個個驚做孭鑊位 升職仲慘過見鬼

做緊嘢嘅時候,meeting room傳嚟激烈爭吵聲:「你唔L使再講!唔做!冇得傾!一係你炒我,記得補水,再唔係我就自己唔撈,你唔使再同我講咁多廢話,上次我已經答咗你做唔到㗎啦!」我認得呢把聲係我同事Wilson。

由於meeting room毫無隔音可言,所以緊接落嚟又聽到個高層講嘢:「喂你咁樣我好難做㗎喎,一個二個都係咁,有得推㗎咩?我冇出糧畀你㗎?要做就係要做㗎啦!個個都話唔做,係咪要我自己做埋呀?」

就咁聽佢哋嘅對話,你一定會覺得高層assign一啲工作畀Wilson做,但係個下屬又推三推四唔肯服從指令,然後高層發脾氣反問係咪要自己落手落腳做……其實唔係,高層冇叫Wilson跟project,亦冇叫佢做report,而係想升佢職。

Wilson有得升職加薪都爆晒粗,仲威脅話要辭職,係因為Manager呢個position係孭鑊位,近3年內總共轉咗17個人去做,最初係登招聘廣告請,跟住係經headhunt撬,到最後簡化為內部提升,不過上得呢個位嘅人都係做唔長。

上咗呢個position要帶住成team人追數,每日要同好多vendor開會,仲有聽啲supplier上嚟做presentation,不過呢啲都好平常,大把人就算唔係Manager都每日做緊,所以最慘嗰part係要代表香港office同其他地區嘅高層開會。

我哋係新加坡公司,head office除咗有新加坡人之外,仲有馬拉人同埋印度人,佢哋啲idea可以話係天馬行空,舉個例,做個marketing嘅宣傳,budget 20萬,想搵陳豪同陳茵媺兩公婆,再加個張智霖……因為TVB藝人喺馬拉都有知名度,不過先唔講呢啲,20萬港紙搵陳豪兩公婆加張智霖一齊拍嘢?你瞓醒未呀?知唔知價呀?

仲有好多嘢㗎,總之head office嗰邊咩都唔識,又咩都想做,冇budget仲要你諗掂佢,早排佢哋都有叫香港呢邊搵Mirror拍嘢,批得幾萬蚊budget,又話呢個數之前搵咗隊菲律賓組合喺馬拉宣傳都ok,聽完之後真係屌佢都嫌費事。

我哋做細嘅就話聽完之後得啖笑,但如果你做Manager呢個位就唔係咁簡單喇,首先真係要去quote晒啲價,打晒Marketing Plan,再同佢哋傾點樣做,又要解釋畀班「智將」聽點解唔work,可行嘅plan就ban晒,唔可行嘅plan就不斷花時間討論,當然仲有其他工作嘅難題,我覺得喺度做Manager唔止任期短,連條命都會短幾年。

之前有個阿姐仲叫做駕馭到班新加坡,馬拉,同埋印度佬,後來個阿姐都頂唔順走咗,我哋公司請返嚟啲Manager就冇個做得長,印象中有個男人係headhunt撬返嚟,做咗4個月,佢已經算最犀利㗎喇,有個返咗幾日工連糧都唔要就無聲告別。

短短3年內轉咗17個Manager,想唔想像到每個人都係冇鞋挽屐走?後來公司直頭覺得咁樣請人同埋搵headhunt好嘥錢,索性內部提升,結果搞到有個做咗7年嘅同事都辭職,佢話寧願出去搵過份重頭開始。

論資排輩,高層早排就叫Wilson升上去做Manager呢個位,佢反應非常大,講到明唔好升佢,升佢就即刻resign,聽講高層promise會加佢幾千蚊人工,但係Wilson覺得幾千蚊都唔夠買藥食同埋睇醫生,上咗位唔會做得長,多次推卻升職加薪呢個安排。

最好笑係嗰位高層其實連我都唔放過,有次去toilet撞到,成排咁多尿兜佢唔企,係要企我隔籬一路屙一路講:「Andy,你都喺度做咗好耐喇喎,覺得公司點呀?」

我好嬲自己嗰朝早忍尿,搞到篤尿屙咗好耐,唔可以即刻拉褲錬走人,焗住要答佢:「都唔係好耐之嘛,我做得3年,不過公司好好呀!」

高層:「好就得啦,有冇興趣試下新挑戰呀?公司review緊邊個可以升Manager呢個位。」

我:「咁又唔得,成條team我年資最短。」

高層:「年資短唔係問題㗎,有能者居之吖嘛,我睇好你㗎!」

我:「多謝,不過我都係想學多啲嘢先,差啲唔記得要打畀個客,你慢慢,我出去先。」

其實呢個高層份人係ok嘅,好講得笑,否則Wilson都唔可以同佢傾計傾到爆晒粗,同埋呢個高層都好慘,未搵到人做Manager個position嘅時候,佢就要負責頂住先,特別係要同新加坡班人開會,所以佢先至周圍求人升職。

不過呢個position真係孭鑊位,唔好話加幾千蚊,就算加夠一萬蚊,你捱得幾個月就會頂唔順而辭職,咁升嚟做咩呢?3年內轉咗17個人,17個人都唔同性格,個個都捱唔住一定有原因,睇下2023年會唔會有死士肯接手啦!

error: