢食咋」

不如直接問呀?問奶奶呀,唔係問篤屎呀好冇?

我:「我都幫你唔到呀,我哋真係淨係睇人嘅啫」

佢拎返起塊片,我鬆咗一口氣。

佢問我:「真係唔知?你唔係幫住我奶奶所以先唔講我知呀?」

我誠懇樣:「我真係唔知」

佢諗咗陣:「信你一次啦」

佢終於離開診所,真係唔好再問篤屎啦,問返奶奶啦。


👉🏻即睇其他診所低能奇觀嘅文章

😰《診所低能奇觀》 想證明冇工作能力
https://hkofficedaily.com/?p=16016

我叫珍寶豬,係一個診所助護,只係一個無能無專業資格無牌照的大嬸。做過晒港九新界中西醫診所,見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事,但請勿公開任何病人個人資料或病人相片。看此PAGE時請勿對號入座,信則有,不信則無。

error: