朋友今朝send咗個job ad畀我睇，係一間公司以匿名形式招聘：「得㗎咩？」
我：「如果佢搵Recruitment Agency咪得囉。」
朋友：「唔係喎，佢自己請，但又打住company confidential，唔畀人知係咩公司。」
根據各招聘網站嘅要求，刊登job ad係必須要開公司名，咁樣係保障返應徵者。點解？你都要知自己份CV send咗去邊啩！全部係你個人資料嚟喎，有名有電話有電郵，知你做緊同做過邊間公司，連喺邊度讀書都知，點可以亂咁畀人呀？
一直以嚟都有唔少公司掛羊頭賣狗肉，出ad扮請文職，上去見工又說服你做經紀Sales等等，甚至根本冇打算請人，只係扮叫你上去interview然後sell你買嘢或者join課程。
坊間亦有一啲機構係專門收集個人資料，繼而轉售圖利，所以一隻job ad如果以匿名形式刊登，對應徵者嚟講係有一定風險。
至於點解有啲公司唔開名，要用呢種方式招聘呢？可能未必想呃人嘅，但原因應該不離其中：
1）公司想秘密炒人，登job ad就會通晒天，即將被炒嗰位員工好大機會知道。
2）公司唔想畀同事知道請緊人，免多猜測。
3）唔想畀competitor知道請緊人。
4）公司名聲可能唔多好，一開名就會令應徵者卻步。
5）份工可能真係有問題。
其實1、2、3嘅原因，年中有好多公司係咁，亦都好正常，否則就唔會衍生出Headhunt公司呢壇生意，咁問題嚟喇，點解呢啲公司唔直接搵Headhunt請人呢？Recruitment Agency其中一個存在意義就係用佢哋牌頭幫你招聘，既然你要匿名又唔肯搵Agency，係咪公司畀唔起Agency Fee呢？公司嘅財務狀況會唔會係好緊絀呢？
4同5嘅原因我就唔用小人之心度君子之腹喇。
大家見到呢啲匿名方式請人嘅job ad，絕對可以向刊登嘅求職網站或者平台舉報，佢哋人手有限，有時真係睇唔到咁多，畀人偷雞並唔出奇，不過求職網站係十分樂意幫手移除，因為害群之馬會影響佢哋商譽。
👇👇👇
根據《個人資料（私隱）條例》，僱主須表明公司名稱或身分後，方才可在招聘廣告中，要求應徵者提供個人資料，並應載有聲明，例如：所收集的個人資料只作招聘用途。沒有說明僱主身分的匿名招聘廣告，只能要求應徵者與僱主聯絡。
👆🏻👆🏻👆🏻
有啲公司會走法律罅，匿名登job ad，再叫應徵者send CV之前先打電話畀佢哋，咁就完美避開上述嘅個人資料（私隱）條例，不過你諗真啲，當應徵者已經打咗電話去，其實你嘅身份已經曝光。
關於招聘，老細同埋應徵者嘅地位應該係對等，應徵嗰個在明，請人嗰個在暗，坦白講並唔公平，唔係每個candidate都想畀人知佢搵緊工，可能佢打去之後先發現呢間公司有熟人，佢根本唔想做，又或者佢一早知係呢間公司就唔apply呢！再者，你揀人，人揀你，個job ad連公司資料同背景都欠奉，求職啫，都有權知道呢啲基本嘢啩！
雖然好多人都搵工心切，但係有啲細節仍然要注意，一定要保障返你自己。