明顯地，Chris都有因為個offer而心動，再加上地點便利，傾下氹下，佢終於答應去做呢份工，我歡天喜地咁同Derek老闆講：「Chris OK呀，下星期一9:00會準時，多謝晒你，麻煩你幫我照顧阿Chris喇。」
自己平時headhunt有佣收嘅job都冇咁上心，我喺Chris返新工前幾日keep住聯絡佢，畢竟咁多年冇做嘢，突然出返嚟社會投入職場多少會緊張，心理輔導係必需嘅，另外亦要保護返自己嘅聲譽，唔希望Chris到時又甩底。
雖然日日同Chris用WhatsApp傾計（星期六日就冇打擾佢），但係去到星期一，我仍然收到Derek老闆嘅電話……
Derek：「Chris冇返工喎，打過佢電話都冇人聽，而家10:30，我擔心佢係咪有咩事，你搵唔搵到佢？」
我：「冇返？唔好意思，我而家試下打畀Chris吖！」
唉，心知不妙，歷史又重演，我打咗畀阿Chris好多次都冇人聽，嘗試WhatsApp佢，明明睇到佢online，應該有read到我msg，可惜都係冇回覆我，咁你教我點做啦，有強奸冇焗賭，更加冇得迫人返工㗎嘛，不過呢，我係有少少嬲既。
將呢件事同返Owen講，佢喺電話度係咁嘆氣，仲叫我唔好嬲阿Chis，坦白講當時我已經想放棄呢個人，如果繼續幫Chris搵工，次次都甩底，次次都no show，我嘅信譽credit總有一日用盡，雖然Derek講過會畀佢老婆contact我，又話佢公司有job可以用headhunt，但係我都冇面目再問或者follow up喇，換轉你係Derek，都唔放心搵我啦，介紹個candidate最終影都冇埋。
愈諗愈唔忿氣，隔多一個星期，我嘗試再搵Chris，今次加重咗語氣。
我：「Hello Chris，見到msg麻煩覆一覆我啦，其實返唔返工好少事，我、Owen，仲有Derek都好擔心你，我哋都係成年人啦係咪？就算唔需要同人交代，自己都應該有啲責任感，我係義務幫你搵工㗎咋，希望你會明白。」
本以為呢段msg又會被已讀不回，估唔到半個鐘之後竟然收到回覆。
Chris：「Sorry，搞到你，以後唔需要再幫我搵工喇，我唔會去interview，無謂白費你心機，Sorry！」
睇到佢一句裡面有兩個Sorry，我又嬲唔落喇，反而好想了解Chris有乜嘢心理障礙，但我知道唔會喺Chris口中聽到任何深入嘅分享，所以就決定搵Owen，大家商量下可以再點做，我都想Chris殘而不廢，坐輪椅一樣可以掌握自己嘅人生。
我：「Owen，唔好介意我咁問，Chris屋企係咪好有錢？如果真係有錢到唔使做，咁就算啦，我都唔想強迫佢做自己唔鍾意嘅事，會唔會係Chris根本唔需要工作，生活同樣會過得好好？」
Owen：「據我所知，Chris屋企未去到大富大貴，佢爸爸當年生意仲出現咗問題，Chris差啲就輟學唔讀，話想返香港搵工……」
我：「會唔會係呢幾年屋企環境好咗呀？」
Owen：「呢層我真係唔知……」
我察覺到Owen嘅語氣同對答都有異，唔知搞咩突然吞告吐吐，好似欲言又止咁，總之同平時唔一樣，所以我決定旁敲側擊，希望了解多啲。
我：「咁又有啲奇怪喎，聽你咁講，Chris之前差啲想讀讀下大學都放棄，一心要返香港搵嘢做，而家成個人喺香港，又會有工都唔做嘅，我以為Chris本身嘅性格就係咁頹，會唔會係加拿大嘅生活比較適合傷殘人士？香港節奏太急？」
Owen：「其實，Chris嗰陣時仲未坐輪椅。」
我：「呢幾年嘅事？咁唔怪得同當年讀書有咁大分別啦，唔好意思呀Owen，可能我暫時唔會幫阿Chris搵工喇，我唔想成日得失啲客，你知啦，行頭好窄，同埋我唔收佣去幫啲公司搵人，始終唔啱規矩。」
Owen：「你畀多次機會佢啦，你唔幫阿Chris，冇人幫到佢㗎喇。」
我：「咁樣我好難做哩……」
Owen：「Chris坐輪椅其實係關我事，所以我唔想放棄呀，一直以嚟都有好多headhunt撬我轉工，但係好幾個做嘢都唔上心，得你咁有責任感，又多客源，如果你唔幫阿Chris，冇人幫到佢㗎喇，佢又唔主動搵工。」
Chris坐輪椅關Owen事？我心裡面有十萬個為甚麼。
我：「唔係想八卦，咁我又喺度諗，Chris一直唔接受offer，會唔會係因為佢透過我搵工，而我又係認識你嘅人？」
Owen：「應該係，我哋以前好friend好friend，真係friend到可以一條底褲兩份著嗰種，然後有一次我炒車，其實Chris係乘客嚟，我淨係擦傷，不過Chris好大鑊……我寧願跛嗰個係我。」
完全冇諗過Chris同Owen之間會有一段咁嘅經歷，我真係唔知講咩好，同時腦海諗起好多新聞，呢類炒車嘅交通意外，往往係駕駛者冇事，反而乘客仲傷，甚至係冇埋條命。
Owen繼續講落去，我曾經想stop，又唔敢打斷佢，原來當年炒車之後，Chris知道自己要坐輪椅就好激動，佢爸爸媽媽都飛咗去溫哥華，Owen唔知點算好，Chris嘅爸爸仲嬲到打咗佢一身，聽講唔係醫院有人阻止，Chris爸爸真係會打死Owen。
之後嘅日子，Chris唔肯再見Owen，仲跟父母返咗香港，無聲告別，但係Owen一直都好內疚，期間有兩年唔敢搵阿Chris，又一直受盡自己良心責備，返到香港就再嘗試聯絡呢個朋友，直至近一兩年Chris先至冇咁怨恨，不過就唔接受Owen任何恩惠。
Owen：「我儲咗一筆錢想畀阿Chris，不過佢唔要，佢爸爸媽媽亦唔想再見到我，呢一年其實好大躍進喇，我send 10個msg畀阿Chris，佢會覆我一個，比著以前係完全唔會覆，如果所有嘢都冇乜點變，我估阿Chris屋企環境未算去到好好，所以好想幫佢搵份工，更何況出嚟做嘢，接觸多啲人，對阿Chris始終係一件好事，佢以前十分好動㗎，我真係寧願跛嘅係我……」
聽到Owen又講「寧願跛嘅係自己」，我內心嘅感受好複雜，一個以後都要坐輪椅，一個就成世人受良心責備，不過換轉我係Chris，可能都冇咁容易原諒Owen。
真心想問意見，如果你係我又會點做呢？我好想幫阿Chris，可惜諗爆頭都諗唔到方法，莫非真係要等佢自己慢慢過渡同搵通？