最近為YouTube嚟緊一系列嘅職場片鋪路，開始搵唔同行業嘅人做訪問，希望聽下不同範疇嘅工作有咩辛酸史或者趣事，點知頭兩個interview 已經瀨晒嘢。
今日同一位喺大型連鎖電器店工作嘅sales傾計，佢話返咗呢份工之後最難忘嘅一次經歷，係有個伯伯拎部長者手機嚟整，但由於保養要去返原廠，佢間電器舖喺大西北，而維修中心就喺旺角，見伯伯行動都唔算太方便，就好心幫手睇睇部機有咩問題，檢查後發現一切正常，因為都係得幾個數字鍵，又冇得上網，結果佢同伯伯講冇壞，唔使整，伯伯話如果冇壞，點解佢個女幾個月都冇打嚟，所以一口咬定係壞咗。
呢位Sales問點解唔自己打畀個女？伯伯話個女叫唔好亂咁打嚟，不過Sales有啲擔心唔知係咪有事，又聯想到呢幾個月咁多自殺案冇可疑，所以決定幫佢撳快捷鍵試下，響咗幾聲就有個女仔聽，Sales未及講嘢，對面應該係見到來電顯示就搶先講：「都叫你唔好亂咁打嚟咯，我平時返工好忙㗎，得閒再打返畀你啦！」啪一聲就收咗線。
Sales唯有同伯伯講：「你部電話冇壞呀，你個女忙緊，佢話遲啲打返畀你喎。」
伯伯淨係「哦」一聲，拎返部長者電話就走咗。
聽完呢個分享之後，我決定要stop一stop個訪問，因為想打畀我阿媽先。
其實前日搵咗個婚禮攝影師interview，佢分享咗另一件事已經搞到我個心好唔舒服。