Trevor呢頭同我闡述完一個大膽嘅諗法，嗰頭又收到Cherrie嘅msg：「你快啲畀個account number我啦！一陣放工即刻過數，你知唔知欠交卡數最後搞到cut卡好麻煩㗎？第時你想再apply就好難批㗎喇，又會影響信貸紀錄，買樓做按揭都會影響㗎！」
見到Cherrie咁仆心仆命幫Trevor設想，我把口雖然講笑，但內心又有一陣憐憫：「Trevor，不如你真係考慮下肥妹啦，我覺得佢有幻想同你嘅將來，無啦啦講按揭，會唔會係擔心第日同你結婚買樓嘅問題呢？」
講完呢番說話之後，我被Trevor以粗口作為洗禮……
Trevor：「失策！30萬真係太少，呢筆數可能對佢嚟講太輕鬆，我應該一起手就嗌七八十萬。」
我：「有冇打算又食又拎？呢30萬你可以照袋喎！」
Trevor：「痴線！如果我拎咗呢30萬就玩完㗎喇，你覺得唔使肉償？一於出超必啦！」
我：「即係咁，你呢招超必……點講得出口呀？唔鍾意佢直接講咪得囉！」
Trevor：「我直接講咗㗎喇，然後Cherrie過兩日又會當冇聽過一樣，佢應該睇得太多愛情小說同埋濕鳩韓劇，唔鍾意就唔鍾意㗎啦，冇咁多日久生情㗎！我係外貌協會會長，好膚淺，純粹睇樣，冇得勉強。」
我：「咁你幾時出超必？約佢出嚟講清楚？」
Trevor：「仲約出嚟？我唔會同Cherrie單獨見面囉！記唔記得有次公司gathering？佢根本冇飲醉，臨尾扮醉跟住我，話叫我送佢返屋企，跟住蹺我手臂，頂你個肺吖，畀其他同事見到仲使出嚟行嘅？呢單嘢我一直唔敢同人講，成日用無賴兩個字形容男人，其實女人都有無賴㗎！」
我：「咁Cherrie又真係狼咗啲嘅！」
說時遲那時快，Trevor原來已經send返msg畀Cherrie，先講唔會要嗰30萬，繼而再強調自己唔鍾意佢。
Trevor：「屌！都話啦！你睇佢點覆我！佢問我係咪因為有欠債所以唔敢拍拖，又話自己唔介意，佢冇得救㗎喇，我唔鍾意佢都諗到我有苦衷！即出超必！」
我睇住Trevor逐隻字逐隻字咁打：
「我唔係唔想拍拖，我係唔想同你拍拖，唔怕同你講，我唔係好人，我鍾意玩3P，一定要咁樣先至滿足，之前都係因為呢個原因同舊女友分手，咁你而家明白晒啦，我呢方面係有特殊癖好。」
睇住Trevor打完成段嘢再send出去，我又不禁問咗句：「既然30萬都肯借畀你，Cherrie咁愛你，如果佢一陣覆返3P ok no problem呢？」
Trevor瞪大隻眼望我：「咁撚癲？」
不過我同Trevor好快就唔使估估下，因為Cherrie隔咗陣已經覆返，好簡單得兩隻字同一個emoji：「變態😡」
Trevor「Wow」咗一聲，我叫佢唔好咁興奮住，可能再隔幾秒Cherrie會補充一句：變態😡 不過我鍾意🥰
最終冇咁戲劇性，Cherrie真係冇再搵Trevor，連續幾日冇msg冇call，亦都冇再走過嚟我哋個department，我終於明白「超必」嘅殺傷力有幾大，不過達成咗呢個目標，冷不防又出現其他餘震，隔咗一排有個女同事走嚟問我：「喂，聽講Trevor鍾意玩3P，係咪真㗎？好核突喎佢，會唔會有性病㗎！」
呢個女同事平時冇乜兩句，私人同埋工作上都冇咩需要交接，3P單嘢竟然傳到去佢嗰度？我想返埋位同Trevor講，但係又見唔到佢，正當我幻想緊Trevor一定會崩潰嘅時候……
Trevor：「仆街吖！無端端畀阿頭鬧咗一餐！」佢又失驚無神喺我身邊走咗出嚟。
我：「咩事？做錯嘢？」
Trevor：「Cherrie周圍唱我，阿頭捉咗我入房，叫我做嘢有啲分寸，咁樣叫女同事玩3P隨時會畀人告性騷擾，DLLM吖，我咪成件事由頭到尾解釋一次囉，阿頭唔信我，仲話係Account個阿姐煞有介事咁同佢講，又話Cherrie覺得好冒犯，要搵心理輔導，我就真係要心理輔導喇！」
