Regina坦承迷戀男上司，雖然我同Samuel未去到私交甚篤，但之前跟咗佢幾年，大家都叫有交情，何況我出席過婚禮，掹車邊總算識得佢老婆，你話我多管閒事都冇辦法，真係唔想睇住一個25歲妹妹仔同44歲已婚男上司搞不倫，然後去到萬劫不復嘅地步。
當時我哋秘書要幫Admin搞Annual Dinner，所以我心裡面set咗個時間表，就係等Annual Dinner之後搵Samuel認認真真咁傾一次，點知人算不如天算，晚宴嘅時候已經出事，Regina嘅舉動好似要畀全公司嘅人知道。
老細同一班高層傳統上會喺Annual Dinner周圍撩人飲酒，每枱都不能倖免，如果你嗰圍有個粗豪少少嘅男同事肯企出嚟頂就好啲，否則老細男又敬女又敬，劈完又劈真係幾擾民，每年梗有同事飲到劏然後call屋企人嚟接，何必呢？正正經經食餐飯咪算囉！而嗰晚飲醉酒嘅居然係Regina……
我分唔清妹妹仔係真醉定假醉，睇到佢飲咗半杯紅酒，老細見佢係新人又係女仔，其實都冇繼續追住佢嚟劈，只係不斷叫Samuel一齊飲，好在同枱另一個擦鞋男同事自告奮勇同老細飲，Samuel先至逃過一劫，但Regina話自己唔掂，全晚借頭借路挽住Samuel，堅定流呀？酒醉都有三分醒喎！
其實當時都有其他同事見到，梗係啦，做到咁出面，Regina仲要含情默默望住Samuel傻笑，坐我旁邊另一位同事因為唔知道前因後果，望到呢一幕已經喺我耳仔邊講：「喂，你睇，妹妹仔好冧Samuel喎，好似當佢男朋友咁，你估今晚有冇下文？」都話啦，公司咁多人，真係控制唔到人哋把口講乜。
走嘅時候，我見Regina仲係挨身挨勢，所以主動提出送Regina返屋企，點知個衰妹竟然搶答：「唔使啦！我同Samuel住得好近，佢送我。」一定信你係醉咗啦，訴求咁清晰咁有邏輯。
Samuel：「係啦，佢住我對面個屋苑，我送佢啦！」點呀你兩個！
我嘅存在好似阻住Samuel同Regina去happy咁，當時人異口同聲話唔使我送，咁可以點吖？我冇Samuel老婆電話咋，否則一定會打去報寸。
Annual Dinner係星期五晚，我星期一返公司即刻搵Samuel傾，但畀Regina捷足先登，因為一早已經見佢兩個喺房密斟，等咗半個鐘，我終於可以入房搵Samuel喇。
「你上個禮拜就風流快活啦！今朝仲咁纏綿。」
Samuel：「纏咩綿呀？Regina辭職呀，你勸下佢留低啦！」
「點解既？唔係想迫你離婚不成啩！老老實實，你哋係咪有嘢？真心，大家一齊work咗咁耐，你知我唔係八卦嘅人，Annual Dinner佢醉晒挨住你，之後去咗邊先？」
Samuel：「去咗我屋企囉！」
「你當老婆死㗎？你老婆唔喺屋企咩？」
Samuel：「講咗去邊呀？你知幾多先？」
「由Regina一入嚟做已經話鍾意你，我就日日聽佢講，所以咩都知。」
Samuel：「老婆都係由佢第一日坐我順風車已經知。」
「你有同老婆講？佢冇嬲？」
Samuel：「老婆雖然好大方，但我覺得佢有少少嬲啦，其實我每次都會同佢講，甚至話搵個藉口唔再車Regina，反而係老婆叫我唔使，無謂避嚟避去，只係Regina向我示咗愛幾次，上星期Annual Dinner飲醉酒又嚟，結果我帶咗佢返屋企，由老婆同佢傾。」
「咁你老婆冇鬧爆佢咩？」
Samuel：「冇呀，仲好畀心機開導Regina，全晚捉住佢隻手係咁傾，好似姐妹咁，反而我似第三者坐咗喺度，Regina真係好鬼直接，佢話鍾意我呢啲成熟型男人，唔係從破壞我哋婚姻出發，只係想勇於表達，佢話對同齡嘅男仔冇興趣。」
「佢都係咁同我咁講呀！」
Samuel：「我老婆就同Regina講，你咁靚女，應該搵個差唔多年齡嘅男仔，同對方共同成長，互相扶持，見證人生每個階段，一齊變成熟，睇住對方變老，真係估唔到Regina咁堅持，佢話唔想浪費時間喺啲無思想同無理想嘅男仔身上。」
「勸佢唔掂㗎，我都有分享身邊嘅真人真事畀佢聽。」
Samuel：「但我勸得掂喎！我插嘴同Regina講，我曾經就係嗰種無思想同無理想嘅男仔，而且再衰啲，因為我以前脾氣好臭，做嘢好衝動，不過同老婆拍拖8年先結婚，之前係朋友，換言之結婚前已經識咗超過10年，老婆陪住我由唔懂事、冇事業、冇積蓄、冇目標，去到今時今日雖然唔算好叻，不過都ok唔使愁生活啦！呢個枕邊人唔止係我嘅太太，仲係靈魂伴侶，Regina聽完之後就話明白，仲向我老婆講對唔住，然後就離開，我哋兩公婆一齊送佢落樓㗎！」
的確，人愈大你愈會發覺埋身嘅人都有動機，唔係淨係講感情，就算工作都係，好多人睇到你身上有啲條件可以利用先至行埋嚟，但好少人願意花時間陪伴你成長，原諒你犯錯，等待你改過。
「你冇心動咩？25歲卜卜脆喎！咪扮嘢啦！睇得出你沾沾自喜。」
Samuel：「心動㗎！老婆都笑我呢啲大叔竟然吸引到後生女，估唔到仲有市場，不如我問你一個問題吖，你覺得老細靚唔靚仔？吸唔吸引？」
「老細個樣直頭唔正常啦，點會同靚仔兩個字掛勾㗎，唔係著住西裝一早知佢係老細，我會覺得佢只係公園阿伯囉！」
Samuel：「咁你知唔知老細好多女？香港有個二奶，深圳又有，聽講東莞仲有個18歲嘅女仔跟佢。」
「全公司都知啦，佢當威水史咁周圍同人講㗎！」
Samuel：「咁咪係囉，一個男人要有女人，甚至要後生女埋身，唔係咁難㗎咋，有錢就得㗎喇，咁有幾威呢？我老婆就係鍾意我夠專一，佢話專一嘅男人先至最charm，人大咗，唔好淨係識用下面諗嘢，要諗後果，如果貪玩搞到陪伴我成長嘅老婆都冇埋，呢個結果我承受唔起，做人要識得諗邊樣嘢對自己最重要。」
「等等，我抄低返去同老公講先。」
原來Regina當日辭職，係因為佢話覺得尷尬，雖然Samuel認為件事已經搞清楚，唔需要去到辭職呢一步，但Regina都係決定要走，呢個妹妹仔嘅直腸直肚同埋我行我素，其實某程度上都幾型，只可惜將咁好嘅性格用錯地方啫！
提返起呢件事，因為Regina結婚喇，我有佢facebook，見到結婚相先至知，講恭喜佢仲有回覆多謝，雖然我唔知Regina個老公幾多歲，但係目測張相同埋稀疏嘅頭髮，冇50都有40幾，相差10年以上走唔甩，個衰妹果然夠堅持，冇咗Samuel一樣向大叔方向進發，乜大叔真係咁誘惑咩？
無論如何，有人鍾意小鮮肉，有人就係大叔控，各人有各人喜好，大前提唔好破壞人哋嘅婚姻同家庭就得喇，唔到你唔信，呢啲嘢真係有報應，千祈咪制呀！（完）
IG今日出咗新post呀，你follow咗未先？
https://www.instagram.com/officedailyhk/