有日一位女士嚟到診所。
佢行埋嚟登記處伸出雙手：「姑娘你同我睇吓」
睇完，照登記thanks。
我：「係咪要睇醫生呀？麻煩身分證登記呀」
佢：「你睇咗啦？」
我：「嗯？我唔係醫生，我睇冇用啊，要俾醫生睇」
佢雙手繼續伸出嚟：「你睇吓啦」
我：「你想我幫你睇啲咩呀？我唔係醫生真係幫唔到你俾唔到意見你呀」
佢：「你見唔見到我指甲邊啲皮呀」
唔借死皮剷唔借指甲鉗呀！
我：「不如咁啦，你有唔舒服嘅我就同你登記睇醫生啦」
佢：「我最近生好多呢啲呀」
你有冇聽我講嘢啫？
我：「咁一係我同你登記睇醫生呀，你俾身分證我呀」
佢：「你有冇聽我講咩㗎？」
哇，你做咩搶咗我句對白呀？
我：「有呀，你話你生咗好多呢啲嘢嘛，所以我咪話你唔舒服嘅就入去睇醫生囉？」
佢：「姑娘你咁樣好似大驚小怪得滯喎」
係咩？咁你又喺度嘅？你嚟做咩㗎？
我：「小姐，我哋呢度係診所嘛，係睇醫生嘅地方，除咗睇醫生就冇其他嘢㗎啦」
佢：「哦，我知呀我明㗎，你哋要食飯要交租要生活呀嘛，要賺我哋呢啲小市民錢呀嘛，唔會白白就咁答我哋呢啲小市民嘢呀嘛，我真係明㗎」
咦，你講到自己咁善解人意睇得咁通透又做咩入嚟呀？
佢再講：「但係你唔係醫生喎」
我冇出聲。
佢再講：「你唔係醫生唔係咩值錢嘅工喎，你可以答我㗎」
咁計嘅話，以後有咩手術要做都可以搵唔係醫生嘅人嚟做？
我：「我唔係醫生更加唔應該俾任何醫療建議你」
佢望住我冇出聲咗一陣，之後隔咗分零鐘再講：「我同你講生呢啲係醫療建議？」
我仲以為你load咗咁耐會講返句有力啲有內涵啲嘅對白，我對你太失望啦，不過我唔想扣你50分，你自己行出門口返屋企好好反省吓。
我：「我唔係醫生唔可以答你呢啲嘢，你有需要就要入去問醫生」
佢斜眼超咗我一陣就離開咗診所。
應該係返去反省。
👉🏻即睇其他診所低能奇觀嘅文章
👉🏻《診所低能奇觀》 聞聞佢
https://hkofficedaily.com/?p=16664
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。