收過20,000利是 三文治咁厚

老細話疫情下為咗避免接觸,由上年開始已經用轉數方式向同事發放開工利是,今年又係咁,大家要另外填張form寫低想入落邊個account,搞咁多嘢做咩吖,直接入本身個出糧戶口咪得囉!重點係開工利是得$10蚊……

得$10開工利是真係傷心,結果有同事就轉話題,講下曾經收過最大封嘅利是係幾多錢,有人話$500,有人話$1,000,然後我話:「最勁嗰次收$20,000利是。」

個個聽完之後目瞪口呆,附加好羨慕嘅表情,須知道我並唔係女,冇嗰啲所謂嘅Sugar Daddy,一條麻甩仔何德何能收到$20,000利是呢?

我:「其實都係Daddy,不過係我親生老豆,前年嘅事之嘛!」

「你老豆出手好豪呀!」

「有錢仔!」

「原來你係富二代!」

「$20,000點入落利是封呀,全部一千蚊紙都好厚喎!」

同事討論嘅焦點落晒我身上,我解釋嗰個利是封係比較大,雖然上面冇印住「囍」字,但懷疑係用嚟結婚裝禮金嗰種,仲要唔係張張一千蚊紙,有啲五百蚊紙,有啲一百蚊紙,所以拎上手個質感好似拎住份三文治。

由細到大老豆都好錫我,細細個話要公仔書、玩具、遊戲機,佢一定會買畀我,中學日日同班同學仔踢波,佢買咗對波砵同曼聯波衫畀我(雖然我其實鍾意利物浦),再大個啲想要電腦,佢二話不說擺咗幾千蚊喺枱面,問我夠唔夠?

3年前我失業,搵咗成年都搵唔到新工,意志消沉,信心盡失,整個人冇晒方向,後期就索性食飯,打機,瞓覺度日,因為要做嘅嘢做晒,要send嘅CV亦send晒,冇人肯畀機會我都冇辦法。

雖然我已經冇出街,完全零社交,但係之前嘅積蓄始終會坐食山崩,當時個人沉到農曆新年,老豆年初一嘅朝早畀咗封利是我,真係厚到三文治咁,裡面有一千,五百,一百,總共三種面值嘅紙幣,好明顯係去櫃員機撳出嚟,加加埋埋total $20,000,呢封係我人生收過最大封嘅利是,老豆驚我唔夠錢用,唔夠錢食飯,冇錢搭車見工,冇錢買衫見工。

呢封利是對我最大嘅意義唔係銀碼,而係提醒咗自己唔可以再頹落去,幸運地,當時過咗年之後我終於搵到而家呢份工,做下做下就接近兩年,前途同埋收入穩定返好多。

我唔係富二代,我老豆亦唔係有錢佬,佢連26個英文字母都數唔到,佢只係一個人工永遠得$12,700嘅舊式屋邨茶記樓面,佢仲好慳家,連3蚊嘅小巴都唔肯搭,有斜坡都寧願行路。

所以我老豆其實一啲都唔豪,佢最豪嘅只係對我嘅愛。

error: