《份工要X成點先會裸辭？》
喺連登見到呢個post，突然間覺得好感慨，打份工打到好唔開心，又因為時勢同經濟問題焗住做落去，呢種滋味我都試過，好想問返你哋，人生中有冇返過一份寧願窮都要裸辭嘅工？又有冇勁唔鍾意但因為窮而繼續頂硬上？
我暑期工嗰陣試過一次，喺荃灣茶餐廳做樓面，啲同事好西，但可能事隔太耐，真係完全諗唔起係發生咗咩事而引爆我，只係記得臨走嗰下係送完外賣上荃灣桑拿，跟住將個客畀嘅錢（包括碎銀）一嘢掟去個收銀度，然後除咗件茶餐廳白色制服就走咗，我諗咗成朝都諗唔返起係咩事咁嬲。
至於返咗份好唔開心嘅工，又因為窮而冇去裸辭，印象中絕對唔止一份，其中一份係做行街sales，公司內鬥好嚴重，鬼佬老細成日捉我哋出去見客，一日要約5個client visit，咁你做客都唔想成日畀sales煩啦，呢樣好合理，所以約唔到客要聽說話，約到都一樣要聽㗎！因為同老細上完個客度之後，如果佢覺得人哋公司冇potential，佢又會話你浪費時間，而鬼頭仲成日狗眼看人低，嫌人哋公司細，冇大生意，跟住又話唔應該約呢啲客，但係你要明白，每個sales手上嘅client list都係得百幾個account，好多仲要唔active，一日約5個，一個星期25個，一個月都100個，邊有咁多客見呢？你仲要成日對啲客白鴿眼，而不斷約客又煩親人，夾喺中間兩邊都有說話聽。
好喇！當你見完有單返，PD team（Product Development）嘅同事又好唔合作，send嘢畀佢哋問材料價錢永遠諸多留難，因為你加重佢工作量嘛，不過你估我想㗎咩？有得揀都唔想問你哋啦！啲email來回十幾轉都未畀到答案，總之一路拖一路拖，直至老細睇唔過眼要插手，就突然會好快喇。
咁sales受盡壓迫之下，同team係咪會互相幫忙同安慰呢？Sorry，係唔會㗎！小小一個Sales Department都有好多山頭，好多小圈子，同佢哋食lunch就係聽啲人講是非，唔同佢哋玩走去做獨家村呢？咁咪輪到自己畀人講是非囉！仲有好多好多濕鳩嘢，分幾集都打唔晒，總之當時做呢份工嘅狀態就係，每朝起身都好想請假唔返工，其實呢個已經係要辭職嘅訊號，奈何嗰陣又好窮，幾唔開心都要繼續做住先。
等睇你哋可歌可泣嘅經歷，想自己心理平衡返啲。