婉儀新連載《房客》第2篇同第1篇隔咗咁耐，真係相當抱歉，希望你哋仍然有興趣睇落去啦！
＝＝＝＝＝
《房客 2》婉儀
捉姦事件過咗一日，阿芳接到個電話，然後聽到佢講：「你形容下吖，唔…有呀，好，好。」
我：「咩事？」
阿芳：「個女人問有冇執到隻耳環？噚日阿姐執房執到。」
我：「哦。」
呢度成日有客人漏低嘢，銀包電話耐唔耐會執到，同埋你都預咗啲人實打返嚟問，至於嗰啲性玩具同性用品如果漏低，我哋就會即丟㗎喇，一早講明責任自負，keep係人情，唔keep係道理，加上你又用過晒，擺喺櫃桶好唔衛生，執房阿姐上次先丟咗個手扣，而家啲人玩得好激㗎！
阿芳：「嗰隻Chanel耳環嚟㗎，貴嘢，唔怪得要特登拎返啦，喂喂喂，喺206號房執到。」
我：「206？會唔會係嗰個狐狸精？定係個老婆呢？之後間房仲有冇入過客？」
阿芳：「係佢哋其中一個㗎喇，阿姐執房嗰陣你落咗更，就係嗰陣執到，但唔通我問佢係狐狸精定係個老婆咩？」
我：「你啱你啱。」
又隔咗日，最期待嘅畫面出現喇，原來隻Chanel耳環係細妹㗎！莫非家姐嗰一巴掌太大力，打到耳環都甩埋？
因為當時阿芳行開咗去廁所，條櫃桶鎖匙又喺佢度，為咗令氣氛唔好咁尷尬，我除咗同細妹講等陣之餘，仲順便問咗句：「你哋冇咩事啦嘛？」
細妹可能真係好委屈，亦相信「家醜」好難亂咁同朋友分享，冇諗到隨口一句，細妹竟然順勢吐苦水。
原來返到屋企之後，姐夫唔知點樣氹掂咗家姐，你哋冇睇錯，係和好如初呀！捉姦捉到咁應都可以重修舊好，神奇唔神奇先？咁都算，咪有兩個男人跟埋嚟嘅，原來係表弟嚟㗎，姐夫屋企人同埋家姐係咁怒屌佢哋出手打人，特別係家姐，不斷責怪兩個表弟打到老公咁傷，下！好似係家姐領軍㗎喎……
阿芳終於去完廁所返嚟，見我哋傾得咁投契，佢連Chanel耳環都冇理，一個箭步標埋我身邊八卦，眼神充滿疑問，好似想我哋回帶再講過，梗係冇人理阿芳啦！
我：「兩個表弟出手啫，你一直勸交，何況仲……畀家姐打咗一巴。」
講到呢度，細妹對眼開始紅喇，不過始終冇喊出嚟，只係話：「家姐怪我阻止佢打個女人，上到差館變相無條件放個女人走，鬧我手指拗出唔拗入，仲嬲返我轉頭，黑口黑面，對我單單打打。」
咁荒謬嘅事都有？唔識點安慰，只係由衷講咗句：「有啲人嘅邏輯真係好奇怪。」
細妹拎返隻耳環之後就離開，留低我同阿芳喺度討論，勸交之後反被當成罪人看待嘅經歷，阿芳話自己都試過一次：「以前住嗰度囉，隔離屋幾乎日日打仔鬧仔，個小朋友好似得三年級定四年級，三日唔埋兩日就畀佢老豆老母趕出門口罰企，有一次真係忍唔住，因為嘈到拆天，阻住我煲劇，結果開門出去睇下啦！唔講以為個小朋友殺人定放火咁大件事，原來係測驗唔合格咋，我睇住佢老豆老母喺門口不斷喪鬧，啲說話超級難聽，又話佢蠢過隻豬，又話阿邊個啲仔女叻好多，又話不如而家學定點樣做乞衣，使唔使咁呀？最忟憎係個老豆話，辛辛苦苦賺錢養佢，讀書讀成咁點對得住父母？」
