喺呢間公司做咗3年半，發現呢度有樣嘢好得意，就係啲舊人好鍾意食回頭草返嚟做，而老細又可以不計前嫌，無任歡迎佢哋回歸，最誇張係我啱啱嚟做嘅時候，有位叫Judy嘅女同事辭職，我都有份食散水餅，點知唔夠4個月佢就返咗嚟，唔係返嚟探人，係返嚟做。
Judy嗰次做咗半年又走，又有散水餅食，然後隔咗幾個月又返嚟，做咗幾個月再走，跟住仲誇張，唔夠一個月再返嚟，我心諗：咁似喜劇之王嗰個周星馳， 呀神父死極都死唔去嘅？
然後做咗兩個月，喂，條女又一次辭職……我打字都打到好亂，總之唔計我入嚟嗰陣佢已經做緊，淨係計我親眼所見，Judy都入職3次，走咗4次，好似出去度完假返屋企咁。
唔止Judy一個，另外有個男同事叫Andrew，聽講幾年前喺度做，出去兜咗幾個圈之後，上年年中回歸，所以一返嚟已經同大家好熟，不過佢定性好多，數數手指都做咗超過半年，睇個勢短時間內唔會再走。
我粗略計過喇，呢度起碼有5個同事（包括Judy同Andrew）係辭咗職一排再返嚟做，當中亦有人好似Judy咁樣，返咗嚟做一排又再quit，同事圍內都成日講笑，話呢度可以稱為「回頭草大本營」。
問過同事點解會有呢種情況出現，據講係人人見到開晒先例，所以出去撈唔掂就有樣學樣開聲話要返嚟，Judy每次返嚟就係因為去咗新公司搞唔掂，其中有次咪辭職唔夠一個月再返嚟嘅，原來係新工過唔到試用期。
呢度啲同事其實幾好，老細亦非常nice，可惜公司做嘅行業有少少夕陽，所以人工唔高，長遠做都冇咩前途，而且夕陽工業因為被淘汰係遲早嘅事，累積落嚟嘅經驗未必幫到將來轉行，呢下的確幾悲哀。
老細份人好親民，對每個同事都有傾有講，可能係知道畀唔到太好嘅待遇，所以佢對我哋係好寬容，冇乜計較，你做晒啲嘢就得喇，其他唔會理咁多，雖然老細冇講出口，但相信呢個係佢無任歡迎舊人回歸嘅原因。
身邊啲朋友聽到我公司呢種情況都會覺得好騎呢，特別係Judy嗰個case，出出入入返嚟做完又走都接受到，認為我哋個老細好奇怪，坦白講吖，初初入嚟做嘅時候，其實我都有同感㗎！乜嘢公司同老細會容許咁嘅情況呀？
做得耐咗就發覺凡事兩面睇，係就係奇怪啲，不過某程度上都反映咗老細有人情味，靜雞雞講多樣嘢，早排我都出去見過工㗎，始終自己得廿幾歲，都想轉行同埋搵多啲錢，可惜個interview衰咗，但如果第日我真係有新offer，轉去新公司又做唔掂，我諗自己就唔會好似Judy或者Andrew咁樣返嚟做喇，唔係咩好馬不吃回頭草嘅問題，只係自己怕瘀，同埋都講咗係夕陽工業，想轉行就要下定決心，否則不斷來回comfort zone，長遠嚟講始終唔係好事。