好多人以為我份工好易做，噚日先有個friend講完：「你就正啦，介紹啲男男女女認識，佢哋點發展又唔關你事。」
好啦！等我分享下平時嘅工作係點啦！
就上星期之嘛，有個身高160嘅女仔講咗擇偶條件，佢想要175以上嘅男仔，要大隻／Sunshine／運動型，咁啱手頭上有一個，然後我就問阿陽光男孩冇冇興趣？又有咩擇偶條件？
陽光男孩話佢希望個女朋友至少有168至170高，想要斯文OL型，成熟啲，獨立啲。
Okok，唔緊要，我有個173嘅女仔，中環OL，然後我又問呢個女仔想唔想見下？鍾意咩類型嘅男仔？中環OL答我要180，因為佢成日著high heel，另外想個男仔有車有樓，最好做自己生意，經濟能力好，佢已經32，拍拖會諗結婚。
就喺呢個時候，同事話佢有個二世祖男會員全部中晒，超過米8，屋企人畀錢佢搞生意，住洋樓養番狗揸靚車，不過人哋想搵後生女，最好唔超過26歲……
靜雞雞話你知，我哋成班同事喺office講得最多嘅一句係：「算啦！你哋繼續單身啦！」