早兩日有個大肚腩地中海，自稱係生意人嘅阿叔上嚟，話要join我哋最貴嘅一對一plan。
阿叔：「最緊要靚！」
年中真係好多人當我公司係夜總會。
我：「除咗樣呢？例如對方嘅職業同埋性格，因為一段關係裡面，溝通都好重要……」
未等我講完，阿叔已經打斷話柄：「30歲樓下啦，最緊要靚女就得㗎喇！」
唉，點解成日遇到呢啲客㗎？都係打發佢走啦！
我：「呢排武漢肺炎呀！其他會員或者想遲啲先約出嚟，得㗎喇，張form有你電話，我之後call back你。」
阿叔：「肺炎使乜驚呀，成年人有抵抗力，我淨係抵抗唔到靚女㗎唧。」
你抵抗唔到係你嘅事吖，我班女會員個個都想抵抗你呢！
我：「明白明白，我會問下幾個女會員有冇興趣先，跟住再慢慢安排，打畀你吖。」
阿叔：「佢哋點會冇興趣呀？而家啲女仔唔係好鍾意大叔㗎咩！你幫我約啦，等你消息。」
大家可能覺得好誇張，其實呢啲事同埋呢種客，喺我哋speed dating公司耐唔耐就會出現一次，做過我呢行嘅人一定會明。
我志在想講清楚一樣嘢，好多騎呢男會員以為個trend係女仔鍾意大叔，唔該唔好咁多幻想啦！啲女仔話鍾意大叔，係講緊孔劉、吳彥祖、福山雅治、木村拓哉、玉木宏、金城武、Brad Pitt、碧咸嗰啲呀！你估啲女有大叔控，真係求其一個大叔呀？麻煩呢啲阿叔唔好再將自己代入去，然後嚟我公司話要搵後生靚女啦！唔該晒！