我：「最憎啲老豆老母成日將呢啲嘢掛喺嘴邊，根本係一種情緒勒索，個小朋友都冇要求你咁做，仔女唔係用嚟投資㗎！有啲細路如果心理質素唔夠好，真係會覺得自己冇用，然後走去跳樓，好心唔識教就唔好生，戴返個套唔好學人中出啦！」
阿芳：「咪就係囉！第二日我放工返去，又見到個小朋友畀人趕咗出門口，今次佢坐喺走廊地下做功課，喂！好鬼污糟㗎笪地！唔好講到跳樓咁嚴重吖，個小朋友粒聲唔出走咗去，可能會搵唔返㗎！」
我：「究竟幾時先實施做父母要考牌？」
阿芳：「莫講話做父母，佢哋連做人都唔合格，我見個小朋友兩行眼淚仲喺塊面度，短褲仔下面有一條條應該係藤條印，咪安慰下佢囉，點知個小朋友話自己抵死，話自己對唔住爸爸媽媽，喂，佢唔知三年級定四年級咋喎！搞到有咁嘅思想好咩？咁啱同一層有另一個師奶出嚟丟垃圾，我哋就一齊撳佢門鐘，叫佢老豆老母畀個小朋友返入屋先，點知一開門，個師奶竟然叫個小朋友向父母道歉喎，我心諗道乜嘢歉呀又？小朋友畀老豆老母打，日日趕出門口，受到咁多語言暴力，佢先係受害者呀！我咪兜口兜面同佢老豆駁火囉，你唔識教唔好生啦！一定會報警告虐兒！跟住仲畀佢哋鬧返轉頭，連個師奶都叫我唔好搞咁多嘢。」
我：「咁你即係有冇報警？」
阿芳：「有呀！後尾有差佬上嚟，最後點搞就唔知喇，只知有社工跟進，因為我住多一個月都搬走咗，最後嗰個月就精彩喇，因為我同個小朋友老豆老母嘈，又報晒警，成層樓當我怪物，佢哋覺得我製造麻煩，覺得我教小朋友對抗父母，哈！成件事我變咗衰人。」
我：「講開痴線嘢，有一單都令我對人性好失望，早兩個月同老公行過報紙檔，佢要買煙，我就睇下有咩八卦雜誌，突然有兩條MK行埋嚟，嗌檔口個阿婆做『死老嘢』，跟住拎咗幾份馬經就咁走，我即刻喝住話黑社會買嘢唔使畀錢呀？嗰兩條MK行返轉頭兇我，我老公拎住手機影佢哋，兩條MK先稍為收斂，丟咗幾個硬幣喺啲報紙上面，嗰度連一份馬經嘅錢都未夠，臨走仲要恐嚇我過馬路睇車，個阿婆冇同佢哋計，反而好惡咁話我同老公多事，話我哋兩公婆扮正義。」
阿芳：「算啦！可能你咁做會令佢得罪咗陀地，不過你都係見義勇為啫，如果個個唔出聲睇熱鬧，個世界就玩完㗎喇！」
細妹當日喺206號房叫家姐唔好出手打人，因為出軌單嘢，姐夫應該負最大責任，點知到頭來講真話嘅細妹反被怪責；阿芳幫隔離屋小朋友出頭，鬧佢父母情緒勒索兼虐兒，跟住畀成層樓嘅人排斥；我同老公好心喝住兩條MK買馬經要畀錢，報攤阿婆唔領情仲話我哋扮正義。拒絕做順民嘅代價係預咗條路會好難行，甚至畀人覺得你搞事，但若然所有人都不問原因而妥協，咁呢個世界就只會愈嚟愈醜陋，雖然世界已經好醜陋。
如果唔妥協就等於係怪物，咁我寧願做怪物。
＝＝＝＝＝
《房客1》
https://www.facebook.com/officedaily/posts/1101477336965753