公司習慣將聖誕同埋除夕party撈埋一齊搞，諗住一次過唔使煩，食完嘢玩抽禮物就可以提早收工，聽落去幾開心係咪？但係有個新同事就向我投訴，佢話買禮物嗰度好大壓力喎，因為要記名同埋mark低邊個送咗啲乜。
「講明唔可以少過300蚊，又唔可以超過500蚊，其實咁樣都唔錯，應該好多選擇，不過Admin要我哋填form寫低邊個邊個送咗啲乜，我覺得……好奇怪囉，一來冇驚喜冇神秘感，二來係咪要防止啲人送cheap嘢呀？」
為咗釋除呢位新同事嘅疑慮，我唯有同佢講下發生過咩事：「因為以前有人送變態嘢，搞串個party，你知一間公司咩人都有啦，梗有啲保守派㗎嘛，所以自此之後就要記名，買乜都要講低聲。」
新同事：「有幾變態呀？用過嘅condom定係著過嘅底褲呀？」
我：「差唔多啦！嗰年有人送咗成set SM情趣嘢，有手扣、低溫蠟燭、假陽具、浣腸用具、拘束……」
新同事：「咩係浣腸用具？」
我：「自己search啦！」
新同事search完之後就喺度講：「Oh! Shit! 咁核突嘅！噴嗰啲白色水係咩嚟？牛奶呀？Shit!」
我：「嗰一年仲有其他禮物好過份，有人買咗60個三腳轉兩腳嘅插頭……」
新同事：「點解要買60個咁多？去旅行最多咪拎幾個去，仲要三腳轉兩腳未必個個國家啱用。」
我：「呢啲插頭幾蚊一個，唔買幾十個點湊夠公司最低要求？禮物總值唔可以少過300蚊吖嘛！」
新同事：「60個插頭都真係……收到嗰個唔知咩感受。」
我：「仲有人送書，我記得有本係《Effective Grammar Tests》，另外加兩三本唔知咩英文習作。」
新同事：「咁幾好吖，咪當學英文囉！」
我：「問題係二手，可能係三四手，全部用過㗎！嗰本《Effective Grammar Tests》入面寫晒筆記，成本嘢花晒，仲要有啲唔知係醬油漬定係咖啡漬，咪就係我抽到囉，即刻丟喺公司個pantry，拎走都費事。」
新同事：「嘩！呢度啲同事都幾喪喎！係呢，頭先話手扣、低溫蠟燭、假陽具嗰啲核突嘢邊個抽到？如果係女同事收到真係唔知畀咩反應喎！」
我：「就係老細個秘書收到……」
我哋公司呢個party係會即場拆禮物，即係好似即場拆人情一樣，當年冇記名，office有90幾人，冇人認就唔知邊個送，除非個個咁誠實自己講出嚟，送正常嘢梗係唔怕認啦，但唔好話咩SM套裝，淨係送二手英文習作同埋60個插頭嗰兩個人都唔會企出嚟，你點知啲禮物邊個打邊個。
好記得秘書拆開個盒嗰陣，第一樣嘢抽出嚟係手扣，嗰時佢仲笑住講咗句：「咩嚟㗎？玩兵捉賊呀？」然後就傻下傻下咁拎住碌假陽具，周圍啲人又笑又驚訝，秘書面容亦隨之扭曲。
新同事：「咁後來點呀？」
我：「老細個秘書衝咗入廁所喊同埋洗手。」
新同事：「唔係呀，我意思係知唔知邊個送？」
我：「邊有人肯認吖，英文習作同插頭直到而家都唔知係邊個送啦！」
新同事：「點會唔知呀，公司100人都唔夠，逐個問囉！」
我：「係咪個個坦白先，同埋當時冇人做check禮物呢個動作，純粹係同事之間私下討論，你估偷嘢犯事咩，強制要啲人落口供認返自己份禮物呀？」
新同事：「咁唔怪得而家要記名同埋mark低邊個送啲乜啦，聽返呢度個歷史，咁又幾合理，我最初以為係公司限制同事唔准送cheap嘢咋，我啱啱入嚟做第一年，打算好好睇睇送啲維他命丸之類，應該見得人啦！」
我：「Ok啦！呢啲穩穩陣陣，我就買咗啲好靚嘅咖啡豆，個包裝都好高級㗎！」
新同事：「係啦，抽禮物都要記名，咪鬼搞咁多嘢，最緊要好好睇睇，費事樣衰吖嘛！真係搵唔到當時係邊個送變態嘢同埋60個插頭呀？」
我：「搵唔到呀！」
直至而家為止，冇人知道二手英文習作同埋60個插頭係邊個送，不過SM嗰set手扣、低溫蠟燭、假陽具、浣腸用具……我就知道係邊個送……係我送嘅。
我唔係變態，呢set禮物都係從另一個聖誕party收返嚟，又係成班friend抽禮物，嗰班朋友本身好玩得，不過我係男仔，你畀碌假陽具我做咩呢？唔通自己通渠咩？當時得物無所用，又忘記咗公司都有個party要買禮物出嚟抽，我咪心諗：「求L其啦！借花敬佛囉！」都幾funny吖，何況呢set嘢總值肯定唔止500蚊。
公司都有其他玩得嘅同事，偏偏就畀老細個秘書抽到，本身當時個氣氛都幾爆笑，點知秘書衝入廁所喊，仲要其他女同事幫手安慰，成個環境突然變得好嚴肅，仲有啲比較年長嘅同事好惡咁問係邊個買核突嘢，咁梗係打死都唔認啦！
好在有同事都買埋啲濕鳩禮物，又有人買啲嘢明顯唔夠300蚊，所以大家都對自己準備嘅禮物守口如瓶（當然有人買大體又正路嘅嘢會衝出嚟認啦），所以冇人知道個SM套裝係我送出嚟……sorry囉！以後唔敢喇！