我：「吹到咁大？不過我想同你講一件事，頭先Emily問我…..你會唔會有性病……」
Trevor：「邊個Emily？」
我：「跟單嗰條四眼妹。」佢連邊個Emily都可以冇印象，可想而知呢啲同事係幾咁冇交情，不過連咁冇交情同埋咁冇交流嘅二打六都知，所以我更加不敢想像。
Trevor：「痴線㗎！我一句嘢都冇同佢講過喎，關佢柒事呀？我鬧爆Cherrie先，都話佢好無賴㗎啦！」
最恐怖係咩，係Cherrie嬲返Trevor轉頭，仲識得以其人之道還治其人之身，條肥妹對Trevor嘅WhatsApp已讀不回，周圍唱完人再嬲9人再唔應人，好L毒呀！
Trevor見Cherrie明明online都唔覆，嬲到即刻打內線過去，點知條肥妹淨係答咗句：「我冇周圍同人講喎，我淨係同幾個人講咗咋喎，你唔好再打嚟騷擾我！」跟手就cut埋線喇，呢啲場景好熟口面呀，當日Trevor咪係咁樣對肥妹囉！
完全冇晒符嘅Trevor由於畀阿頭教訓完，佢自己都唔敢搞大件事，更何況Trevor的確講過自己有玩3P嘅特殊癖好，仲要係經WhatsApp講，個msg只要一cap圖send出去就「馬騮玩賓周」（玩撚猿），有證有據，呢鑊嘢真係水洗都唔清！
件事丟淡咗幾日，Trevor亦開始收拾心情，當時距離聖誕節已經愈嚟愈近，佢嘗試拋開一切約心儀嘅Sophia去街，順便試探下女神會唔會都知道呢單嘢……咪玩啦，既然九唔搭八嘅Emily知道，會計部個阿姐知道，阿頭又知道，有冇可能Sophia會唔知呀？
最終Trevor搵唔到答案，但又應該搵到答案，因為佢send WhatsApp畀Sophia發現只係得一個剔，而佢係睇唔到Sophia個頭像，不過我係睇得到。
Trevor：「我想打死Cherrie！」
我：「你呢招超必真係太超，唔止成功殺退痴女，仲連其他人都擊退埋，有冇後悔？」
Trevor：「冇！懂我的自然會懂，呢條女痴到咁，你明白我畀佢纏住係幾咁慘啦，總之惹到呢種人就好麻煩，屌！我個世界好大，office啲人點睇我有咩所謂，同事又唔係friend，話之佢啦！」
再之後一兩日，呢單超必3P事件演變出更多版本，聽過Trevor爛滾爛賭欠債近百萬、周圍性騷擾女同事、畀女性client投訴佢講賤嘢、我哋阿頭想炒人不過Trevor喊住道歉話唔會再犯……同事們嘅幻想力真係會嚇你一跳。
Trevor為咗避風頭，聖誕前幾日拎咗假，眼不見為乾淨，都好嘅，如果再聽到更多不同故事嘅version，我驚佢真係會打死Cherrie，然而喺聖誕假期前一日，我又聽到一個新版本，係茶水姐姐同我講：「喂，我聽到佢哋講你壞話呀！」
我不嬲同呢個茶水姐姐傾到兩句，佢喺pantry故意壓低聲線同我講嘢。
我：「有咩壞話畀佢哋講呀？我喺呢度不問世事㗎喎！」
「佢哋話你同隔籬位個男仔一齊玩多人運動，成日一齊出去玩女人，唔好咁樣呀，好容易有愛滋病㗎！」
我：「我玩多人運動？邊個講㗎！係咪Cherrie嗰條死肥鬼？」
「幾個同事都咁講呀，我唔爆得佢哋個名出嚟㗎，總之唔止一個啦，你乖乖地唔好痴你隔籬個男仔太多，一睇就知佢唔係好人。」
我無辜㗎喎！3P都可以係兩女一男㗎啫，點解一定係兩男一女呀？而兩男嘅角色又點解會預埋我㗎？Trevor呢招超必真係殺錯良民，我而家都好想打死Cherrie呀！唔知聖誕假期之後嘅劇情又會點推進喇，到時可能已經傳緊我同Trevor齊齊有性病，再傳3P係三男……
最慘係Trevor拎假放到一月頭，同team又唔可以疉假一齊放，我而家一個人頂晒，同事啲眼神好奇怪呀，我係咪要考慮轉工呀？屌！我真係無辜㗎喎！